MANCHESTER UNITED FANS BUAINA KHA- PART 3

ENG NGE AN DUH BER?

Manchester United club hi mi pamhamte sumdawnna tual ni lo se tih chu an duh leh auhla ber a ni. Fans te hian an thenawm club Manchester City leh an elpui Chelsea neitute chet dan an hmu ve kar a. City neitupa Sheikh Mansour bin Zayed hian 2008 a Man City a lei atangin a club tan hian £1.45 billion vel a seng tawh a. Tin chutiang chiah chian Chelsea neitupa Roman Abramovich paw’n 2003 atang khan £1.17 billion chuan a seng tawh niin an chhut bawk. Club neitu hausa leh club tana sum sen ui lo neite dinhmun chu sawi ngai loin an hmu vek a, United club neitute erawh anni ve hauh si lo. An hmangaih club tan an rum a, an au chhuak a ni.

Fans lungawi lote hian ‘50+1 ownership rule’ hman ve an duh a, Germany BundesLiga lamah hman mek a ni. He dan hian club neitu niha 51% chu an club member (fans) teah a pumpek a. ‘Voting rights’ an neih len ber avangin club thutlukna pawimawh zawng zawngah thu an nei a, anni remtihna lo chuan club-in an duh duh an ti ngawt thei lo a ni. Hei hian investor liante leh mihausa club pumbilh tur a dang a. German Football League dan chuan club neitu niha mimalin 49% aia tam a neih chuan League (BundesLiga) an khelh a remti lo a ni. Mimalin sumsiam nan a club an hmang tur a veng a ni ber. 50+1 dan avang hian BundesLiga lamah chuan ticket man sang pui puite a awm ngai lo a, fans entu an tam renga, fans ten an duh zawng zawng banner te pawh an tar chhuak thei a ni. Tin player hlawh sang, transfer man to uchuak turte vengin club thatna tur bera an ngaihin an kal mai thin. That lohna pawh anei tho nachungin tunah erawh kan thai lang rih lo ang.

He dan hi England lama hman ve anih beiseiin an auchhuahpui a. Fans-te hian club-ah thuneihna sang zawk neih ve hi an duh a ni ber. United bakah Newcastle United chu auchhuah puitu an ni. Hlawhtlinpui thei tak maw? Kum 2010 khan United tantu hausa tak tak intelkhawm “The Red Knights” an tihte chuan Manchester United hi Glazer chhungkaw laka atanga leichhuah tumin hma anlo la ve uk tawh a. Mahse khatih laia an ba leh an Glazer chhungkua an pek tur belhkhawm kha £2 billion chuang an chhiar vangin an lei leh ta lo ni a sawi a ni.

English club ropui berte zinga mi Manchester United hian enge an tawn zel dawn a hriat loh a, an fans te lungawi lo hian buaina an chawkchhuak zel dawn em chu a hriat loh. An captain hlui pahnih Gary Neville leh Roy Keane te chuan an fans-te an thlawp thu an sawi ve bawk a. An kalzel dan tur chu hunin ala hril zel ang chu.

-Zama RK