#ZoFooty
MFA-in kum 2022-a inkhelh theih dan a ruahman
Vawiin (November 18) chawhnu khan Mizoram Football Association Executive Committee chu MFA Office-ah an ṭhukhawm a, kum 2022 aṭangin hripui a ziaawm chuan football leh futsal inelna kalpui leh turin ruahmanna an siam.
Thurel tlangpuite:
- MFA Special General Body Meeting-in a phalsak angin football inelna kalpui theih dan MFA chuan a ngaihtuah a, Covid-19 hri lêng a ziaawm chho a nih chuan kum 2022-ah Under 15 League, Mizoram Premier League Under 18, MFA Women’s League, Veteran football-te kalpui turin ruahmanna a siam.
Futsal inelna pawh kum 2022 aṭanga kalpui theih tura rel a ni a, December, 2021-ah registration kalpui a ni ang.
Hetihlai hian Mizoram Premier League kalpui dan turah erawh MPL Club hruaitute leh sponsor-te nen inhmuhkhawma boruak thlir chunga rel turin dah a ni.
Grassroots football training chu sorkarin naupang sikul kal pawh a la remtih loh avang leh, hripui avanga inven a la ṭul avangin a kalpui theih hun tur Grassroots & Youth Development Committee kutah dah a ni. - Mizoram football team pahnihte inbuatsaihna report hetiang hian ngaihthlak a ni – Santosh Trophy team inbuatsaihna tluang taka kalpui a nih rualin Covid-19 avangin player thenkhatin harsatna an tawk a, final selection neih tawh niin team pawh an inpeih thawkhat tawh a, final squad list hi puan chhuah thuai a ni ang.
Senior Women’s National Football Championship khel tur Mizoram women’s team pawhin inbuatsaihna an zo thawkhat tawh a, ruahman lawk ang chuan November 20-ah Kerala panin an chhuak ang. Mizoram team pahnihte hi MFA thawhpui Nivia company-in an jersey an tumsak a ni.
- Coach Lawmman:
Association of Mizoram Licensed Football Coaches-in MFA hnêna an ngenna, state football team enkawltute lawmman pun an dilna chu MFA Executive Committee chuan âwm a ti a, coach-te license neih dan azirin an lawmman tur bithliah a nih bakah, national competition-a semi final thleng chin tán an thlen san dan azirin lawmman siamsak an ni bawk ang. - C License Course:
December, 2021 chhung hian C License Coaching Course buatsaih tura MFA dilna chu All India Football Federation-in a pawm a, a kalpui dan tur kimchang chu MFA Technical Committee kutah dah a ni. - MFA Special General Body Meeting rel angin Inter District football inelnaa a thlengtu lawmman tihpun tur zat bithliah fel a ni a; Hripui lêng a ziaawm chuan kum 2022-ah MFA Cup, Inter District Boys Championship leh Inter District Women’s Championship-te kalpui tura ruahman a ni.
- Issued by Information and Publicity Committee, Mizoram Football Association
