Pathianni zana Barclays Premier League inkhel hmuhnawm takah Manchester City chuan an mikhual Southampton chu 3-2 in an hneh a, champion nomawi humhim turin pên khat an pen. He inkhelah hian Carlos Tevez, Edin Dzeko leh Samir Nasri ten Man City tân an thun a, Southampton tân Rickie Lambert leh Steven Davis ten an pet goal bawk.

Inkhelh zawhah May ni 13, 2012 a Manchester City in QPR an hneh kha rilru ah a lang lo thei lo a. Scoreline bakah team pahnihte inpet goal chhâwk dan te, inkhel boruak hrim hrim te a inang hle a ni. He stadium ah hian a zawnin League match hmuhnawm chungchuang khelh a ni ta.

Tutenge khel?

Manchester City in inhliam Gareth Barry aiah player thar Jack Rodwell an luhtir a, hei bak hi chu season hmasa nen danglamna a awm lo. Southampton tân player thar Nathaniel Clyne chu a tir aṭangin a lut a, ‘star striker’ Rickie Lambert chu substitute ah a awm thung.

Man City:  Manchester City: Hart, Zabaleta, Kompany, Lescott, Clichy, Y Toure, Rodwell, David Silva (Balotelli 72′), Nasri, Tevez (Kolarov 87′), Aguero (Edin Dzeko 14′).

Southampton: Davis, Clyne, Fonte, Hooiveld, Fox, Ward-Prowse (Steven Davis 65′), Schneiderlin, Lallana, Puncheon (Sharp 86′), Guly, Rodriguez (Rickie Lambert 55′).

First half ah Man City

‘Home team’ Manchester City hi Premier League champion lai leh champion leh tura rinkai ber pakhat an ni a, a tir aṭangin inkhel pawh an thunun hneh hle. Minute 14 ah season hmasa-a an champion na goal thuntu Sergio Aguero chu inhliam vangin thlak a ngai a, a aiah Edin Dzeko a rawn lût. Minute 16 ah Carlos Tevez chuan penalty a hlawhchhuak a, David Silva chuan zawite in leihrulah a pêt a, Southampton keeper in awlsam angreng takin a save. David Silva te meuh pêt ah chuan penalty chhuanawm loh tak a ni.

Southampton in an tihtur an hrechiang a, goal venhim an thupui a. Southampton penalty box bawr vela City player te ball inpekual hmuhnawm viau ṭhin mahse Saints keeper Davis an tibuai pha meuh lo. Minute 40 a ni a, engkim a danglam ta. Nasri ball pek lo dawngtu Carlos Tevez chuan hnai set sawt aṭangin a pet goal a, first half a tâwp zui.

Southampton tân substitute pahnih

Star Sports-a commentator in, “Football ah chuan tuman engmah an hre lo” (In football, no one knows anything) a tih kha a va dik tehreng em. Second half ah Man City in bul an ṭan ṭha a, Dzeko chuan chance ṭha lutuk a hlah hnu lawkah Clichy chuan goal bar a pet per bawk a, an insawp hle dawn niin a lang hman. Mahse football chuan engmah a hriatlawk si loh.

Minute 56 ah nPower Championship 2011-12 Player of the year leh top scorer ni bawk Rickie Lambert a rawn lût a, minute 3 hnu lekah Southampton tân an siphurh a sût. Minute 65 ah Steven Davis a rawn lut leh a, a hnu minute 3 ah counter attack ‘rang tak’ aṭangin a pet goal leh a, a bet zawk leh ball chang mang lo zawk Southampton in 2-1 in hma an hruai daih mai.

The fightback

Manchester City in si an phur rei lo a, minute 72 ah Nasri corner aṭanga ball kal zel aṭangin Edin Dzeko chuan an siphurh a sût. Hemi hnu hian Southampton half ah an inkhel deuh tawp a ni ber a, Balotelli leh Dzeko ten uihawm taka an ṭhelh hnuah, minute 80 ah Samir Nasri chuan City goal thumna leh an chakna hi a thun ta a ni.

A tawplamah Southampton in nawr ve deuh mahse goal an thun thei tawh lo a, Premier League 2011/12 a inkhel hmuhnawm ber (?) ah champion lai hi a chak zawkah an ṭang ta a ni.

Sawizui ila

Southampton in player langsar an nei tlem khawp mai a, Lambert hi an innghahna a nih leh a rinawm a, team spirit erawh an nei ṭha narawh e. Point 1 tal an hmu lo kha an ui viau ang a, mahse match huphurhawm deuh ber, “Manchester City away” an khel zo tawh a, thawk khat chu a veng huai tawh dawn a ni.

Manchester City hi awlsam taka chak thei tura an lan hnuah harsa zetin an chak thei hram a, si an phurh hnua an rawn ‘comeback’ dan erawh champion lai khelh dan tur dik tak a ni. A khelh hrim hrimah chuan an khingpuite hi an hneh hle a, mahse kai thar an hneh ‘hram’ avangin Roberto Mancini lawm a kim hauh lo ang.

Statistics:

Images from dailymail.co.uk and itv.com