MFA League Final Day-ah Police team an chaklo vek a, 3rd Bn MAP hnehtu Dinthar Champion in Northeast Premier League (NEPL) ang, 1st Bn MAP Academy hnehtu F.C. Kulikawn chu pahnihna niin Fair Play Award an dawng mai bakah NEPL Qualifying an khel thei bawk ang. Luangmual F.C. in 1st Bn MAP hneh mahse pathumna ah an awm avangin NEPL an khelve thei dawn lo a ni. He tournament a Champion Dinthar F.C. hian trophy bakah Rs 50,000 an dawng a, pahnihna F.C. Kulikawn hian Rs 30,000 an dawng bakah Fair Play Award in a ken tel Rs 10,000 leh Trophy an dawng bawk.

Luangmual F.C.3-0 1st Bn MAP F.C.
Luangmual F.C. tan Lalbiaktluanga minute 8 lekah a thung nghal a, minute 14 na leh minute 27 naah Lalhriatzuala, Tezawka tih a hriat lar zawk chuan goal hnih dang thun lehin, 1st Bn MAP chu 3-0 in an hneh a. Tezawka hi MFA League 2nd Phase ah hian official taka puan ni lo mahse player of the tournament tihloh theihloh a ni a. A team Luangmual F.C. hi an chak fai vek a, match tinah goal a thun mai bakah a ke atang hian ball tha tak tak a chhuak reng bawk. I-League 2nd Division qualifying an khelh hunah a chhunzawm thei angem?
1st Phase a player anga awm Vanlalarova chu 2nd Phase ah coach angin a awm thung, Mizo Trio (Jerry, Malsawma, leh Rova) zinga mi Rova hian a team te hi a chakpui vek avangin fak a hle bawk. First match a zawh chiah hian Luangmual hi League ah pakhatna an ni a, 1st Phase an khelthatloh avanga an tih theih awmchhun chu midang result lo nghah a ni ringawt mai a ni.

F.C. Kulikawn 3-2 1st Bn MAP Academy
Inkhel hmuhnawm tak tihtur chu ni lo mahse goal a luh hnem miau avangin hmuhnawmloh zawk zawk chu a ni lo. Inkhel tan atanga minute 9 leka F.C. Kulikawn tana Zonuntluanga goal thun chu minute 38 naah R. Lalawmpuia goal hmangin 1st Bn MAP Academy in an rawn sut a, goal dang a luh belh lo.

2nd half ah Zonuntluanga bawkin F.C. Kulikawn tan minute 50 naah a thun a, Lalhnenhzova minute 57 naah a thun leh bawk avangin Kulikawn chu chak chiang zawk tura ngaih anni, mahse inhliam vanga 2nd Phase tir lama khel theilo Laldanmawia chuan minute 68 naah Academy tan a rawn thun leh a. Mahse goal dang an thun belh thei tawh loh avangin F.C. Kulikawn chu 3-2 in an chak a. Inkhel a zawh chiah hian F.C. Kulikawn hi pakhatna niin Luangmual F.C. chu pahnihna anni thung, chumi awmzia chu F.C. Kulikawn hian NEPL an khel nghal thei a, Luangmual in NEPL qualifying an khel dawn tihna a ni. 1st Bn MAP Academy khan penalty kha thelh ta lo se chuan Luangmual hian NEPL an khel thei dawn chiang tawh tihna a ni, mahse an thelh tlat si.

Dinthar F.C. 1-0 3rd Bn MAP F.C.
Dinthar F.C. in Champion tur chuan chak an mamawh a, NEPL khel tur pawn chak ngei ngei a ngai. 3rd Bn MAP tan beisei tur a awm tawh lo. Inkhel tan tirh atangin Dinthar lam hian nawr zawk mahse goal an thun thei lova, an vanduaina belhchhah turin penalty an hmuh pawh an pet goal lo. First half ah goal an thun lo ve ve.
Second half an tan a, Dinthar bawkin an nawr a, Luangmual F.C. leh F.C. Kulikawn tan awm a nuam ta chiah bik lo. Dinthar in an phu ang ngeiin minute 55 naah Zosangliana tauh luh hmangin goal an thun ta a, he goal a luh chiah hian Dinthar hi pakhatna ani nghal a, F.C. Kulikawn erawh pahnihna anni thung. Dinthar in nawr zel mahse goal an thun thei lo, Rinkima’n mawi taka a lakluh hnua goa bar a pet per te chu a uihawm zual a ni awm e.
Dinthar an la himlo, 3rd Bn MAP counter attack-ah an hlauawm ve tlat, hun tawp lama MS-a’n penalty area pawn chiah freekick a hmuh Lawma’n a pet goal loh chu Kulikawn leh Luangmual tan chuan a uihawm ngei mai. Hun pek belah 3rd Bn MAP in chance tha tak rawn nei lehin a dawn emaw tih tawh hnuah Dinthar Keeper Isaka chuan rawn nem out hman hlauh a, hun a tawp zui nghal. Dinthar F.C. chu MFA League Champion an ni ta a, Dinthar F.C. chu Coach Zara te zarah dinthar lehin a awm ta a ni.

Note: MFA League a ball an pet hi Chawnghlut Sports, Millenium Centre te tum a ni a, medical atana thil mamawh zawng zawng hi R.S. Drug Store in an rawn tum thung.