Manchester United chuan Old Trafford-ah Tottenham Hotspurs an lo mikhual a, 3-0 in an lo hneh. Heti hian Old Trafford ah a zawna vawi 16 chak tawhin EPL record an an siam chhunzawm zel.

Manchester United 3-0 Tottenham Hotspurs

(Danny Welbeck 61′, Anderson 76′, Rooney 87′)

Tute nge khel?

Manchester United in dan pangngaiin 4-4-2 an rawn thawhchhuahpui a, inhliam Ferdinand leh Vidic te awm lo mahse striker Hernandez chuan bench a luahlum thei thung. Tottenham lamin Kranjcar leh Livermore te midfield ah an rem a, attacking player an ṭha ngei mai.

Man Utd: (4-4-2) De Gea; Smalling, Evans, Jones, Evra; Nani, Cleverley (Giggs 81′), Anderson, Young (Park 81′); Welbeck (Hernandez 81′), Rooney

Tottenham Hotspurs: (4-4-1-1) Friedel; Walker (Corkula 45′), Kaboul, Dawson, Assou-Ekotto; Lennon, Livermore (Huddlestone 74′), Kranjcar (Pavyluchenko 74′), Bale; van der Vaart; Defoe

First half: Goal awm lo inkhel hmuhnawm

Field chhungah team pahnih an rawn lut a, an inrem dan aṭangin goal thun an tum ve ve tih a hriat. Inkhel ṭan tirha game thunun tu United tlarhmaa awm te ball inpekual a rang thei ngei mai. Minute 8 naah Cleverley shoot chu ropui takin Friedel chuan a lo dang a, he American goalkeeper hi a tar thei lo em ni.

Spurs in an midfielder ṭhate awm loh an tuar a, ho angreng takin ball an inpe sual leh ṭhin. An winger tlanchak pahnih Gareth Bale leh Aaron Lennon te dawk thei pur pur hle mahse beisei angin ball hlauhawm an siamchhuak thei meuh lo. Tottenham game a zia deuh laiin counter attack ah United an rang thei hle a, Minute 28 a Rooney ball pek ṭha zet chu Ashley Young-a’n a head goal teuh ngei mai.

Team pahnihten game open tak khel mahse goal hlauhawm han tih tur a tam lo a, minute 43 naa Van der Vaart long shot kha a goal teuh ber a ni mai awm e.

Second half ah Red Devils tak tak

Second half ṭan tirhah Spurs goal bawh a na zawk a, game a ‘open’ in goal lehlam lehlam kan hmu tawn zak zak mai. Minute 61 ah Cleverley cross ṭtha zet chu Danny Welbeck chuan a lo head goal a, hemi hnu hi chuan Manchester United hlir kan hmu ta. Midfield-a United rawlthar rualten Community Shield a an game hmuhnawm tak ang kha min hmuhtir leh a. Rang tak takin an in pass kual a, Spurs midfield ‘phuahchawp’ an hawihai. Minute 76 naah Anderson chuan United goal hnihna a thun a, mawi taka siamsaktu Welbeck a fakawm.

Minute 79′ naah de Gea tihsual vanga Tottenham cross kal zel chu Defoe chuan lo changin hnai zet aṭangin goal ban a pet per!! United in goal thun an la duhtawk lo a, minute 87′ naah substitute Ryan Giggs cross chu Wayne Rooney chuan a head goal. Sam thar nei (hair transplant) hi United fans ten nick thar an vuahsak a, Samson-a an ti!!

Pass and move, pass and move

Second half-a Manchester United in khati taka game an thunun theih nachhan kha engnge ti ila, an passing rang lutuk leh player te intlanthleng zung zung kha a ni kan ti thei ang. 4-4-2 angin inrem mahse a khelh tak takah chuan 4-2-3-1 angin an khel a. Welbeck hnungah Nani, Rooney leh Young te an tlankual reng a, lehlam tân ven tur bik hriatthiam a har a, defender te inkarah space a tam duh bik a ni.

Sir Alex-a thluak

Spurs midfield ah Livermore, Kranjcar leh Van der Vaart te V formation hmangin an inrem ṭhin a, inman vak lo mahse an tihfuh chhunah United lamin ball an laksak thei ṭhin lo. Jones leh Evans ten Defoe an ven a ngai a, midfield ah Cleverley leh Anderson te kha an tamhneh fo mai. Second half ah Sir Alex-a’n a tactic a thlak a, Van der Vaart leh midfielder dangte inkarah tak Anderson a dah a, second half ah Spurs midfield hmuh tur a awm lo.

Kan sawi tawh a, kan sawi leh ang. United chakna hnâr chu a sirah a ni. EPL club lian sira wing play hmang nasa ber an ni hial awm e. Club lian dang ten an neih loh winger ‘class’ tak Nani leh Young an nei a, de Gea hi che chhe deuh ṭhin mahse tunlai chu tlarhma, a lai leh tlarhnungah United rawlthar rual an sapatal a ni ber mai. Rei an daih angem?

Palina nih tum Tottenham

Inkhelh ṭan hmain Tottenham manager Harry Redknapp chuan an tum ber chu palina nih a, Champions League khelhphak a nih thu a sawi. Zanina an game en kha chuan palina aia sâng a beiseiawm lem loh. Midfield ah an inpawtchawp deuh a, lo hrethiam ta ila, striker pakhat chu an lei ngei a ngaiin a lang. Winger chu an nei ṭha ngei, mahse goal hi a sirah a awm lo a, pet goal tur chuan a laia ball lakluh a ngai. Hetah tak hian a sir aṭanga ball chhuak lo dawngsawng tur striker chak, penalty box vela tal na thei tur an lei ngei a ngai ang. Adebayor?

Season bul an ṭan ve chauh a ni a, game an la khel tlem a, an player ṭhate an la kim lo tih erawh kan hriat a ṭha awm e.

Man of the match

Danny Welbeck kha en kân a har viau mai a, mahse ka mitah chuan Wayne Rooney tluka khel ṭha leh ṭangkai an awm lo. Tottenham midfield leh defence inkarah khelin a thiamna leh nuam a tihna ber, No 1o position aṭangin United move tamtak bul a ṭan a, a teammate te tan ball ṭha tak tak a siamchhuak nasa. Goal a thun a, tun season ah United innghahna ber a ni leh ngei ang.

Manchester khaw club pahnih te chuan point 6 ve ve an hmu ta a, May thla-ah tu tak in point hmu hnem zawk ang i maw?