Manchester United leh England striker Wayne Rooney hi Premier League-a Fulham nen an intum ṭumin a inhliam a, Fulham striker Hugo Rodallega nen ball an inchuhna lamah a mal (khup chung) a kak a nih kha. Tunah hian a inkhelh leh theih hun tur a la hriat loh a, September thla tawpa rawn lêt hman tura beisei ni mahse October thla pum pawh chawlh ngai thut dinhmunah a ding mek a ni.

Footballer tân chuan inhliam hrim hrim hi a pawi a, thla khat chuang inhliam phei chu vanduaina a tih loh theih loh. Mahse vanduai rau rauah Rooney hi a vannei hle a,  a hliam kha millimetre khat lek pawhin thuk belh se chuan a thisen zâm (artery) a tichhia ang a, damchhunga inkhel thei tawh lo dinhmunah a ding dawn a ni tih a sawi. Artery chat hi inhliamna hlauhawm ber pawl a ni a, thisen a chhuah nasat avangin enkawl vat a nih loh chuan minute 10 lek chhungin thihna hial a thlen thei a ni.

Kum 26 a upa Rooney hian a hliam enkawltu doctor leh staff te a fak a. “Ka tihrawl a khawih pha lo a, ka vannei hle a ni. Doctor ten min hrilh danin, ka hliam khan millimetre khat vel lekin ka thisen zâm a thleng pha lo va, hei aia dinhmun chhe fe a ding thei tur ka ni a, ka vannei hlauh a, Pathian chungah pawh lawmthu ka sawi a ni.

“Doctor te khan a pûn an hlauh avang leh ka hmuh an duh loh avangin hliam kha khuh an tum a, mahse ka en duh thu ka hrilh ve tlat a. Mi tamtak chu nise hliam avangin nikhaw hre lo a an awm tur thu min hrilh nghe nghe a ni. An thiamna leh ṭuanranna avangin hliam na tak ni thei tur kha ṭha takin an enkawl a, an chungah pawh ka lawm hle a ni.” tiin a sawi.

Rooney hian Premier League leh Champions League-a Man United match ṭhenkhat a khel thei dawn lo a, England in tunhnaia World Cup qualifying match an khelh tur pathumah a khelh theih a rinawm lo bawk. Man United player ṭha ber (?) hi a inkhel tawp ber kan lo hmu hman ṭep a ni e.

source: football411.com