MFA Special General Body Meeting neih a ni

Estimated read time 3 min read

Mizoram Football Association (MFA) Special General Body Meeting chu vawiin (July 24) khan Aijal Club-ah neih a ni a, Sports Minister Pu Robert Romawia Royte-in a hmanpui.

Khuallian Sports Minister chuan Mizoram a infiamna hmunhma tihchangtlunna tur cheng nuai singhnih sangthum zet hmuh a nih thu sawiin, chung zinga a chanve chu sorkarin a dawn tawh thu a sawi a. Mizoram ah infiamna hmunhma nasa taka siam belh leh cheithat a nih dawn thu sawiin, District football association hruaitute chu khelmual siamtu Contractor te lo enpui a, zawhfel hmaa sawisel ngaite sawisel a, lo enpui uluk thin turin a chah bawk.

Pu Robert Romawia Royte chuan All India Football Federation pawmpuinain, India hmarchhak huap football inelna lian tak, kumtina neih tur buatsaih tum a hmalak a nih thu a sawi a, MFA leh District FA te chu mawhphurhna la a, a buai ber ber tur an nih dawn thu a sawi – he inelna hi Laldenga North East Peace Cup tia a hming vuah tum a ni.

MFA President Pu Lal Thanzara kaihhruaiin rorel inkhawm neih a ni a, MFA leh District FA atanga lut Agenda pakua sawiho a ni.

Covid 19 avanga football inelna chawlhsan lailawk chu Sorkar thuchhuak leh Mizoram dinhmun thlir chunga la chawlh rih tura rel a ni a; MFA Executive Committee-in a rel hma chu District leh Zone hnuaiah pawh football leh futsal inelna (competition) neih rih loh tura tih a ni.

Nikum lama lo sawiho tawh angin Mizoram pumah football khelmite transfer leh registration mumal zawka kalpui a nih theihnan Centralized Registration System (CRS) kalpui ni tawh rawh se tia MFA rawtna chu sawiho a ni a. Chumi zulzui chuan District tina division sang ber player te chu in register vek tura beisei an ni a, MFA in transfer theih hun a hawn hunah District tinte inngaichang tlang a tih tura rel a ni.

MFA General body meeting hi kum dangah chuan season tawp thla, May thla tawpah neih a ni thin a, kuminah hian hrileng buaina vanga neih theih a ni lova, boruak a zia tak deuh avangin tun tumah hian sorkar thuchhuak zulzuiin, tenau deuh zawka buatsaih a ni.

Tun tum football hruaitute inkhawmpuiah hian tunhnaia District FA dinthar Khawzawl, Hnahthial leh Saitual DFA aiawhte a vawikhatnan an tel a ni.

Mizoram Football Association chuan kuminah hlawhtlinna duhawm tak tak a nei a. February thla khan National Junior Champion kan ni a, hemi thla vekah hian senior team lamin Dr T Ao Trophy an la bawk.

C Tlanthianghlima

Football tui ve tak

You May Also Like

More From Author