Aizawl, May ni 2: MFA Cup SemiFinal hmasa zawkah Sports and Youth Services F.C. chuan an Coach Thlanga kaihhruaina hnuaiah Champion lai 1st Battallion MAP F.C. 2-1 in an hneh a. SemiFinal hnuhnung zawkah nikum lama finalist Luangmual an vannei a, Champhai DFA nen hun pangai a, an indraw hnuin penalty shootout-ah 4-2 in an hneh ta a ni. Final hi ni 4 May 2012 (Zirtawpni) tlai dar 1:30 hian A.R. lammual-ah an khel ang.

SYS F.C. 2-1 1st Bn MAP F.C.
1st Bn MAP F.C. hi tun dinhmunah chuan player nei tha ber anga chhal ngam an ni a. Amaherawchu SYS F.C. hi an hneh hleithei hauhlo, team pahnih te hi tournament dangah vawi hnih inkhel tawhin hun pangaiah an in draw ve ve a, an intum hmasak ber tum hian 1st Bn MAP penalty shootout-ah an chak zawk a ni.
MFA Cup 2012 SemiFinal-ah erawh SYS F.C. an chungnung zawk a, minute 1 pawh tling lovah Lalsangbera hmangin goal an thun nghal a. He goal hi Jacob leh Sangbera te thawhrah a ni. Inkhel hmuhnawm tak niin SYS F.C. hi an chungnung zawk a, minute 40 naah Jacob Vanlalbela’n goal mawi tak thun lehin first half-ah goal dang a luh belh lo.
Second half lamah ruahsur vangin SYS F.C. game a thla hniam a, senior player zawk 1st MAP an chungnung ve thung a. Mahse Zohmangaiha kaihhruaina hnuaiah a phui tha hle mahse Minute 87-ah F. Lalrinpuia (Valpuia) 1st MAP tan a rawn thunin goal dang erawh a luh belh tawh lo. SYS F.C. in final an lut a, rawlthar rualin MFA Cup final an lut hi a ropui a.
SYS an ropui!
SYS hian an full strength in an khel thei lova, Faka leh Fela (India Camp awm mai tur) inhliam hlauh vangin an khelh tir lova. An Captain Chhuantea (Aizawl F.C. in I-League 2nd div atana an lak) damlohna vangin semifinal an khel theilo bawk. Heti chung hian MFA Cup Champion lai 1st Bn MAP an hneh thei a, MFA league Champion lai Dinthar F.C. sawp bawka final an thleng thei hi an an ropui a. Rawlthar rualte thawhrimna a fakawm a, anmahni awmze neia enkawltu Coach H. Vanlalthlanga thawhrimna leh remhriatna hmuh hmaih chi a ni lo.

Luangmual 1-1 Champhai DFA (Penalty 4-2)

Champhai DFA hian tun dinhmun thleng tur hian Aizawl first Division 1st Bn MAP Academy bakah F.C. Kulikawn te an lo ti tla tawh a. Hei vang hian team tha an nihzia chu a lang chiang mai awm e. Luangmual erawh I-League 2nd Division qualifying khel thei team an ni a, chubakah MFA Cup finalist an ni bawk. SemiFinal lut tur hian team tha 3rd Bn MAP an hneh a, 3rd Bn MAP hian an player pangai bakah MS-a, Lalnuna, Puitea, David, Racy te an chhawr theih avangin tun tournament ah chuan team tha ber zing ami an ni.
Team tha pahnih inkhel an ni bawk a, inkhel a hmuhnawm kher mai. Team pahnih te hian innawr tawn zak zak mahse goal a lut lawk thei lova. Minute (45+2)’ ah Jersey number 17 Zonunpuia hmangin goal an thun a. First half-ah goal dang a luh belh lo.
Second half-ah hemi sut tuma Luangmual nawr let a hmuhnawm a. Chhum zing vangin inkhel chawlh lai lawk te awm bawk mahse team tha zawk anga ngaih Luangmual lamin goal sut tuma an nawr reng a ngaih avangin inkhel hmuhnawmna a tlahniam thei tak tak lo. Luangmual lamin clear chance hmu theilo mahse minute 10 chauh a awm tawh tihin penalty an hmu a, Lalhungchhunga rawn pen chhuakin goal ah a chantir a. Hemi hnu pawh hian Luangmual in la nawr chhunzawm zelin hun tawp dawn tep a Dina Varte in target-ah pet mahse Champhai Keeper Thanpuia’n a lo dang miau si. Hun pangai-ah 1-1 in draw ta a ni.
Extra time-ah erawh champhai game a rawn tha leh thung a, chance tha tak tak vawi hnih an thelh chu an ui ve ngei angle. Champhai lam tan Chhanrinpianga a khel ta a, mahse goal an thun thei tlat lo. Luangual lam pawn half chance chu nei bawk mahse goal an thun theih tak bik loh avangin an in draw ta a ni.
Penalty Shootout-ah Champhai lam tan an star plar Sawmdawnga’n a rawn pet out nghal a, a vawihnihna lah Luangmuam keeper Saidinga’n a lo save bawk. Luangmual lamin goal-ah an chantir vek avangin 4-2 in an chak ta a ni.