Mizoram Football Association chuan Germany aṭangin football coach pahnih, Mizorama football coach-te training petu tur an chah chhuak dawn a; Mizoram football referee-te training pe turin All India Football Federation aṭangin referee instructor-te an chah chhuak dawn bawk.
Germany coach
Kumin April thla khan Rainer Schmiedchen, Consul General of the Federal Republic of Germany (Kolkata) chuan Aizawl a lo tlawh a, he hunah hian Mizoram sorkar ruahmannain MFA hruaitute chuan Schmiedchen hi a thlennaah an kawm a, Mizorama German football coach chah luh dan an sawipui.
Schmiedchen hian German football coach chah lut tura theihtawp chhuahpui a tum thu a sawi a, Germany-a thuneitu lamte biak a tiam thu MFA hruaitute hi a hrilh a ni. A intiam angin Germany lama German Olympic Sports Confederation hotute hnenah MFA ngenna thu hi a thlen ta a, German Olympic Sports Confederation hian Frankfurt aṭangin German football expert pahnih, Mizorama kar khat chhung coach training pe tura lo thawn an rem tih thu MFA lam hi tun hnai khan an hrilh ta a ni.
Frankfurt aṭanga German Olympic Sports Confederation thu thawn danin German football expert pahnih chuan September 30, 2012 hian Aizawl an lo lut ang a, October 1-6, 2012 chhung coach-te hnenah training an pe dawn a ni.
Coach an tirh turte hming pawh tihchian vek an ni tawh a; nimahsela ram leh ram indawrna thil a nih vangin Germany lam aṭangin puanzar an la rem ti hrilh lo a, MFA hruaitute nen pawh phone leh e-mail hmangin an indawr reng tawh a ni. German football expert-te lo kal dan tur ruahmanna hi Stéphanie Deveaux, Department International Relations, German Olympic Sports Confederation-in a buaipui a, an tihfel tawh thu MFA hruaitute a hrilh bawk.
He coach training-ah hian Mizoram Premier League khel tur team pariat aiawh mi pahnih ṭheuh an tel thei dawn a, hei bakah hian District Football Association aiawh pakhat ṭheuh leh MFA lamin team enkawl tura a hman ṭhin coach pali an thlang bawk ang.
Referee intuaihriamna
MFA chuan AIFF nena ṭangkawpin October 8-13 chhungin Referee Development Course, Aizawlah an hmang dawn. He hunah hian AIFF lam chuan Mizorama referee 30-te an ko khawm dawn a, kawng hrang hranga intuaihriamna hun hman a ni ang.
West Bengal aṭangin Chief Referee Instructor Pradip Nag bakah Orissa aṭangin Instructor SC Mohanty leh Fitness Instructor Rathin Mukherji (West Bengal) te an lo kal dawn a; he Referee Development Course tawp lam ni hnih chhung châm turin AIFF-a referee lama thuneitu sang ber, Head of Referees’ Department, Col. Gautam Kar pawhin Aizawla lo kal a tum bawk a ni.
He Course-a tel tur hian Referee Identification Number (RIN) form AIFF lama thehlut tawh aṭangin mi 30 an thlang a, heng referee-te hi tun aṭanga fitness training mahni-a lo nei ṭan turin MFA Referee Board lam chuan a hriattir tawh bawk a ni.
Hei bakah hian AIFF chuan ‘MFA Referee Instructor’ neih ṭul a ti bawk a, Instructor ni tura thlan chhuah mi panga hnenah training an pe tel bawk dawn a ni.
Heng referee zinga a tiṭhate hi Mizoram Premier League-a match official-ah hman chhunzawm an ni dawn a ni.
Mizoram Football Association chuan Germany a?angin football coach pahnih, Mizorama football coach-te training petu tur an chah chhuak dawn a; Mizoram football referee-te training pe turin All India Football Federation a?angin referee instructor-te an chah chhuak dawn bawk.
pui thei chur2 khawp mai……………. foreign coach chah hi a hau tak zia ka hrethiam ve deuh a, hmanah pol 1-ah mi kan chah toh a, expenduture a sang khop mai. Hei hi United champion, El Clasico……………. Coty champion tih vel ai chuan Mizote tan futbol a news ropui a ni. Football fans ni lo…… European football fans ho hian an chhiar ve lo a nih ka ring an comment ve miah lo —————— weekend inkhel an predict sup2 ringawt (ram leh hnam phatsantu te han ti vel ila duhthawh om vei)
MFA hruaitute hmalakna hi a fakawm. MPL coach leh DFA coach te an vannei bik hle mai.
MPL ah referee te hmasawnna hmuh ngei inbeisei ang.
va ropui thin ve aw.. tih ziah rawh se.. Hmasawnna.. kan hmu zel e
Hmasawnna ropui tak tak rawn kal pui se tha khawp ang.
Tha dawn ve, hma pawh kan sawn nasa khawp ang chu.
Ava tha dwn ve le,MPL ah official te hmaswnna hmuh ngei lo beisei te’ng