May 30, 2020-a Mizoram Football Association Office Bearer’s meeting chuan Mizoram football kal zel dan tur thu pawimawhte a rel a, 2019-2020 season kal mek chu programme zawh hman loh awm mah se, dan pangngai anga tawp turin a rel.
Thu rel thenkhatte:
1. MFA Season: MFA season kal mek, 2019-2020 chu dan angin May 31, 2020-ah tihtawp a ni a, MFA calendar-a dah sa competition pawimawh thenkhatte chu Covid-19 hri leng avangin khelh a remchang thei ta lo a, MFA chuan pawi a ti takzet a ni.
MFA Cup (Saitual-a nghah tur), Inter District MFA Sub Junior Boys Championship (Mamit DFA thlen tur), Inter District Women’s Championship (Siaha DFA thlen tur), MFA Women’s League, MFA Futsal League leh MFA hnuaia Futsal Tournament dangte chu Covid-19 hri leng avangin 2019-2020 season chhungin kalpui theih a ni dawn ta rih lo a ni.
MFA season thar 2020-21 chu June 1, 2020 hian dan pangngai angin a intan ang a, nimahsela football inelna (competition) erawh chu sorkarin a phal hma chu kalpui loh tur a ni ang. Club affiliation leh player’s registration & transfer chu AIFF thu ngaichang chungin MFA Executive Committee-in a rel ang.
MFA chuan 2019-2020 season-a MFA Executive Committee Member leh Committee peng hrang hrang member-te chu 2020-2021 ah an chanvo ngai chelh nawn leh theuh turin a ruat nghal bawk a; DFA OB-te’n tha an tih angin season thara a thawhpui tur a ruat thei ang.
2. DFA puihna: May 31, 2019-a MFA Annual General Body Meeting-in a rel tawh angin MFA-in DFA-te tanpuina turin DFA pariat hnenah Rs 20,000 theuh (Total Rs 1,60,000) a pe ang.
3. General Body Meeting: MFA Constitution-a inziak angin Annual General Body Meeting chu May 31 ral hmaa neih tura tih ni mah se, Covid-19 hri leng avangin neih theih a ni ta si lo a, MFA OB meeting chuan a remchang hmasa berah ‘Special General Body Meeting’ koh mai turin a rel.
4. MFA Grassroots: MFA-in Grassroots football a kalpui mek chu season tawp rualin tihtawp a ni a; amaherawhchu Grassroots football kal laite’n an zawh hman loh chu Covid-19 hri leng a zawh hunah kal chhunzawm dan ngaihtuah a ni ang.
– Issued by Information & Publicity Committee, Mizoram Football Association
