MICHAEL-A THLAH NA’N – Lawmkima Hmar

Mizoram football a sulhnu nei lian tak Michael Lalremruata chuan nizan dar 9:20 khan khawvel a chhuahsan. Kum 24 mi Michael-a hi Pi Chhunhmingthangi fapa niin Khatla-ah an khawsa mek a, Aizawl FC leh Dinthar FC tana lo khel tawh thin a ni a, nizan khan lumen niin vawiin chawhnu dar 1:00 khan Khatla thlanmual, New Secretariat Complex-ah phum a ni.

Michael Lalremruata hi Aizawl FC an dinthar leh hnua an player pawimawh niin The People’s Club tan hian kum 2011-2016 chhung a khel a, kum 2012 I-League second Division-ah khan goal 10 thunin top scorer a ni nghe nghe. Hemi hnu hian Dinthar FC ah lutin hrisel lohnain a tlakbuak avangin a inkhel hleithei ta lo va, tunhnai mai khan Dinthar FC hian an chhuah zalen a ni.

Michael-a hian kum 2013 khan Chhinga Veng LC team tan pawh lo khel tawhin goal pawh a lo khung nual a, amaherawhchu, vanduaina hrang hrangin tlakbuakin a hrisel lo em em a, TB a vei mek a, tunhnaiah ruh chuktuah natna Gout a nei tih hmuhchhuah a ni bawk a. A nupui nen an inthen tawh a, a sum lakluhna ber football a khelh theih loh avangin a rilru a hah hlein a rinawm.


Mahni intihhlum: Khawel changkang leh hmasawn chak takah hian mihring nun chu nuamsa leh ropui zawka a lan laiin; nun beidawn avanga thihna rapthlak ber an tih hial thin mahin ‘intihhlumna’ a thleng tam sawt hle mai. Mizoram hian kum tin mi 50 vel he thihna avang hian kan chan ta ziah a ni.

Khawvela ram changkang ber USA an bang lova, kumtin American 42,773 te chuan mahni nunna lak an bang lo va, an khawpui lian leh lar Las Vegas chu US khawpuite zinga mahni intihlum tam berna niin hming lem atan sual punlunna khawpui ‘Sin City’ tih a ni hial.

Heng intihlum hrang hrang te hi an intihhlum chhan han chhui chian chuan ‘ruih at/ruih lungpuam vang leh inngaihzawnna chungchanga rilru nat vang’ a tam ber. Heng intihlum te hi a tlangpui thuin kum 15-45 inkar an ni a, hetiang thil thlen hun tam ber hi tlai dar 3-11pm a ni.

Zirchiangtu pakhatin mi hrang hrang a kawm kualnaah chuan a kawm kual zinga 32% te chuan an hun kal tawh engemaw laiin intihhlum mai duhna an lo nei tawh thin tih an sawi nghe nghe. Tu chungah pawh a thleng thei a ni tih hi a lang chiang viau awm e. Mahni nunna la ta te zingah hian mi fel tak tak pawh an kat nuk a, mi intihhlum thu an hriat te hian mak an tiin an rap em em a, an chunga thleng ve thei turah pawh an ngai lo!

Beiseina nung : Tu chungah pawh thim a zing a, ruah a sur a, ni a sa bawk thin. Vawikhat dai buak avangin engkim a tawp ta tihna a ni lo va, vawikhat rahpelh avangin engkim a pawi zo va, beisei tur a awm ta lo tihna a ni hek lo.

Chhum chhah tak zingin ni eng mawi tak a hliah avang maiin ni hi a bo ta tihna a ni lo va. Chhum dum chhah takin ruah a rawn thlen a; leilunga thil to leh nungcha tinreng te tana malsawmna a ni ta ang hian; min tibeidawngtu hi kan tan malsawmna hnar a ni fo. Thim a chhah poh leh eng a zual thin a, kan harsatna a len zawh poh leh Lalpa eng kan hmu chiang mai dawn a ni.

Tupawh mai hian harsatna kan tawk a, harsatna thenkhat chu harsa tak a ni a, tawrhchhuah huphurhawm tak, a phurtu tichau leh tibeidawng vek tur khawp a hmachhawn chakawmlo a ni. Mitin hian hunkhirh – tah hun, indawm kun lai, khawvela damchhan leh beiseina nung nei loh lai hun kan tawng theuh.

Mi lungngai te hian an tum thulh tur chuan hrethiamtu, inbunruahna tur an mamawh.

Hruizen dah bo ringawt hian inawhhlum a ti bang dawn lo va, chemte thuhruk ringawt hian invihhlum a thulhtir dawn hek lo. A thulhtir theitu chu an thinlunga mahni intihhlum duhna an neih thlaksak chiah a ni. Heng mi beidawngte hian beisei tur Isua Krista an nei a ni tih hrilhtu tur an mamawh a, hria se zawng an tan damna a tling ngei ang.

Posted in Articles, Mizoram.

Leave a Reply

Or