Roberto Mancini chuan kum 2017 thleng Manchester City manager ni turin contract thar a ziak.
Mancini hian kum khat chhung chauh Man City ah hian contract a nei tawh a. Dick Advocaat chhuahsan tak Russia national team coach hmunruak luah tura rinkai ber pakhat a ni hman a, World Cup 2014 qualifying a Russia enkawl turin a hming a ri ring hman hle a ni. Mahse tunah chuan engkim a chiang tawh a, English Premier League champion team ah hian kum nga daih contract thar a ziak.
Record nei ṭha Mancini
Roberto Mancini hian December 2009 aṭangin Manchester City a enkawl ṭan a, a zawmtirha club ṭha tur indin chho mek kha club ṭha takah a chhuah tawh a tih theih awm e. Han chetchhiatpui deuh châng nei ve bawk mahse a a enkawlna hnuaiah Manchester City in hmuhtheihin hma a sawn a, player manto awmkhawm ni ṭhin kha football team ‘tak tak’ a ni tawh tih kan hmu mek a, kan la hmu zel dawn ni pawhin a lang.
Mancini enkawlna hnuaiah hian Manchester City chu FA Cup 2011 champion a ni a, Premier League 2010/11 ah top 4 ah awmin UEFA Champions League (UCL) khel thei dinhmunah an inhlangkai bawk. 2011/12 season ah phei chuan an hmelma leh elpui ber Manchester United khûmin Premier League champion an ni a, season tharah Europe-a football club tawrhhlelhawm ber pakhat an nih leh ngei a rinawm.
“Ka lawm e”
Contract thar a ziah chungchangah Mancini chuan club official website ah lawmthu a sawi a. “Kum nga chhung ka theihna zawng zawng Manchester City tân ka pe leh thei tur hi ka lawmin ka hlim hle a. Tunhnaia kan hlawhtlinna belhchhah tura theihna awm hi a sâng em em a ni.
“Manchester City hi football club ropui tak a ni a, a neitu aṭanga chairman, board leh executive team te, players, staff leh fans te thleng hian a ropui em em vek a ni ber. Ka hmaa chona leh phurna awm hi hmachhawn turin ka inpeih a, ka châk tawh hle a ni.” a ti.
Manchester City Interim CEO John MacBeath pawhin thuchhuah siamin, “Roberto Mancini hi manager ṭha a nihzia chu Europe a a record hrang hrang aṭangin a chiang reng tawh a. Season hnih chhunga FA Cup leh Barclays Premier League a a champion pui thei hian English domestic game ah pawh a rintlak hle tih a nemnghet. He inremna thar hian Premier League title humhim mai ni lo, Europe a champion thei team enkawl a, kaihruai thei turin Mancini tân kawng a hawn sak a ni.” a ti. Season tharah Champions League group stage-a tlâk an tum tawh lo viau ang le.
Manchester City player pawimawhte hi an ngheh hmel hlawm viau a, David Silva, Yaya Toure, Sergio Aguero, Carlos Tevez, Mario Balotelli, Vincent Kompany leh midangte hi chhuak darh lo a an khel ho leh ṭhap a nih chuan Europe-a team ṭha pawl an ni leh ngei ang. Mancini hian transfer huntâwp hmain tu tak la lût ang maw?
comment 3 na khi tawm pui ve em em tawp mei the ang!..
Coach leh manager tha kan tih ho hi club lian,duhtwka player tha leia nei thei enkwltute an ni tlagpui deuh zela..hei tak hian gaituahna a tibuai leh deu thin..club laihwl leh amwngphah ho te hi hrual ve ta hlwm sela ege an anpu ve hlwm ag..?tin,club te lam manager ho hian alian ho hi hrual ve ta thug sela an tha ve fu tho lo ag mw..?
Pwisa a hman tam hu ag in,player a lei thym em2 k tilo.mhs manager tha tak cu a ni.
an thlen theih loh thlen pui theitu Mancini hi chu contract ziahpui loh chi a ni lo. City boss tam tak tih theih loh thin kha a ti thei tlat.