Manchester City 1-1 Arsenal: Point 2 Chanin Point 1 Ve Ve Hmu

Etihad Stadium, Manchester a inkhel ah mual neitu Manchester City leh an mikhual Arsenal te 1-1 in an inhnehtawk. He inkhelah hian Manchester City tan Joleon Lescott in goal hmahruai a thun hnuah Arsenal tan Laurent Koscielny in goal mawizet maiin a chhanglet. He inkhel hmuhnawm leh boruak sang takah hian a tir atanga a tawplam thlengin chanchin ngaihnawm sawi tur a awm.

Line Up
Man City: Joe Hart, Pablo Zabaleta, Vincent Kompany (c), Joleon Lescott, Gael Clichy, Javi Garcia, Yaya Toure, David Silva, Sergio Aguero, Scott Sinclair, Edin Dzeko.
Arsenal: Vito Mannone, Carl Jenkinson, Per Mertesacker, Laurent Koscielny, Kierann Gibbs, Abou Diaby, Mikel Arteta (c), Aaron Ramsey, Santi Cazorla, Lukas Podolski, Gervinho.

Inkhel tan anih atangin Manchester City leh Arsenal te hi khelmual laiah an innawr nasa a. Manchester City midfielder palian Yaya Toure leh Arsenal midfielder palian Abou Diaby te velah ball hmuh tur a tam hle. Minute 8 naa Santi Cazorla pet chu goal zawna ball pet hmasakber a ni a, Manchester City goalkeeper Joe Hart tan erawh man harsa tak a ni lemlo. Minute 40 na thleng chu Arsenal hian an nawrna zawk niin a lang a. Arsenal tan Carl Jenkinson-a pek Lukas Podolski-a’n a pet luah te, Arsenal free kick hmuh Santi Cazorla in a pet an lo man te, tunhnaia goal thun thei tak Gervinho pet goal loh te kha Arsenal tan chuan a uihawm hle ang. Half time ah goal a lut dawnlo anga a lan laiin minute 41 naah Manchester City corner hmuhah Arsenal defender te inrem karah Joleon Lescott a rawn langsar ber a, Arsenal lamah goal hmahruai a tauh lut. Arsenal defender te hian nidang anglo takin ‘zonal marking’ an hmang a. Zonal marking hi a mimala lehlam pawl chang lovin lehlam pawl tana remlo turin an lo inremlawk tihna a ni mai. A palian lo zawk Arsenal in hetia lehlam pawl corner hmuha an lo chang hian commentator te pawh zawhna a siamsak hial. Goal pawh an chhuah phah ta niin a lang. A hnu lawka Edin Dzeko pet goal loh te kha Arsenal tan chuan a thawventhlak huai ang. Half time anih meuh chuan mual neitu lam hi mikhual te aiin an lian zawk.

Second half ah Manchester City in winger Scott Sinclair lachhuakin defensive midfielder Jack Rodwell an rawn dahlut a. Hei hi an goal neihsa venhim an duh vang emaw Yaya Toure tlar hma lama nawr chhoh theiha tur anih hmel. Champion lai in an thatzia an lantir chhunzawm zel a, minute 49 naa Sergio Aguero pet goal loh te kha Manchester City fans te tan chuan a hrilhhaithlak viau awm e. Manchester City hian nawr viau mahse Arsenal tlarhnunga Per Mertesacker leh Laurent Koscielny te khelhthat tum a ni hlauh chu Arsenal tan chhandamna a ni ngei ang. Arsenal midfield in nidang an khel an phalo hle a, pass sual a awm nual bakah minute 69 naa Ramsey leh Gervinho insu ringawt te khan an pu chu a ti lawmlo khawp ang. Minute 79 naah counter attack atangin Yaya Toure pek chu Sergio Aguero in Manchester City tan a thun thelh. Hun tawp lamah mual neitu in an nawr tluan dawn emaw tih laiin Arsenal in tan an han khawh leh a. Hei hi hmang tangkaiin Santi Cazorla pet Joe Hart in a ben per hnulawkah corner atangin Cazorla pet chu Koscielny in lo nangfuhin Arsenal si phurh a rawn sut a, Arsenal in minute 81 naah goal an thun. Inkhel a rei tial tial a, inkhel a hmuhnawm tual tual. Minute 83 naa Manchester City captain Vincent Kompany-a ‘bicycle kick’, Arsenal goalkeeper in a lo dan hnua Sergio Aguero in goal ruaka a thun thelh te khan Manchester City vanduai zan anih zia a lantir. Minute 89 naa Arsenal player te thawhrah tha lutuk atanga Gervinho in an chakna tur goal a thunloh khan Arsenal vanduai zia a rawn nemnghet leh.

Hun a tawp meuh chuan mual neitu in an goal neih humzo lovin an mikhual nen point 1 an insem. He point 1 hi Manchester City leh Arsenal tan an hlawh nilovin point 3 an hmuh theihna tur an hlauh ve ve ni zawkin a lang. Inkhela goal thun theihna remchang leh an thun thelh te ngaihtuah chuan 1-1 a an inhnehtawk hi an phu viau niin a lang a. Chak thei dimhmuna an awm laia an chakna tur goal an thun theilo ve ve ngaihtuah chuan season tawplamah an ui hnuhnawh leh ang tih chu a hlauhawm khawp mai. Manchester City leh Arsenal te hian point 9 hmu tawhin pasarihnaah leh panganaah an awm.