Nizan khan return fixture an khel tan a, season khata an intum vawihnihna an khel hlawm.
Blackburn Rovers 1 – 2 Stoke City
Aston Villa 0 – 2 Swansea City
Wolverhampton Wanderers 1 – 2 Chelsea
Queens Park Rangers 1 – 2 Norwich City
Fulham 2 – 1 Arsenal

Wolverhampton Wanderers 1 – 2 Chelsea
An khelmuala an chakloh mai bakah club chhungkaw buaina a awm avangin Chelsea inkhel a buai hle a, first half ah goal an thun lo. Mahse second half ah an khelhdan an ti danglam a, minute 54-na ah Ramires hmangin goal an nei ta. Chelsea hian ball an changhnem chhunzawm a, mahse mualneitu hian goal thun tumin kawng an zawng zel a, minute 85-na ah an hmu ta. Chelsea defender pherh lai takin Steven Ward chuan goal a thun ta mai a, Chelsea manager dinhmun a derthawng leh ta tlat. Mahse hun tawp dawn minute 1 a la awm tihin Frank Lampard chuan goal a thun a, Chelsea chu dinhmun sangah a dah leh ta. Nizan inkhel ah khan African mihangho an tel lova, Frank Lampard leh Ashley Cole-ten red card an chawilo erawh an vannei hle.

Blackburn Rovers 1 – 2 Stoke City
Inrinni zan khan Old Trafford ah Manchester United an va hneh a, nizan khan an khelmual Ewood Park ah Blackburn Rovers in Stoke City an hneh lo thung. Inkhel hmuhnawm takah Stoke City hian minute 17-na ah Peter Crouch hmangin goal hmahruai an thun a, Samba chetsual leh Coruch chetfuh a inrual a ni ber mai. Blackburn Rovers hian nawr tum viau mahse Stoke an tang kawh zel a, minute 45-na ah goal dang kan hmu leh. Etherington-a ball cross tha zet mai chu Peter Crouch bawk chuan tha deuh maiin a control a, net puar pawp khawpin a pet goal zui. Mahse second half ah mual neitu lam hian goal an thun ve leh a, minute 69-na ah Goodwillie chuan phur tharna goal a rawn thun a, mahse hun tawp thlengin an thun belh loh avangin an zinchhuahna lama che\ha khat tak Stoke City an chak ta a ni.

Aston Villa 0-2 Swansea City
Mikhual team an chak zel a, Swansea City pawhin an lo hrepha nge ni, 2-0 in mual neitu Aston Villa an hneh keuh. Aston Villa hian a khelah hnehlo lutuk lo mahse Swansea City hian an ngam riau a, minute 5-na lekah goal kan hmu nghal. Stephen Warnock tihsual nangchingin Nathan Dyer chuan Swansea goal khatna a thun a. An in nawrtawn chhunzawm nghal. Second half an tan chiah tihin Swansea bawkin goal an nei leh a. Veilam kil atanga Wayne Routledge-a ball rawn siam chu ama chantur bawkin a rawn let leh a, goalah a hlap lut chiang hle. Goal dang a awm belh loh a, Swansea City chuan tun season-a an zinchhuahna-a point 3 an hlawhchhuah hmasakber an hmang a, Chelsea khelmuala chakna chang hlim Aston Villa erawh an mualpho chiang hle

Queens Park Rangers 1 – 2 Norwich City
Misual tia hriatlar Queens Park Rangers Captain Jeoy Barton a sual zawngin a che leh a, goal khata hma an hruai laiin hnawhchhuah a ni a, Norwich City chuan goal 2 in an rawn chhanglet a, kaithar pahnih intumah Norwich City chuan 2-1 in an zinchhuahna lamah chak hmel an hmu. Minute 11-na a kal mek tihin mual neitu QPR chuan Barton-a hmangin goal an thun a, mahse goal thuntu hian minute 34-na ah Norwich player Johnson-a a tauhluih avangin red card a hmu a, a bak zawng chu Norwich City ta a ni. Mikhual zawk hian minute 42-na ah an si phurh chu Pilkington-a hmangin an sut nghal a, hun tawp dawn minute 83-na ah Morison chuan Norwich City chakna goal a khung a, point 25 an hmu ta vang mai. Barton-a an hnawhchhuah hma hian QPR hian an khel tha zawk a, goal pawh thunbelh thei an ni a, mahse nungchang thatloh avanga buaina tawhna chang hria Barton a insum zo lo lehpek a, point 3 an hloh a, relegation zone hnaihah an la awm phah a ni.

Fulham 2-1 Arsenal
Away team chak zanah sawm-a khel Arsenal an chaklo a, goal thun hmasa mahse an lamah goal hnih a lut a, point 3 hlu tak mual neitu Fulham in an hmu.

Arsenal hian bul an tan tha zawk a, minute 22-na ah Koscielny hmangin goal an thun a, inkhel erawh an thunun chuang lo. Fulham hian an nawr tluan a, Arsenal defender-te an chesual teuh thei hle. Minute 78-naa hei hi a thleng ta. Bobby Zamora ball umlut lai chu mihang defender Djourou chuan a tih tluk avangin yellow card vawihnih a chawina a hmu a, hnawhchhuah a ni. Hemi hnu ah hi chuan Fulham hian an nawr tawm lehzual a, minute 86-na ah corner atanga ball lokal chu Arsenal goalkeeper Szczesny chuan a chum chhuak zo lova, ball lo let leh chu Sidwell chuan a tauh lut a, 1-1 a ni. Hun a tlem tawh a, minute 3 an pekbelh a, minute 92-na a kal mek. Kelly ball cross chuan Zamora a zuk deng a, a ni’n goalah a lo thun a, goal an chhuah hmasak hnu ah Fulhamin Arsenal 2-1 in an hneh ta a ni.