Manchester United chuan Old Trafford-ah Turkish champion Galatasaray lo mikhualin 1-0 in an lo hneh a. Goal awmchhun hi minute 7 naa Michael Carrick thun a ni.

Tute nge khel?
Manchester United: De Gea; Rafael, Evans, Vidic, Evra; Valencia, Carrick, Scholes (Fletcher), Nani; Kagawa (Welbeck), Van Persie (Hernandez).

Galatasaray: Muslera; Dany, Hakan Balta, Semih Kaya, Eboue, Hamit Altıntop, Selçuk İnan, Felipe Melo (A Yılmaz), Amrabat (Emre Çolak), Burak, Umut Bulut (Elmander).

First half : Bul tan tha United-in goal an thun hmasa
Old Trafford-a inkhel hmuhnawm takah home team lam hian bul an tan tha a. Midfield-ah Michael Carrick leh Scholes te’n ro an rel a. Minute 7 naah midfield play mawi tak neiin Michael Carrick chuan a pet goal a. Old Trafford-ah thawm a tha kher mai.

Hemi hnu lawk hian Galatasaray lam hian an siphurh an sut teuh hle a. Striker Amrabat chuan goal bar a pet per a. Minute 14 naah Galatasaray striker Bulut a inhliam a, Elmander chuan a rawn thlak nghal a ni.

United lam hian chance an ngah chhunzawm zel a. Van Persie leh Valencia te’n half chance an nei leh thin a. Mahse Galatasaray erawh counter attack-ah an hlauhawm thei hle. Felipe Melo leh Altintop hmangin an siphurh an sut teuh hle. Goal dang a luh belh lova. 1-0 in first half a tawp a.

Second half : Penalty pet thiam lo ‘United’ !
United lam bawk hian bul an tan tha leh a. United midfielder te’n an kheltha tak zet a. Carrick, Scholes, Valencia, Nani leh Kawaga te ball play a hmuhnawm thei hle. Galatasaray paw’n Altintop leh Amrabat hmangin half chance an nei zeuh zeuh bawk.

Minute 52 naah United lamin penalty an hmu a. Nani rawn penchhuakin, keeper Muslera chuan mawi zetin a lo save sak a ni. Mikhual team an phur thar a. An innawrtawn zak zak a. Clear chance hmuh tur erawh a awm meuh lo.

United lamin Vidic leh Evra hmangin goal an thun teuh hle a. Galatasaray striker Altintop vanneih zan chu nise goal a thun ngei ang le. Bench atanga rawn lut Yilmaz paw’n a pet goal teuh hle a, mahse United keeper De Gea chuan a lo dang hman hlauh a ni.

Injury time-ah United lamin goal an thun teuh hle a. Nani chuan bench atanga rawn lut Hernandez tan ball tha tak a pe a mahse Muslera chuan a lo dang hlauh a ni. Goal dang a luh belh tawh lova. Thla 8 hnua Carrick-a goal hmangin United an chak ta hram a ni.

Sawi zui ang
* United lam hian penalty an pet goal thei lo hle a. Van Persie, Hernandez leh Nani te chuan an pet goal lo vek a. Rooney dam se chuan a pet ngeiin a rinawm.

* United hian rinrawlah Carrick leh Scholes hi an la hmang chhunzawm zel chu a ni a, thlak tu tur hi an mamawh tak zet a ni. Cleverley leh Anderson hi an tha tehmeuh mai, mahse duh angin tawnhriat an la ngah lova. Big match-ah an rintlak ang em tih hi zawhna lian tak a ni.

* Nizan khan Sir Alex Ferguson hnuaia Manchester United vawi 100 chakna chiah a ni. Anni tih lovah chuan Real Madrid chiah hi vawi 100 chak thei an ni.

* Galatasaray player Johan Elmander hi Bolton Wanderers player hlui a ni a, Bolton tan Old Trafford-ah hian vawi 2 a lo inkhel tawh a ni.

* Manchester United leh Galatasaray vawi 5 intumna chiah a ni a. United hi vawi 2 chakin vawi 3 an in draw tawh a ni. United chak hnuhnun ber chu December 1994 daih tawh kha a ni a. United hi 4-0ngawtin an chak a. David Beckham-a chuan United tana a goal hmasa ber a thun nghe nghe.

* Galatasaray hian English club hi an ngam lo hle a. Vawi 16 tum tawhin vawi 2 chiah an la chak a ni.

* Galatasaray Manager Faith Terim hi Galatasaray player hlui niin Galatasaray-in English club an tum hmasak bera goal thuntu a ni. 1978 daih tawh khan West Brom nen an lo intum tawh a ni.