Manchester United chuan Old Trafford-ah 4-0 in mikhual team Wigan Athletic an hneh a, point 9 hmuin table-ah pahnihnaah an inhlangkai. United tan hian debutant (vawikhat khelhna) pahnih Alexander Buttner leh Nick Powell bakah United tana vawi 700 khel tling chiah – Paul Scholes leh Hernandez te’n goal an thun a ni.
Tute nge khel?
Inkhelh hma chanchin
Season hmasaa United champion loh chhan pakhat kha chu Wigan Athletic hi an ni a. An inkhelh hnuhnun ber khan 1-0 in United hi an chak lova, an champion loh phah a theih awm e. Hei vang hian Sir Alex Ferguson leh a naute hian ‘phuba’ lak an tum hle a, chak an duh a ni. Chutih rualin Wigan lam pawh hian season hmasaa an hneh chhan kha an vanneih vang ni lova, an thiam vang a ni tih lantir an tum hle bawk.
United thiampuipa Rooney a la inhliam a. Top scorer nilai Van Persie pawh Hungary nen an inkhelh tuma a inhliam avangin 100% in a la fit chiah lo deuhva, bench-ah a thu a. Kagawa pawh a inhliam avangin a hmel kan hmu lova. Anni bakah Phil Jones, Chris Smalling leh Ashley Young te chu an la inhhliam a. Cleverley, Anderson leh Valencia te pawh bench-ah an thu a.Veteran Giggs leh Scholes-a’n midfield an hova. Left back Patrick Evra a inhliam avangin lak thar, Dutch defender Alexander Buttner-a hmel kan hmu bawk a. De Gea aia Lindegaard-a’n goal a rawn veng bawk.
Wigan lamah Antolin Alcaraz ala inhliam a. Maynor Figuero bawk defence laiah dah a ni a. Stoke City an khelh tuma inhliam Beausejour pawh dam leh tawhin James Mc Arthur pawh a dam tawh a. Hmatawngah Arouna Kone leh Franco Di Santo te bawk an awm leh a ni.
First half-ah United-in goal an thun thei lo !
Old Trafford-a mipui 75, 142 zet hmaa inkhelah hian United lamin bul an tan tha a. Minute 6 naah Danny Welbeck-a’n penalty sawihlawh tak a hlawhchhuak a. Replay-a a landan chuan penalty a ni lo niin a lang. Rooney leh Van Persie awm loh vanga penalty pet Hernandez chuan a pet goal lo tlat mai. Penalty chawitu, Wigan keeper Al-Habsi chuan mawi zetin a lo dang per a ni.
United lamin game an thunun zel a. Welbeck a kheltha a, mahse clear chance a nei thei meuh lova. Veteran Scholes-a khel (slide/tackle) a hlauhawm thei hle. Team pahnih te hian clear chance an nei thei lo ve ve a. Mahse home team United erawhin an nawr hle thung.
Wigan defender Ivan Ramis-a’n corner atang a tauh goal tep a, mahse a out hlauh a. United-ah hian tuntum chu player senior an tam hle a. Penalty thelhin goal thun thei lo mah se an chiai mai lova. Ferdinand, Vidic, Scholes, Giggs leh Carrick ringawt pawh hi thlamuanpui tham an tling a ni.
Wigan striker Arouna Kone-a’n half chance a nei leh zeuh thin a. First half tawp lamah Wigan hian counter attack atang an nawr let a, Arouna Kone bawk hian hnai tak atang a thelh a. Pet goal se chuan game a dang khawp ang le. Goal a lut lova, goal inpe lovin first half a tawp a.
Second half : Old Trafford-ah goal a sur !
United bawkin bul an tan tha leh a. Minute 51 naah Scholes hmangin goal hma hruai an thun a. Thawm a tha kher mai ! He goal hi Nani thawhrah a tih theih awm e. Nani ball luh pui niin box chhungah ball play mawi tak an neih hnuah a shot a, keeper Al-Habsi chuan lo dang perin Scholes hian a lo pet goal a ni.
Minute 63 naah debutant Buttner-a ball cross (shot) tha tak chu Hernandez-a’n a lo tawk pial zeuh a, chiang zetin a goal a. He goal hi Wigan offside trap siam sual vang a ni. Minute 3 hnuah United lam hian Buttner-a hmangin goal an thun leh a. He goal hi keeper tihsual vang chu ni tho mah se Buttner-a ball lakluh dan en khan a turu zia leh a class sanzia a tilang chiang viau awm e.
