Mario Gomez a chawl ta

A vanglaia khawvela striker langsar ber pawl Mario Gomez chuan professional football a chawlhsan thu a puang a, kum 34 mi a ni.
 
Gomez hi kum 2018 khan a club hmasa ber Vfb Stuttgart – ah kir lehin Bundesliga 2 – a khel a club hlui hi tun season tawp khan Bundesliga khel turin a kaipui te te a, “Vfb tana ka tih theih hnuhnung ber chu ka ti ta. He hmunah hian ka hun tawp hman ka duh a ni,” tiin a sawi.
 
Tunge Gomez ?
 
– Professional football – a khelh chhungin Stuttgart bakah Bayern Munich, Fiorentina, Besiktas leh Wolfsburg tan a khel a, club football – ah game 587 khelin goal 305 a thun.
 
– Stuttgart tan hian kum 2007 khan Bundesliga nomawi chawiin hemi kum vek hian German Footballer of the Year atan thlan a ni. Bayern Munich a zawm hnuah nomawi 7 chawiin heng zingah hian Bundesliga (2) leh Champions League te a tel a, Besiktas tan Turkish Super Lig a chawi bawk.
 
– Bundesliga – a player man to ber ni tawhin 2010/11 khan top scorer a ni a, Besiktas tan Turkish league – ah top scorer a ni tawh bawk.
 
– Bundesliga – ah goal 170 thunin goal thun tam lamah 11-na a ni phak a, Bundesliga Team of the Season – ah vawi thum a lang bawk.
 
– Germany tan vawi 78 khelin goal 31 a thun a, European Championship bikah Jurgen Klinsmann nen German player goal thun hnem ber an ni. Ram tan hian Euro 2008 – ah pahnihna niin 2010 FIFA World Cup – ah pathumna an ni bawk.