Messi – Tinge?

Estimated read time 6 min read

#ZoFooty

Tunge mawhphur ang?

Messi hian amah siam liantu, a thiamna hai chhuak a, khawvel hriata pho chhuaktu Barcelona hi engtin nge a chhuahsan theih zawk? Barcelona hian player thiam bik Messi, sang taka Barcelona thlawhpuitu hi engtin nge heti teh ngawta an chhuah tir theih? Tunge demawm a, tuin nge mawhphur?

Barca leh Messi buaina
Kan hriat angin, kum hmasa lamah pawh Messi hian chhuah a lo tum ut ut tawh a; mahse, a ‘release clause’ vanga an buai neuh neuh tak avangin a chhuak ta lo. Messi chuan a club hmangaih nen thubuai neih a duh lo niin sawi a ni. A chhuah duh chhanah khatih laia Barcelona President Josep Maria Bartomeu kha puh len ber a ni a, a chhuah loh ber chu amah siam liantu nena thubuai lian zawk neih a duh loh vang niin sawi a ni bawk.

Mahse, President an inthlak a, Messi thlawp tlattu leh Messi siam liantu anga sawi theih, Messi-an a senior career bul a tan laia Barcelona President lo ni tawh Joan Laporta chu a vawi hnih nan President a rawn ni leh a (a nih hma hian Carles Tusquets chu ‘Interim President’ a lo ni zuai bawk), Messi leh club inkar pawh a that chhoh viau laiin, a chhuak ta tho si a ni.

Dan sakei chu
La Liga hian dan khirh tak an nei a, ‘pandemic’ vanga club sum hloh ngaihtuah chuan, tun dinhmunah chuan club lian tan phei chuan ‘dan sakei’ tiin a sawi theih ang. Chu dan hnuaiah chuan club-in player hlawh (team pumpui belhkhawm) an pek theih zat tur bithliah a ni thin. Chu dan chu ‘salary cap’ tiin an sawi a, sum leh paiah La Liga club te an tlakchhiat mai loh nan ‘Economic Cost Control’ an kalpui a ni ber.

Season liamtaa club sum che vel atangin La Liga chuan club ten season thara hlawh atana an sen zat tur a bithliah tihna a ni ber. He dan hian a hma lamah harsatna lian a thlen lem lo va; mahse, season liamtaah Covid-19 avangin club sum lak luh a hniam duai duai a, loh theih lohin season thara club te ‘salary cap’ a hniam ve ta duai duai a, chu chuan Barcelona leh Messi a nghawng na ta ber a ni.

Barcelona ‘salary cap’ hi 2020/21 season khan euro maktaduai 382.7 a ni a, chhuttu thenkhat chuan season tharah chuan euro maktaduai 145-150 vel ni turah an ngai a (confirm a la ni lo). Hetiang hi a nih si chuan, Messi hlawh ringawtah kum khata Euro maktaduai 60 chuang (Pound 52 vel) sen chu Barcelona tan thil theih a ni lo. Player hraw tak tak dang an neih piah lamah, thawk tlem chunga hlawh hnem tho si Coutinho, Umtiti tih vel an la nei bawk. Chu mai a ni lo va, player naran lo Aguero leh Depay te an la lut thar bawk.

Messi chelh an tum
Chu an harsatna chu chin fel a, Messi chelh an han tum ngial a; mahse, an player hralh duhte hi duh duha hralh ngawt theih an ni bik lo. An player hralh duh thenkhat chu an man a hniam theih loh bakah, an contract a la zawh loh a, player-in chhuah a duh loh tlat bawk si chuan, a pawng a puia innawr chhuah zung zung theih a ni bik lo. Tin, Covid-19 hian club tin deuh thaw a nghawng avangin, player hlawh sang laklawh lak luh zung zung a harsa bawk. Chuvangin, an tum angin Barcelona hi an che thei lo phawt.

Chuti chung chung chuan, transfer bazarah an insum a, player thenkhat an chhuah tir theih chuan, tuna a hlawh mek chanve hlawh turin kum hnih chhung atana Messi chelh theih an la beisei cheu va, Messi pawn a pawm niin sawi a ni a, a thu phung chuan an inrem hman thu puan a ni.

Mahse…
Mahse, a hlawh chanve pawh chu kum hnih chhunga pek zawh tur ni lovin, kum nga chhunga pek zawh turin ruahmanna siam a ni. Mahse, chutianga tih chu Lal Liga lamah a rem lohna a lo awm leh bawk si ni-a sawi a ni. Lo rem ta tehreng pawh nise, a hlawh chanve hlawh tur pawha Messi chelh hi Barcelona tan sum leh paiah a ‘risk’ a sang hle. Chuvangin, a ngaihna a awm ta ngang lo a ni ber.

Messi thiam loh a ni em?
Kan tan zawng azirin kan tanna a inang lo thei ang. Heti zawng hian sawi ta ila, a chanve zeta a hlawh tih hniam remti tu Messi hian thiam lohna a nei em? “Barcelona hi a hmangaih chuan a hlawh chanve aia tlem pawn a khel tur a ni dawn lawm ni?” tih zawhna pawh a awm thei ang. Messi hian amah leh a chhungkua nge a hmangaih ang Barcelona tih inzawt ta ila, amah leh a chhungkua a ni ngei ang. Mahse, Football club zinga a hmangaih ber chu Barcelona a la ni thei tho. Barcelona hmangaih mah se, amah leh a chhungkaw hma lam hun ngaihtuahin, a hlawh chanve aia hniama tawlh zel chu a tlin bik loah ngai ta ila, a hriatthiam theih ang em?

Barcelona zawk em ni?
Messi hi an duhsak tak tak a nih chuan, a hlawh chanve tal chu an pe thei tur a ni…han ti ngawt dawn ila, an chin fel theih bak harsatnain a tuam a ni si. Messi chelh tur hian an tih tur an ti a, theihtawp an chhuah chungin ‘an tih theih bakin’ thil a kal a ni tih hi a pawmawm mai em?

Ngai chung zelin mangtha
Hetiang dan siamtu La Liga thuneitute hi a demawm lai ber an ni ta mai em? Club hmakhua an ngaih vanga ngaih theih chu ni mah se, hun harsaah ‘inhriatthiamna’ a awm ta lo hi Barcelona leh Messi ten an tuar ta a ni ber em?

Barcelona leh Messi hi an inrem a, an boruak a tha. Kan Admin pakhat tawngkam han hawh ta ila – Inngaizawng, induh tawn leh inhmangaih tak la ni mah se, chun leh zua an hrang si a, ‘ngai chung zelin mangtha’ an ti ta a ni ber awm e!

You May Also Like

More From Author