MANGTHA, DEMPO !

I-League history – a club hlawhtling ber Dempo Sports Club chuan vawiin khan I-League atanga an inhnuhdawh thu an puang.

Dempo hian AIFF General Secretary Kushal Das hnenah lehkha thawnin an thutlukna hi an hriattir a, ” Ngun taka kan ngaihtuah hnua I-League team din a hautak dan leh a dinhmun chiang lo tak thlirin I-League atana sum tam tak thehchhuak hi a sawngsawhlawt tawh lo in kan hria a, chuvangin 2016-17 I-League ah hian team kan nei thei dawn lo a ni,” tiin an tarlang.

Mizo footballer Jerry Zirsanga leh Jeje Lalpekhlua te lo khelh tawhna Dempo SC enkawltu Dempo Group of Companies chuan I-League atangin inhnukdawk mahse football lamah tha thlah an tum loh thu an tarlang bawk a, youth development lamah nasa lehzual a hmalak an tum a, nakum atangin football academy din an tum thu an sawi nghal.

Kum 1968 a din Dempo SC hi Indian football a club hlawhtling ber pawl niin I-League siam a nih hma khan National Football League – ah vawi hnih an champion hman a, I-League nomawi vawi thum chawiin Durand Cup, Federation Cup leh Indian Super Cup te an chawi tawh bawk.

Heti hian AIFF in nakum atanga kalpui a tum football league tier thar (I-League aiin ISL hi a sang tawh dawn) a chhawpchhuah hnuah Goan club pahnih Salgaocar leh Sporting Clube de Goa te an inhnukdawk tawh a, tunah hian I-League club pasarih – Bengaluru FC, East Bengal, Mohun Bagan, DSK Shivajians, Mumbai FC, Shillong Lajong leh Aizawl FC te chauh an awm ta a, an buaina hian kiam lam a pan mai dawn lo niin a lang bawk.