#ZoFooty #Rewind #August #2006
August 2006-a thilthleng kha August 2021-ah kan thlir let leh lawk ang.
Manchester United Premier Cup World Cup 2006 chu Manchester United in thlengin India atangin Mohun Bagan U-15 chu an tel ve a. Hemi tum hian Mizo footballer pathum ngawt telin chungte chu B.Malsawmzuala, David Lalrinmuana leh Lalrozama Fanai te an ni.
Sawmtea hi Aizawl FC leh Luangmual FC Captain hlui kha niin David Lalrinmuana pawh hi Aizawl FC Captain hlui tho kha a ni a, Lalrozama Fanai pawh hi Aizawl FC bakah Chanmari FC leh Chhinga Veng FC ah te a lo khel tawh bawk. State pawn lama an khelhna erawh tarlang tawh lo mai ila.
He inelna hi khawvela club țhate inelna niin club 20 te chu group pali ah țhen an ni a, Mohun Bagan U-15 hi Group A ah Săo Paulo (Brazil), Manchester United (England), Athletic Bilbao (Spain) leh Ferencvarosi TC (Hungary) te nen an awm ho a ni. Mohun Bagan U-15 hian hneh an nei lova, mahse Mohun Bagan U-15 tana goal awmchhun thuntu erawh Mizo rawlthar a ni thung.
Manchester United nen an inkhelh țumin Mohun Bagan U-15 hian goal an thun hmasa a, he goal hi David Lalrinmuana (Papuia) thun a ni. David-a hi Indian footballer zinga Manchester United lama goal thun thei awmchhun anih a rinawm, a level chu engpawh ni se. Nimahsela, United lam hian an siphurh rawn sut zovin 4-1 in United hi an chak thung a ni.
Mohun Bagan U-15 hian he tournament khel tur hian qualifying final ah East Bengal hnehin India champion an ni a, Asian Zone qualifier Thailand-a khelhah Singapore School hneh lehin an in pet tling. Chutiang bawkin club dangte pawh zone hrang hrangah inthenin qualifying hi an khel a, European Zone bika best player phei chu FC Basel player, tuna Liverpool player Xherdan Shaqiri hi a ni nghe nghe.
He inelnaah hian CD Guadalajara (Mexico) chuan final ah 2-1 in Arsenal an hneh a, an champion a ni. Arsenal squad ah hian Jack Wilshere (AFC Bournemouth), Luke Ayling (Leeds United), Emmanuel Frimpong, Roarie Deacon, Benik Afobe leh Sanchez Watt te chu an awm a ni.
