A vanglaia khawvela striker langsar tling pha Mario Mandzukic chuan kum 35 mi niin football a chawlhsan thu a puang.
FIFA World Cup final leh Champions League final-a goal thun ve ve thei tlem te zing a mi Mandzukic hian an ram club Marsonia – ah bultanin club lian tak tak Dinamo Zagreb, Wolfsburg, Bayern Munich, Atletico Madrid leh Juventus tan khel chhoin kumin kumtir khan AC Milan a zawm a, hei hi a club hnuhnung ber a ni.
Nomawi tam tak a chawi tawh zingah UEFA Champions League, UEFA Super Cup, FIFA Club World Cup bakah Serie A nomawi 4, Bundesliga nomawi 2 leh Croatian league nomawi 3 a tel a. Hei bakah hian Croatian Football Cup (2), Spanish Super Cup, Italian Cup (3) leh Italian Super Cup a tel. Kum 2013 leh 2017 Champions League final – ah te goal thunin 2017 final – a Real Madrid laka a overhead kick phei hi chu UEFA Goal of the Season atan thlan a ni nghe nghe.
Croatia golden generation an tih mai zing a mi niin ram tan vawi 89 khelin goal 33 a thun a, ram tana goal thun tam lamah Davor Suker chiah a tluk lo. Euro 2012 khan joint-top scorer a ni bawk. 2018 FIFA World Cup- ah an ram player pawimawh ber pawl niin semi-finals extra-time minute 109-naah England lakah chakna goal thunin a vawi khat nan Croatia chu final – a luhpui a. Final – ah hian goal thun leh mahse France lakah 4-2 in an tlawm.
Mandzukic hi tharum a ngah avang leh a taimak a vang te, boruaka a that avang te in mi hriat a hlawh hle a, khelmuala a sulhnu leh a nomawi chawi tawh te en in Croatian footballer ropui ber pawl a ni reng tawh ang.
