English midfielder Jack Rodwell man zatah Everton leh Manchester City te chu an inrem ta. Rodwell hian Pathianni-ah Man City ah medical a nei ang a, harsatna dang a awm loh chuan darkar reilote hnuah Manchester City ‘official player’ a ni tawh ang.

Kum 21 a upa Rodwell man zat hi puanzar a ni lo a, mahse Everton hian pound maktaduai 15 aia tlawma an hralh phal loh thu an lo sawi tawh ṭhin avangin hei aia tlawm chuan an chhuahtir a rinawm loh. Tun nipui bazar-a Manchester City player lakluh hmasaber leh a awmchhun a la ni rih a ni.

Rodwell hi Everton academy chhuak a ni a, kum 2007 ah Everton first team ah khel ṭanin, Premier League ah vawi 85 a inlan tawh a ni. A naupang ang aiin tawnhriat a ngah tawh a, England U16, U17, U19 leh U21 ah te khel tawh ṭhinin, nikum November thlaa England leh Spain an inkhelh khan England senior team tân a vawikhat nan a khel bawk. Kumhnih liamta aṭangin Manchester United-a lût tur angin thuthang a awm fo a, Chelsea hming pawh a khât tawkin a lang zauh zauh bawk. A tâwpah erawh Man City  in an chang ta a ni.

Player thar an lei lawk loh avangin Manchester City manager Roberto Mancini a vui hman viau a, mahse tunah chuan a player thar (tur) fakna thu a chhakchhuak ve thei ta. Mancini chuan, “Rodwell hi footballer ṭha tak a ni tih kan pawm thlap a. A kum la naupang mahse keini leh England national team ah midfielder pawimawh tak a la ni thei tih a chiang a ni. Inkhelh thiam satliah mai bakah chak duhna thinlung pu tlat mi kan duh a, nakin zela player ṭha tur kan melh bawk. Rodwell hian heng kan duh pahnihte hi a nei ve ve a ni.” tiin a sawi. Rodwell hi England-a piang leh seilian a ni a, Premier League club ten an squad ah ‘homegrown player’ pariat tal an neih a ngaih avangin hemi kawngah pawh Rodwell hi Manchester City tân a hlu lehzual dawn a ni.

Man City hi Premier League club zinga squad nei chhah ber pawl ni mahse Gareth Barry a inhliam avang leh Nigel de Jong hmalam dinhmun a chian loh avangin midfield-ah indaih lo thut thei an ni a, Rodwell hi an mamawh chi tak a ni a tih theih awm e. Pathianni-ah vek Roberto Mancini hian thu pawimawh tak puangin, a striker pahnih Carlos Tevez leh Edin Dzeko te chuan Manchester City an chhuahsan rih loh tur thu a sawi a ni.

Man City hi Arsenal striker Robin van Persie leh Liverpool defender Daniel Agger te nena sawizawm reng kha an ni a, mahse anni pahnih hi an lalût thei dawn ta lo niin a lang. Engpawhnise, football transfer season lai hi chuan huai taka thil sawilawk theih a ni lo a, transfer bazar tâwp ni ah to zet zetin player thar an lalût leh nawlh nawlh lo ang tih pawh a sawitheih loh e.

source: bbc.co.uk/sport