Inrini zan BPL inkhel ah Manchester United chuan Fulham lo mikhual in 3-2 in hnehna an chang a, season bul tan fuh lo United tan an chak hi a lawmawm a. Chutih rualin season bul tan fuh Fulham in draw tal an hlawhchhuak thei lo erawh an ui khawp ang le. He inkhel ah hian United tân an ‘new-comers’ Robin van Persie leh Shinji Kagawa te’n goal an thun a, Rafael da Silva chuan an goal thumna a thun ve bawk. Fulham tan Damien Duff chuan an goal hmasa ber thun in, an goal hnihna erawh United captain Vidic-a ‘khilai’ a ni. He inkhel hi game tang lutuk leh hmuhnawm tak ni lo mahse, goal a luh tam avangin mit a tlai kher mai.

Tute nge khel?

Man Utd: De Gea, Vidic, Carrick, Rafael, Evra, Anderson (Giggs 80’), Cleverly, Young (Welbeck 67’), Valencia, Kagawa (Rooney 67’), Van Persie.

Fulham: Schwarzer, Hangeland, Briggs, Hughes, Riether, Duff, Diarra (Baird 80’), Kacaniklic (Sidwell 61’), Petric (Rodallega 71’), Ruiz, Dembele.

1^st half- Bul tan fuhlo United an vul

Manchester United lamin an starting eleven an thlak danglam nual a, Everton an hneh loh tuma a lai leh tlarhma lama khel rawn siksawi in, Wayne Rooney pawh bench ah a thu! A aiah Van Persie rawn lutin, tlar hnung lam erawh Everton lama mualpho tawh ‘defence phuahchawp’ bawk an rawn hmang leh. Fulham lam in Norwich lama an lo hlawhtlin pui tawh squad ngai deuh chiah an rawn hmang ve thung.

Inkhelh tan atanga reilote ah Carrick chuan Petric chu box pawn chiah ah titlu in, Bryan Ruiz chuan freekick fing tak a pet a. Duff chu pass in ani hian chiang zetin United goal lamah a thun. Old Trafford ani a, a mual neitu lam zawk an hawihai hman hle. Mahse United an buai rei lo a, game rawn thunun chhunzawmin minute 10-na lek ah an si phurh an rawn sut nghal. He goal hi United-in Arsenal fachuam an laksak, Van Persie chuan mawi tak mai a volley lut in a ‘class’ diktak a rawn pholang chiang hle mai. Hemi hnu hi chuan United lamin game an thunun chhunzawm a, chumi rah chu seng in Cleverly-a shot tha tak mai chu Schwarzer chuan a lo dang per a, he ball per hi hnai set sawt atangin Kagawa chuan thun ve leh in, 2-1 in mual neitu lam in hma an hruai ta der mai.

Hemi hnu lawk hian Kagawa bawk hian goal a thun leh thelh a, goal ban a per hlauh. Minute 40-na ah Young a cross tha tak chu United full-back Rafael chuan tauh lut leh in, United 3-1 in hma  an hruai. Fulham in hun tawp dawnah goal hlauhawm rawn nei ve leh in, Petric leh Duff a shot tha tak tak te chu De Gea-in alo dan sak a, United in counter attack atangin goal an chhuah teuh kher mai.

2^nd half- United defence an talbuai thelh

2^nd half tan atangin United bawk in game an thunun chho a. A laiah Kagawa leh Cleverly ten ball an sem hnem a, United game khelh thin dan pangngai in a sirah ball an pe tam mawlh mawlh khawp mai. Mahse hei hi minute 63-na ah a thleng. Matthew Briggs-a’n United box a ball a cross ‘naran’ ve mai chu lo lak tumin De Gea leh Vidic an lo tlan chhuak a, mahse Vidic chuan an lamah a kheng goal ta!. Vidic leh De Gea a hnung lama an la inman loh zia an rawn pholang chiang kher mai.

Hemi hnu hian Fulham lam an rawn khel tha chho tan a, Fulham tana zanin a khel tha ber tih ngam Moussa Dembele chu a hnawksak in goal pawh a thun teuh hle. United lam in Rooney, Welbeck leh Giggs te rawn luh tir in, Rooney hian United game a rawn chawikang ve leh deuh a. Mahse hun tawp dawn lamah Rooney hi a malpui dinglam an rah thler sak a, zawn chhuah hial a ngai. Hun tawp hamrik ham hma deuh in Ruiz tauh goal tur chu De Gea bawk chuan lo dan sakin, goal dang luh belh tawh lo in 3-2 in an in thathen ta a ni.

Inkhel tlipna leh duh duh sawizuina..

United in an game pangngai an rawn chhawpchhuak a, Fulham lam an game-ah an luh tir hmanlo ani ber. A sir ah Valencia leh Young te’n ball an tlanpui tam a, full-back Rafael a khel tha thlawt a, goal hial a thun anih kha. Cleverly United game-ah a in siamrem leh tawh tih a alang a. Borrusia Dortmund atanga an lak thar, Kagawa pawh BPL a khel atan a tlak zia kan hmu leh a, chutih rualin Van Persie erawh ala in ‘settle’ fello deuh a tih theih. Amaherawh chu hepa hi United game a a luh ve tak tak theih hun chuan a tawrhhlelhawm leh viau in a rinawm.

Chutih rualin an defense ‘phuahchawp’ erawh en a hahthlak a, midfielder Carrick bawk Centerback-ah hmang in, zaninah an tuar leh thelh. United tlar hnung in nghahna Vidic-in match fitness ala neih tam loh zia alang a, season hmasa chhung deuh thaw chawl anih avang in De Gea nen tlar hnung lamah anla inman lo a tih theih. Fulham kha khelh thalo mahse an goal nawr chhun ah United an chhiah buai thei a, tlar hma lamah Petric a hnawksak a, a lai leh a sir lamah  Dembele an veng hneh lo tluan zak kha in en letna tham chu ani khawp ang. Hun tawp dawn a Fulham-in draw tal an hlawhchhuak zo lo kha chu an ui ngei ang le.