Manchester United Foundation leh Manchester United Supporters’ Club Mizoram te’n tanpuina hlan

Manchester United Football Club hnuaia mi Manchester United Foundation leh Manchester United Supporters’ Club – Mizoram-te chuan, vawiin ni 14, November 2020 (Inrinni) chawhnu khan TNT Muanna veng hnenah tanpuina Rs 50,000/- (Singnga) an hlan.

Inhlanna inkhawm tawi hi TNT – Muanna vengah neih niin, MUSC-Mizoram hruaitu Pu Jonathan Zomawia’n a kaihruai a, MUSC-Mizoram Adviser Pu TBC Lalthatluanga chuan tanpuina ‘Cheque’ hi TNT General Secretary Pu Malsawmtluanga hnenah a hlan. Hemi rual hian MUSC-Mizoram in 2021 Calendar an buatsaih chu Pu Biakvela, TNT Vice Chairman-in a tlang zarh nghal bawk.

Jonathan Zomawia chuan, ‘Manchester United Foundation lamin naupang nu leh pa neilo tanpuina tur kan ram tan £ 500 min pe lawmawm’ a tih zia sawiin, ‘hmunpui lam nen mumal zawka inzawmna nei turin leh nasa zawka support turin hmalak chhoh zel a nih thu’ a sawi bawk.

Pu Malsawmtluanga, TNT-Gen. Secy chuan, ‘khawvela football club lian leh ropui ber pawlin, India ram hmar chhaka cheng, keini hial ‘tanpuina min rawn pe’ hi kan lawm tak zet a, chumi tura theihtawp chhuahtu MUSC-Mizoram hmalakna fakawm a ti a, an kal leh zelna turah duhsakna a hlan a, Manchester United FC leh MUSC-Mizoram thawhhona avanga sum leh pai thahnem tak an dawn chu, TNT tan Pathian malsawmna ‘ a nih thu a sawi bawk.

MUSC-Mizoram Calendar 2021 tlangzarh tu Pu Biakvela, TNT Vice Chairman chuan, MUSCM-Mizoram leh Manchester United FC hmalakna chhuanawm a ti tak zet a, calendar tha tak an siam thei chu a fak hle. (TNT hnenah hian MUSC-Mizoram 2021 Calendar hlan nghal a ni)

Manchester United Foundation hi Manchester United FC hnuaia tanpuina lam buaitu niin, 26 Sir Matt Busby Way, Old Trafford, Stretford, Manchester-ah Office an nei a, charity mai bakah Football zirtirna thlengin an kal pui. MUSC-Mizoram hi kum 2019 khan din chauh niin, Manchester United Football Club hnuaiah ‘Affiliated Recognized Supporters’ Club’ niin, ‘Manchester United Supporters’ Club – Mizoram’ tih a ni a, Old Trafford atanga hriatpui leh pawmpui an ni.

Kum khat vela upa chauh an la ni chungin Old Trafford atang pawhin hriat an rawn hlawh tan der a, an foundation kaltlanga tanpuina dawng tura thlan an raw ni nghalte hi, MUSC-Mizoram mai bakah Mizoram mipui zawng zawngte tan pawh thu lawmawm tak a ni.

Thil dang :
1. MUSC-Mizoram 2021 Calendar Order a zawh nghal avangin a dang order belh leh nghal a ni a, tuna la chang remchang lote pawh lo nghak hram turin an inngen .

2. MUSC-Mizoram Official Member Drive kumin chhungin neih a ni dawn a, Mizoram chhunga Manchester United tantu zawng zawngte member ni vek turin an insawm a, Offical page
FB – https://www.facebook.com/mizooldtrafford/
Instagram – https://instagram.com/musc_mizoram?igshid=12u8irfw8noyp
Twitter : https://twitter.com/UnitedMizoram?s=08 ah te hian ngaihven theih a ni.

3. Mizoram Football-in hma a sawn theihna tur kawngah pawh theihtawp chhuahin hmalak an tum a, hemi kawngah pawh hian hmunpui lamte pawh a theih ang angin dawr chhoh zel an tum.