MANCHESTER UNITED HAN ZIR CHIANG ILA

ZoFooty #FootballKaida

MANCHESTER UNITED HAN ZIR CHIANG ILA
Ole Gunnar Solskjaer-a hun chu a in ṭan ta a, kum hnih leh a chanve chhunga nomawi a chawi lo chungin Manchester United thuneituten Norwegian manager hi an la ring tlat.

An ring tih nemnghehna chu nipui bazara an sum hman danah a ni a, Solskjaer hi a duh tak Jadon Sancho an lakluh sak a, centre back tawnhriat nei ṭha Raphael Varane bakah club legend Cristiano Ronaldo te an laksak.

NOMAWI NGE BAN?
Kum 48 mi Solskjaer hian July thla khan kum 2024 thleng a tan contract a pawtsei. Man United-in Norwegian manager contract thar an ziahpui hian Sancho an lei fel tawh a, Varane nen sawizawm an la ni chauh a, Ronaldo erawh sawi rik a la ni lo hrim hrim.

Contract thlir mai chuan Solskjaer hian result pawh nei ṭha lo se tun hnaiah mai chuan ban theih loh angah a ngaih theih a, mah se football kalphung chu a dang tlat. Entirna ṭha tak chu Chelsea-in an club legend Frank Lampard chunga thutlukna an siam dan kha a ni thei ang. Lampard hi player lak nana sum a hman hma zawngin a chungah Roman Abramovich leh a hote an dawhthei hle.

Amaherawhchu nipui bazara pound maktaduai 200 chuang a hman chiah chuan dawhtheihna leh zahngaihna a awm tawh lo. January 25, 2021-ah Lampard an ban a, Thomas Tuchel an lalut ta zawk. A tirah chuan Chelsea ṭantu ṭhenkhatin Lampard an chhan a, hei thla kua em pawh a ral hmain Roman Abramovich a thutlukna chu an fak ta zawk. (Chelsea chungchang chu post dangah rawn ziah kan tum dawn nia)

Chelsea-in club legend Lampard chunga zahngaihna an lantir lo a, Champions League final-a goal pawimawh khungtu Solskjaer chungah pawh Man United hi an dawh theih bik ring suh.

Chutihrualin Man United-in nomawi an chawi loh chuan Solskjaer hi an ban ngei dawn tihna a ni lo a, nomawi an hnaih dan a zirin an banin an ban lo ang.

INPUAHCHAHNA LEH TRANSFER
Manchester United-in transfer hun an hmang ṭha a, hemi kawngah hian fan-te pawhin hna an thawk ṭha. European Super League boruak a rawn rik khan Man United ṭantuten nasa takin an sawisel.

ESL-a tawp ta mai lo chuan club neitu Glazers leh chairman Ed Woodward te an bei tel a, Covid-19 boruak karah training-na bakah stadium chhungah an lut hial. Liverpool nena an inkhel tur thlengin an tih tlai phah a, Man United ṭantute an uchuak mah mah tih a awm.

Tunah erawh a rah an seng a, club neitu Glazers-a’n United ṭantute tih lawm tumin nipui bazarah sum a thehchhuakah a ngaih theih. Man United ṭantute defensive midfielder an lak loh avangin an lawm a kim lo a, chutihrualin an player lakluh pathumte hi an hraw em avangin transfer-ah an lungawi hle.

Transfer hmang ṭha mah se Man United hian Covid-19, Euro 2020 leh Copa America vangin inbuatsaihna an nei ṭha tawk lo. Friendly match hmasa bera Derby County 2-1 a an hneh ṭuma bul ṭantute zingah Mason Greenwood leh Aaron Wan-Bissaka te chiah rinrawl ni pha an awm. Player pawimawh chin, ram tana khel pha ho chuan chawlh an la hmang vek.

QPR an hmachhawn leh a, 4-2 ngawtin an tlawm. Premier League kai thar Brentford nen 2-2 in an inhnehtawk leh a, Greenwood leh Wan-Bissaka te bak squad pumpuiah rinrawl ni pha an awm lo.

Covid-19 vangin Preston nena an friendly match khelh tur chu ṭhulh a ni a, August 7-a Everton nen an inkhelh ṭumah erawh first team tiha chhiar theih an ni ta. Old Trafford-ah 4-0 ngawtin an chak, mah se season ṭan hmaa vawi khat chauh friendly match neih chu an kham khawp ngang lo. Season ṭan hnuah Burnley nen friendly match an khel leh a, 3-1 in an chak.

