Manchester City fans te tân chanchin lawmawm tak a awm a, chu chu ‘star striker’ Sergio Aguero inhliam chu rin aiin a na lo tih hi a ni.

Argentina striker Aguero hi Pathianni-a Man City in Southampton an hneh ṭuma inhliam a ni a, Southampton defender Nathaniel Clyne nen an inchuhna lamah rem lo zetin a tlu a ni. Aguero hi minute 14 lekah zâwnchhuah a ngai hial a, thla 6 chhung a chawlh a ngai maithei tih thuthang a awm zui nghal a. Mahse Man City manager Roberto Mancini chuan a hliam hi a tira an rin aiin a na lo tih sawiin, thla khat vel chauh a chawl dawn niin a lang. September ni 15 a Stoke City an tlawh hunah a rawn lêt leh hman beisei a ni.

Mancini chuan, “Sergio hi hunrei tak a chawlh ka ring lo a, international break zawhah a rawn let leh hman kan beisei. Hei zet hi chu amah leh keini tân chanchin lawmawm tak a ni. A tirah kha chuan kan mangang hman hle a, khup hliam hi chu a hlauhawmin hun a duh rei bik ṭhin a, thla ruk emaw, a aia rei emaw chawlh a ngai dawn emaw kan ti hman a ni. He chanchinthar hian min thlamuan takzet a ni.” tiin Manchester City official website a hrilh.

Barry leh Richards pawh

Manchester City in thu lawmawm an nei zel a, tuna inhliam mek Gareth Barry leh Micah Richards te pawh beisei aiin an dam chak tih Mancini chuan a sawi. Gareth Barry hi a inhliam vangin UEFA Euro 2012 ah a inlan thei tawh lo a, pre-season pum a chân bawk. Tunah hian training a zawm thei tawh a, a ‘inla fit’ mek niin Mancini chuan a sawi a. Aguero nen hian international break zawhah chuan an khelh theih a beisei a ni.

Richards hi Euro 2012 a inhliam a ni a, Aguero leh Barry te ai chuan tlemin a hliam na deuh a ni. Mahse ani pawh beisei phak dakin a dam chak a, thla khat hnu velah a inkhelh leh theih a rinawm.

Manchester City player neih ṭhat zia kan sawi ṭhin a, mahse player ṭha bik, thlâk hleihtheih loh hi an awm ve a, Sergio Aguero hi chutiang player chu a ni. He thu thar hi Aguero leh Man City ngaina a, ṭantute tân chuan thu lawmawm tak a ni ngei ang.

source: premierleague.com