48th National Junior Football Championship for Dr BC Roy Trophy chu West Bengal-a Siliguri khuaah khelh mek a ni a, vawiina (January 19) Kanchenjungha Stadium-a inkhelah Mizoram chuan 4-1 in Goa an hneh.

Mizoram tan Ramengmawia, Vanchengpui chuan hattrick siamin goal thum a thun a, MS Dawngliana, Bawngkawn-in goal khat dang a thun. First half-a goal a luh loh hnuah Ramenga’n minute 55-naah penalty atangin goal a thun a, Goa lamin freekick atangin minute 60-naah an shoot a, he mi hnu hian Ramenga bawkin minute 73-naah a thun a, Dawngtea’n minute 82-naah a thun belh a, minute 87-naah Ramenga hian Mizoram goal hnuhnung ber a thun ta a ni.

Mizoram team manager Benjamin Laldinpuia (Didina) chuan, “Kan khel tha a, inkhel kan thunun a, kan phu tawk ang result niin ka hria. Goa pawhin chance an nei ve thova; nimahsela a inkhelah kan chungnung deuh a, chu chu goal lut zatah hian a lang ta a ni,” a ti.

Mizoram hi Uttarakhand leh Orissa-te nen group khatah an awm a, group-a point hmu sang ber hian round sang zawk an kai dawn a; Mizoram manager chuan an khingpui tur pahnih Uttarakhand leh Orissa-te inkhel a thlirin team tha tak ve ve an nih thu a sawi.

48th National Junior Football Championship hi level pahnihah then a ni a, Tier 1-ah team tha thlan chhuah 16-te awmin Siliguri-ah an inkhel a, hetah hian Mizoram pawh an tel a, a bak zawng chu Tier 2-ah awmin Orissa-a Cuttack-ah an inkhel a ni.

Tunah hian National Sub Junior Football Championship, North East qualifier khel turin Mizoram sub junior team-te Assam-ah an zin chhuak mek.

– Mizoram Football Association