TEAM NGAI BAWK
Man United player thar Sancho, Varane leh Ronaldo (ani phei chu an la fel hman lo hrim hrim) ten season ṭan hmain training an zawm mumal hman lo a, transfer laia lawm em em Man United chuan team ngai bawkin bul an ṭan.

Solskjaer-a hoten an hmelma Leeds United chu Old Trafford-ah 5-1 in an sawp a, Man United ṭantute champion khawsakin an khawsa ṭan der. Chutihrualin Marcelo Bielsa thutlukna tihsual leh Raphinha chance hlah te hmuh hmaih chuan an chakna zat hi a tam ve bawk a ni.

United hi an khel ṭha ve reng reng bawk a, midfielder pahnih Bruno Fernandes leh Paul Pogba te chuan an khelh ṭhat ber ṭum a tawng. Hei hi thil thleng rual zen zen lo a ni a, a thlen rual miau chuan Leeds United tan chuan dan chi rual a ni lo.

A TAK RAM CHU
Manchester United phur chhung chuan kar khat awrh a daih a, St Mary’s Stadium-ah dawl zawrin an zawr a ni ber. Champion khelh dan tur taka khel team kha Southampton hmaah chuan Europa League pawh khel tlak lo khawpin an khel chhuak.

Solsjkaer-a’n Anthony Martial leh Nemanja Matic bul a ṭantirte chu a tihsualna laiah a ngaih theih a, Leeds United nena khel ṭha McFred (McTominay leh Fred) an tih mai, an inkawp nawn lo chu chhan pakhat a ni thei bawk.

United-in khelh ṭhat loh niah Mason Greenwood hmangin hnehna an chang hram. Point thum hmu phu Saints-in point khat chauh an hmu a, Man United erawhin an point hnih hloh ui viau mah se a tak takah chuan point khat an hmuh avanga lawm tur an ni.

CHAMPION ZIA
Mizoten champion zia an tih ṭhin chu khelh ṭhat loh nia point thum hmute hi an ni a, Manchester United-in Wolverhampton hmaah an lantir. Molineux Stadium-ah Wolves-in Adama Traore leh Francisco Trincao te hmangin Man United an ching phar a, a tawpa chak zawk erawh mikhual team an ni.

Man United tan Greenwood-a’n goal awmchhun a khung a, player langsar ber erawh David de Gea a ni thung. Spanish keeper hian Wolves goal khung tur a dansak hnem hle.

Solskjaer-a nauten team naran khelhin an khel a, first half an khelh zawhah phei chuan club legend Roy Keane-a’n Ronaldo chuan hmu se, a ngaihdan a thlak duh hial ang, tiin a club hlui khelh dan chu uar takin a sawisel.

Man United ṭantute Fred-a chungah an lungawi lo a, Brazilian midfielder hi team tichhetuah an puh a ni ber. Transfer hun a la tawp si loh avangin Man United-in defensive mifielder thar a la dawn tih thawm a rawn awm nghal a, Ruben Neves hming te pawh sawi rik a ni. Chutirualin United hian transfer tawp niah player la ngat se ‘Panic Buy’ tih huang chhungah a dah thei ngei ang.

Premier League inkhel dang thlir chuan Manchester City, Chelsea leh Liverpool te chu champion khelh dan tura mawiin an khel thung a, heng club ṭha pathum chungah Man United hi an awm mek avangin tun ṭumah pawh hian kan belchiang dawn a ni.

GOAL VENGHIMTUTE
Manchester United tlarhnung a ṭha tawk, positon lian hlawm pathum defence, midfield leh forward-ah helai hmun hi an ṭhatna ber a tih theih ang. Dean Henderson-a’n Covid-19 a kai avangin tawnhriat nei ṭha zawk David de Gea-a’n dinhmun a sawhnghet thei a, Spanish keeper hi a chet ṭhat vanglai chuan khawvel keeper ṭha bera chhal theih a ni hman. United ṭantute duhthusam tur chu De Gea hian a vanglai hmang nawn se tih hi a ni ngei ang.

Euro 2020-ah khan Harry Maguire ṭhatzia a lang a, innghahna tlak a ni. Man United captain Maguire leh Varane te hi an inkawp fuh a nih ngat chuan Nemanja Vidic leh Rio Ferdinand te vanglai elpha thei turin theihna an nei a, an inkawp hmasak berah goal an chhuah lo.

