Kum 23 a upa, Japanese midfielder Shinji Kagawa chuan Zirtawpni khan Manchester United a zawmfel ta a, medical test a paltlang a, UK work permit pawh nei tawhin, Man United ah hian kum 4 chhung atan contract a ziak a ni.

Manchester United manager Sir Alex Ferguson a lawm a. “Shinji hi midfielder naupang hmuhnawm tak a ni a, a mit a fing a, goal a thun thei bawk a, United a luh a thlang hi ka lawm hle a ni. A khelhdan hi United khelhdan nen a inhmeh em em a, chuvangin insiamrem nan hun tam a mamawh ka ring lo. Player pawimawh tak a nih nghal ka ring hial zawk a ni. He club nena inkungkaihna nei te chuan thawhpui kan chak tawh hle a ni.” tiin manutd.com a hrilh.

Kagawa hi June thlatirah Manchester United chuan an lei tawh a, mahse UK work permit a neih loh avangin tunah hian ‘official’ takin an puang thei chauh a ni. Kagawa hi Japan ah a chhungte leh ṭhiante hmu turin a haw leh phawt ang a, July thla tirah a teammate thar turte nen an inhmu dawn a ni.

Borussia Dortmund midfielder pawimawh, Manchester United midfielder ni mai tur Kagawa a phur tawh a. “Hei hi ka tân chona lian tak a ni a, ka nghakhlel tawh hle a ni. Premier League hi khawvela league ropui ber a ni a, Manchester United hi club lian tak a ni bawk. Ka tân chuan he hun hi a hluin a phurawm a, ka teammate te hmuh a, inkhelh vat vat ka chak tawh hle a ni.” a ti.

Kagawa hi season thar atâna Manchester United in player an lei zingah chuan a thawm lian ber a la ni rih a. Midfielder ball thiam leh goal thun thei mamawh em em Manchester United hian engtiang chiahin nge an ṭhatpui ang tih hmuh a chakawm tawh hle mai.

Shinji Kagawa

Birthdate: 17 March 1989
Position: Midfielder
Previous clubs: FC Miyagi Barcelona, Cerezo Osaka, Borussia Dortmund
International team: Japan
Debut: 2008
Appearances: 33
Goals: 11

source : www.manutd.com