Nizan lama Manchester United leh Liverpool inkhel tur chu United tantu ten Old Trafford a buaina an siam avangin inkhelh hun sawn hlat (postpone) a ngaih phah a. Fans tamtak lungawi lote hi an lungawi loh chhan ber chu Manchester United neitu Glazer chhungkaw lakah a ni. He an buaina hi tunhnai maia rawn irhchhuak a ni lo a, kum tamtak fans lungawi lohna hi inmung tawhin nizan khan a rawn puak darh a ni ber. Fans lungawi lohna avanga inkhel tur sawn hlat a ngaih hialna leh, buaina tenau a chhuak kha mi tamtak thlirna atang chuan an demawm a, mahse kaw’nge thlirna tlang dang atangin I han thlirpui ve teh ang.
BUAINA KAIKUANG CHU
A chehpakai atang chuan an buaina hi 2005 kuma thil thleng kha a ni. American sumdawng hausa Malcom Glazer chuan Manchester United neitu nihna (shareholder) chu 2003 atanga lei tanin, kum 2 hnu, 2005 alo thlen meuh chuan Manchester United neitu nihna zawng zawng deuh tho neiin, 98% ownership a nei der tawh. He American pa hausa hian hetia United neitu nihna a pumbilh takah chuan United chu ‘public limited company’ an ni thei tawh lo a, mimal ta anih tawh avangin London Stock Exchange-ah pawh an shares zawrh leh hralh a theih tawh loh a ni.
Malcom Glazer-an United a lei hian ama iptê atangin a lei reng reng lo a, a sum leh paite chu dahtha in ‘loan’ leh ’hedge funds’ hmangin United kha a lei a ni. Glazer-a hian £660m vel a puk nia ngaih a ni a, heta a puk hi a pung a sangin United hian a pung ringawt pawh kum tin £62m lai an pek a ngai ta a; chu chu an ba tamtak bul intanna chu a ni. Kum 2010 a lo nih meuh chuan club ropui Manchester United chuan ba rulh tur £716m lawih an nei der tawh! I thenawmpa in I hlawh atanga I rulh turin car loan la se, amahin car chu nei daih bawk si se; chutiang chiah chu a ni an kalphung chu.
Chu mai la ni loin, Malcom Glazer a boral khan a fate 6 ah a shares te hi a sem darh a. Club-in hlawkna an neih a an shareholder te hnena an sem/pek thin ‘dividend’ pawh Glazer chhungkua hian an pumbilh zel a, United hian ba an neih teuh lain Glazer chhungkua hian hlawkna an nei reng thung si. The Guardian-in a report dan chuan United hian bank loan rulhna leh Glazer chhungkaw hnena ‘dividend’ an pek tawh zawng zawng hi £1 billion a chuang var var tawh- pui tak a ni! Hemite chhungkua hian anmahni sahmîm hampuar nan chauh United hi an hmang a ni atih loh theih loh a, chu chu club thatna chauh duh fans-te tan lungawina chi a ni lo reng a ni.
-Zama RK