Alex Telles awm hnuah Luke Shaw a ṭha lehzual a, Brazilian left back tan khelh phak a har tawh dawn. A chhan chu Shaw hi khawvel left back ṭha ber zingah a tel pha tlat tawh. Chutihrualin Aaron Wan-Bissaka erawh England right back-ah pangana a ni pha chauh a; Kylie Walker, Keiran Trippier, Reece James leh Trent Alexander Arnold te an awm.

Crystal Palace aṭanga Old Trafford zawmtu Wan-Bissaka hian attacking-ah hma a sawn thei a nih chuan Man United-in right back thar zawng miah loin hun rei tak an chhawr thei ang. A tawi zawng chuan Man United tlarhnung hi champion pui tham a ni.

DEFENSIVE MIDFIELD
Man United ṭantute rilru tibuaitu chu defensive mifielder ṭha an nei lo hi a ni a, Fred-a chunga rinna nghah hi har an ti. Scottish midfielder Scott McTominay a danglam tam lo. Player pahnih hi an thawkrim a, amaherawhchu neih loh an nei tih chu zep rual a ni lo.

Chutihrualin McTominay hi Scotland chhuanvawr a ni a, Fred hian Brazil coach Tite-a mit a tlung viau bawk. Man United hian midfield laia khel thei dang Donny van de Beek, Paul Pogba, Bruno Fernandes, Juan Mata leh Nemanja Matic te an kawl bawk avangin Solskjaer chungah thui tak a innghat a tih theih.

Defensive midfielder ṭha neih loh vangin Man United ṭantute lawm a kim lo a nih pawhin Solskjaer-a tan erawh chhuanlam siam a thiang lo. A player kawlte hi ram/club khat star ni tawhte leh ni mekte an ni a, a hman thiam a pawimawh a ni.

GOAL NAWRTUTE
Cristiano Ronaldo chanchin ringawt hi a hrana ziah tham a ni a; Edinson Cavani, Mason Greenwood, Marcus Rashford, Jadon Sancho, Jesse Lingard te an awm avangin goal khung tur chu a nei ṭha a, Bruno Fernandes hming a la lamrik thei cheu bawk.

Sancho hi a man a to avangin hmun pawimawh a chan a ṭul dawn a, a khel chinah erawh Borussia Dortmund-a a khelh ṭhin dan nen a la inthlau rih hle. Rashford erawh inhliam vangin chhawr theih a ni lo a, Greenwood-a’n season bul a ṭan ṭhat avangin Rashy inhliam hian sawi a hlawh lo thung.

West Ham tana khel ṭha Lingard-a’n England tan goal hnih a khung a, assist a neih tel bawk avangin Solskjaer tan en kan reng a rem dawn lo. Uruguayan striker Cavani-a’n a jersey number chu Ronaldo kian mah se khelhna hmun erawh chuhpui a tum dawn a, Solskjaer tan duh thlan thiam a har dawn hle.

A TLIPNA
A thupuia lut si loin kan khal kual rei ta, a tawp siam a hun tawh – a thui lutuk dawn. Tihian han khaikhawm dawn teh ang.

a) Cristiano Ronaldo : Manchester United-in Portugal captain hi an club zahawmna humhim turin an laklet a ṭul a, an mamawh tel bawk. Ronaldo hi inelna sang ber khel tawh a ni a, a tawnhriat bakah a rilru put hmang hi Solskjaer-a hoten an mamawh chu a ni. Ronaldo hi tun hnaia a goal khung dan thlirin khelmualah pawh a pawimawh dawn a, Real Madrid forward hi Man United-in an ṭhatpui ngei ang.

b) Ole Gunnar Solskjaer : Norwegian manager hi che chhe lo mah se Man United-in kum hnih leh a chanve chhunga nomawi an chawi loh chhanah mawhphurtuah a ngaih theih. Solskjaer hian hun pawimawhah thutlukna a siam sual fo a, a elpui dang Pep Guardiola, Thomas Tuchel leh Jurgen Klopp te hi tun dinhmunah a tluk lo. Hemi a nih avang hian nomawi chawi tura dah an harsa a, chutihrualin squad kimin an la khel tlat lo. Ronaldo-a’n team boruak a nghawng dan te han thlir phawt loh chuan ngaihdan mumal tak neih a la harsa a ni.