MFA leh MSACS buatsaih, Red Ribbon Inter Village Football Tournament 2012 final chu April 7 hian AR Lammualah khelh a ni dawn a, final function hi chawhnu dar 1:30-ah tan tur a ni a, Chief Minister Lal Thanhawla chu khuallian a ni ang.
He final match lo awm tur atan hian MFA lam chuan hetiang hian ruahmanna an siam a, mipuite zawm vek turin an ngen.
1. Inkhel en man hi Rs 30/- a ni ang a, Rs 200/- man siam a ni tawh lo ang a, official pavillion-ah sawm bikte chiah thut theih a ni ang.
2. Inkhel en turte chu chawhnu dar 1:00-ah chuan Lammual chhunga lut vek tawh tura ngen an ni a, hei hi final function tan hnua gate-a innek buai an awm lohna tur leh, vanduaina thleng thei laka mipui an him theihna tura ruahman a ni.
3. Ticket hi AR Gate pui (Zodin) kawtah hmun thumah zawrh a ni ang a, Lammual luhna atanga hla deuhah ticket counter hi siam a ni ang a, chawhma dar 11:30-ah chuan ticket a lei tan theih tawh ang.
4. Lammual chhungah (Hotel Ritz bul gate atangin) lirthei eng chi pawh luh phal a ni dawn lo a, hei hian team bus, VIP leh official gate pass nei chinte a huam lo ang. Mipui nawlpui tan gate chhungah lirthei ken luh theih a ni lo ang.
5. Finalist team tantute hi an thut dan tur ruahman fel sa vek a ni a, Lammual tlang leh AR Cinema Hall kawt lamah Durtlang fans an thu ang a, Chanmari Veng tantute chu Lammual chhim lam gallery sak tharah an thu ang. Veng pahnih tantute hi inthut pawlh loh tur a ni.
6. Lammual leh a chhehvel a thianghlim zawkna turin inkhel entute chu an thut chhan tura an thil kente hnutchhiah lo tura ngen an ni a, mahni thil eina kawrte pawh paih darh mai mai lo tura ngen an ni.
7. Official Pavillion hi sawm bikte thutna tura tih a ni a, chumi mila thutna pawh ruahman a ni. Hei vang hian final atana sawmna card dawng mi 100-te leh VIP-te tih loh chu official pavillion-a kal lo tura hriattir an ni.
8. Mipuite sahimna turin gate/ground duty-te bakah police duty thahnem tak an awm dawn a, anni thu hi ngaichang theuh turin mipuite ngen an ni.