MFA CUP-AH CHAMPHAI AN CHAMPION

Bethel FC (Champhai) 1-0 Mizoram Police FC (Aizawl)
.
Scorer : C. Lalremruata

Vawiin chawhnua MFA Cup 2017 final Thuamluaia Mual, Lungleia khelha Champhai District aiawha fehchhuak Bethel FC chuan si khat faia Mizoram Police FC, Aizawl hnehin champion lallukhum an khum.
.
Champhai hian champion an phu a, tun tournament-ah goal 19 thunin goal khatmah an chhuah lo! An attacking midfielder captain ni bawk Isaac Lalrinngheta chuan goal 8 thunin Top Scorer lawmman a dawng nghe nghe.
.
Pu Lalbulliana kaihhruaina hnuaia khelh Bethel FC, Champhai hian game plan mumal tak neiin tun tournament hi an hmachhawn. Ball chan tam ngawt aia bet tak chung pawha goal humhim hna hmasaah an nei a, defensive midfielder 2 Ramsanga leh Kaleba Lalnunhlua te hmangin an forward 3 – Lalremruata, Lalengmawia leh Zonunthara te nawr thut a ngaih huna che chhuak thei turin an awm a, killer passer Isaac Lalrinngheta chu heng a hmatawng 3 te ball pe thei mai turin a awm bawk.
.
An defence a phui tha a, final-ah pawh Ramsanga, Biakngura, Lalruatdika leh Vanlalduata te inkawpin goal an la chhuah chuang lo.
.
Vawiin inkhelah pawh an chet dan ngai thovin Champhai an rawn che a, midfield-a an inbeih tawn zak zak laiin an nawr thut a, Isaac-a cross ball chu buai nuaih nuaih karah Remruata’n a tauh goal, Police keeper VK Malsawma a hawihai.
.
Police lamin na taka nawr let an tum nain midfield-ah Vanlalhriata’n ni dang a phak lo va, puitu tha a nei tawk lo bawk. Winger Zosangliana khel tha thawkhat mahse a ball pek a dik loh thin avangin holam takin a tawp an khar leh thin. First half tawp hmain Police hian chance tha lutuk an nei a, Fakawma chuan feet 3 vel leka hla atangin a thun lo! Goal a tlawh luh mai tawh tura ngaih chu a tlawh piala a, goal sirah a kal.
.
Champhai tan Remruata’n chance nei zuiin vawi 2 zawi te tein a pet. Defensive player Duata a inhliam avangin Isaac-a pawh hnun a ni a, nidang angin a langsar lo nain an goal humhimna kawngah erawh a tangkai hle.
.
Second half ah Police in erlet tumin an nawr dawn thin tak naa ruah bawhawk avangin Phullem a nal a, ball a tleng nasa bawk si, an duh angin an tal thei lo. Hriata leh Simon Lalruatkima’n a kangin ball vawrh thin mahse, Biakngura leh Ramsanga ten an tauhkhalh zel a, an si phurh sutna kawng a kaw lo.
.
Biaknunga free-kick an tauh pial atangin goal an thun teuh viau nain Israel Lalnunpuia’n tun tournament-a goal a chhuah loh record tha tak siam nan a hmansak a, inkhel tawp thlengin goal dang a luhbelh tawh lo.
.
Champhai aiawhtute hi team naupang seng sawng tak niin an captain Isaac-a (27yrs) tih loh chu kum 18-23 inkar vek an ni a, an discipline a tha hle. MFA Cup a goal chhuah miah lo va champion awm chhun an nih a rinawm.
…
Champion : Bethel FC (Champhai)

Runner-up: Mizoram Police FC (Aizawl)
.
Fair Play : Project FC (Kolasib)
.
Best Player : Edmund Lalrindika (Bazarveng FC, Lunglei)
.
Top Scorer : Isaac Lalrinngheta (Bethel FC, Champhai)
..
Champion team hian Rs.100,000/- dawngin Runner -up in Rs.50,000 an dawng bawk. Semi-final a tlate hian Rs.15,000 ve ve dawngin Best Player leh Top Scorer hian Rs.5,000 ve ve an dawng a ni.