Vawiin ni 15 March 2012 khan MFA Office, City Park-ah 3rd Red Ribbon Inter village Football Tournament Organising committee vawithumna neih a ni a. He committee-ah hian Hunthar L.C. leh Republic Vengthlang players pahnih te chu hrem turin thu an ti tlu.

Hunthar Veng Local Council Fans te hian inkhelh banah match official te an khawih avangin Inter Village Tournament lo awm leh hmasa ber turah tello tura hrem an ni.

Republic Vengthlang Player Jersey No. 12 Lalhmingmawia leh Jersey no. 10 Lalsangzuala te chu Chhinga Veng Local Council nen an inkhelh tuma an chet dan a mawiloh avangin MFA, DFA leh Zone Tournament reng rengah vawiin ni 15.03.2012 atanga May, 2013 thleng khel theilo tura hrem an ni. Lalhmingmawia an hrem chhan hi referee hnek vang a niin Lalsangzuala an hremna chhan hi chu mawilo taka Chhinga Veng player Lalchhanchhuaha a hliam vang a ni.

Sawi belh ang:
Mizote hian football hi kan ngaina a, inkhel en thin pawh kan tam reng a ni. Tun hnaia kan football tournament ngaihlut ber Red Ribbon Inter Village Football Tournament-ah phei chuan entu an tam zual a, buaina pawh awlsam takin a chhuak thei tih chu kan hre theuh awm e. Chakloh hi a hreawm a, mahse buaina chhuak tur khawpa chakloh thiamloh a tha lova. Buaina chhuahloh nan Security that a pawimawh rualin Mizo Community ah chuan Vengchhung Hruaitute an pawimawh takzet a ni. Buaina chhuahloh nan vengchhung hruaitu theuh ten tan leh se, anni veng hminghchhiat leh that mawhphurtu an ni si a.