United hian Giggs lakchhuakin player thar, kum 18-a upa Nick Powell an luhtir a. Nick Powell hian minute 82 naah goal ropui a thun a. 20 yard atang mawi lutukin a pet goal a ni. United fans thawm a tha hle. Goal dang a lut tawh lova, 4-0 in Manchester United an chak a ni.
Sawi zui ang
* Goal hmahruai thuntu, kum 37-a upa Scholes “Chuai-thei-lova” chuan zanin khan United tana a match 700-na a khel chiah a ni. Tin, Rio Ferdinand tan zanin kha match 400-na, Ryan Giggs atan Premier League-a match 600-na chiah a ni ve bawk.
* United hian tihian match 4 khel tawhin point 9 an hmu a, table-ah pahnihna an ni mek a. Leader Chelsea aiin point 1-in an hniam a ni.
* Nick Powell hi League One (season hmasa chuan League two) club Crewe Alexandra FC atanga an lak thar a ni. English midfielder niin kum 18 chauh a ni. Tin, kum 23-a upa Alexander Buttner pawh hi Dutch defender niin Eredivisie (Netherlands-a league sâng ber) club Vitesse Arnhem atanga lak thar a ni bawk.
* United hian Scholes leh Carrick thlak tur mumal an mamawh niin a lang. Anni pahnih hi an upa tawh a, an vanglai an pel tawh ve ve a ni. Clverley leh Anderson hi chu an tha the meuh mai. Mahse duh angin beisei an la pha lova. Zaninah pawh an awm lo a lang lo a tih theih.
* Zanina kheltha tak Buttner-a’n goal a thun avang khan Patrick Evra dinhmun hi a derthawngin i ring ve em?
* Danny Welbeck a kheltha a, Wigan tan a hnawksak tluan zak a ni. Goal thun lo mah se Nick Powell leh Hernandez-a goal te kha a thawhrah a tih theih awm e.
* A zawna match 3 clean sheet tawh lo United pawh an clean sheet leh ta a. Tin, Rooney tel lo paw’n goal an la thun thei zel a ni.
* Wigan hian Old Trafford-ah United hi an ngam lo hle a. Match 8 an khelhah an chak lo fai vek a. Goal 28 chhuahin goal 1 chiah an thun a ni.
Match Statistics
Kan ropuina vang hian Man United hi min va han haw hlawm tak em, min tluk hlawm der si lova.
united nge2 champion tur zia alang tan e.
@ruatsaka i ti lawmawm e…
Penalty phakar takin an hmu leh ta….. keini penalty tur diktak pawh min pe duh lo…
Old-Traffodish Penalty kan hmu leh ta, Sir Alex Special Penalty an ti mi khah.hahahaaaa……chuan, Wigan ho kha 1st half a khel tha viau si kha 2nd half ah goal an chhuah huk a, a profe lo ve khop mai, United khelh that vang ah ngai ang..Uih ho chu kan mong in ron hnim pha det e 😀
Uih ho ve mai mai chu
Evra chu a hmel an rawn tihlan pawh khan a nui var var lem lo chu a nih kha mawle 😀
goal cu an thun nual na in United game a hmuhnawm lem lo khawp mai.
Scholes leh Giggs te hi an chawlhnai tawh si a,game khaikhawm tur an mamawh dawn hle mai.
An penalty hmuh kha alem mai2,Alex-a aphun peih bwka,ref tehian penalty pekna chance an zawng twh thn khp mai….hi2,utd fans te swi zui mai2 ah…
kei zawng old trafford ropuina ka hmu leh ta.min 71 a scholes leh giggs lam ni lovin.vidic chhuah dawna mipui thawm zawk leh an thuthmun atanga an ding kha,ka hnuk zu tiulh tlat pek a.man utd player nih nawm tur zia an tilang chiang khawp mai..buttner leh rafael chu goal venhim theihnghilh thrak khawpin an nawr zel dawn a nih hi…good post
Nizan kha chu ka mangang khawp mai, first half a kan khel fuh lo lutuk kha, mahse second half lamah an rawn in siamtha deuh a, Buttner kha a khel tha khawp mai, Nick Powell kha chu a khel rei vak lo na chungin a khel tha thawkhat, kan la bon dawn chauh a nih hmel hehe.
kei zawng hei hi ka duh ber mai 🙂
Ngaihnawm hleee mai…leithar ho hi min ti lawm thei riau mai…Good post!!