1990 August ni 12 khan Italy rama Palermo khuaah a lo piang a. A laiah hming chu Mario Barwuah (Baruah! a va vai hming ve!!) Balotelli a ni. Tunah hian England leh khawvela club hausa ber zinga mi Manchester City-ah a khel mek a, he thu ziah lai (3.1.2012) hian, tun season-ah Manchester City tan hian match 21 a khel tawh a, goal 13 a khung tawh. Kum 21 a upa a ni chauh va, field chhungah lehlam pawl defender-te tana a hnawksak ang bawkin field pawnah a buaipuiawm bawk a, a chanchin hi sawi tham a awm der tawh.

Football kalkawng:
Lumezzane club-ah professional football a khel ṭan a. Match hnih a khelh hnuah FC Barcelona-ah a trial a, a tling lova, 2007 khan Inter Milan a zawm. Roberto Mancini hnuaiah a che tha thawkhat a, mahse Mancini hian Manchester City a pansan hnuah a nungchang mawi lo a chhuak fo va. Coach thar Jose Mourinho hnuaiah hrem a tawk nual. 2009 January thla khan Inter first team aṭangin paihchhuah a ni a. 2010 ah chuan Italian TV show pakhatah Inter hmelma hlun AC Milan jersey ha chungin a inlan a, Inter fans ngei rawn a hlawh hle. 2010 August thlaah Mancini chuan Manchester City-ah a lalut a, hetah pawh hian player thawm na tak a nihzia a lantir chhunzawm zel. City-a a luh chiah hian Italian national team-a khel tura thlan a ni.

Ghana atanga pem an nih avangin Under 15 leh Under 17-ah Italy ram tana khel tura thlan a ni ngai lova. Kum 17 a tlin hma hretin Ghana senior tema-a khel turin an ko a, mahse Italy tana khel thei a nih huna khelh a duh thu sawiin a khel duh lova. 2008 August thlaa Italian citizenship a neih hnu lawkah Italy U-21 team-a khel turin koh a ni a. 2010 World Cup zawh hnu lawk khan Ivory Coast nen friendly an khelh tumin Italy Senior team tan a khel leh a ni.

Fahrah Balotelli:
Ghana atanga Italy ram mawi Sicily-a Palermo khuaa pem Thomas Barwuah leh Rose-te fapa Balotelli hian a naupan laiin pumpui natna a vei a, zai a tawk nasa hle. A hrisel loh avang leh an chhungkua an retheih avangin a nu leh pate chuan 1993 khan Francesco leh Silvia Balotelli-te chu enkawlsak turin an ngen a. A lo leikang a, footballer hmingthang a nih chhoh hnu hian a nu leh pa dik tak hian an hnena a awm leh theih nan an bei nasa hle a, mahse amah (Mario Balotelli) hian a nu leh pate chu, ‘Ropuina um’ tiin an bulah a awm duh lo. Balotelli chhungkua hian dan ang taka an lak (adopt) loh avangin Italy khua leh tui a ni thei lova, kum 18 a nih kum, 2008 August ni 13 khan Italy khua leh tui nihna pek a ni chauh.

U leh nau dik tak (biological siblings) pathum – Abigail, Enoch leh Angel te a nei a. Amah aia kum 2 a nau, a unaupa Enoch Barwuah phei chuan nikum (2011) December thla khan Stoke City-ah khelh tumin a trial ve nghe nghe a ni.

Player buaithlak:
Goal a khung thei em em a. Inter-a a khelh hnu hian Serie A ah goal a khung nual hnuin Champions League-ah 2008 November thla khan Anorthosis Famagusta nen 3-3 a an in draw tumin goal a khung a. Kum 18 leh ni 85 a upa a ni a, Champions League-a goal khung thei naupang ber a ni. A season khatnaah hian Inter chu Sere A ah a zawna a vawi 4 nan an champion a. Mahse season hnihnaah hian Jose Mourinho nen buaina an nei lian chho ta hle a ni.

2009 January thla khan Mourinho chuan Balotelli chu training-naah a ti mai mai deuh tiin a sawisel a. “Ani ang naupangin Figo, Cordoba leh Zanetti-te aia training tlem zawk a tum reng mai hi ka hrethiam lo,” a ti a. November thlaa Roma nen 1-1 a an in draw tumin Mourinho hian a player-te a sawisel chiam a, Balotelli phei chu a hminga sawilangin, “Khel lo ang vel a ni,” tiin a tangkai lohzia a sawi a. Senior player engemawzatin a mizia an ‘ei’ loh thu an sawi a. 2010 March thla a lo nih chuan, Italian TV show pakhat – Striscia la Notizia (Fiamthu mei-nei programme) ah AC Milan jersey ha chungin a inlan a, a hnuah ngaihdam dil leh mahse fans tam takin an ngaidam thei lo.

Hemi hnu hian, April ni 20, 2010 ah Barcelona nen Champions League semi-final an khelh \umin, Inter fans, amah au-eltute elsen nan a jersey a phelh a, lei vawm nan a hmang a; Inter fans-te chuan khawih an tum a, an buai nasa teuh hle.

Manchester City-ah a lut a. 2010 chhunga Europe-a U-21 player tha ber lawmman – Golden Boy Award a dawng a. He Award dawng tawh zingah Lionel Messi chiah amah aia tha an awm thu a sawi kher a! He Award dawng thei tura thlan ve, amah aia vote tlemtea hmu hniam zawk, Arsenal player Jack Wilshere chu a hriat loh thu a sawi bawk a, a ngeiawm thiam hle!

Manchester City a zawm hnu lawkah car chetsualnaah a hming a lang nghal a. An chetsual lai hian pound 5000 lai mai a lo ak a, Police-in an zawh chian chuan, “Ka hausa em alawm,” a ti vel niin an sawi!

A In luaha halpuah a hal chiam te, training-naa a team-mate-te nena an buaina te chu a lar em a, sawi belh tawh lo mai ang.

Thil tha titu:
Sudan ram chhim lam khaw pakhat – Cuey Machar-a Secondary School tan Balotelli hian tun hnai khan sum a thawh a. Hemi avang hian he School-ah hian ‘Mario Balotelli Wing’ siam a ni dawn.

Sudan hel pawlin a naupan laia ral do tura an man luih Kon Kelei-a’n ama nun behchhana film a siam, ‘The Silent Army’ a en hnuah Balotelli hian Kelei hi a be pawp a, Sudan ram tana a thahnemngaihnain a hneh em avangin he School tan hian sum a thehchhuak ta niin amah (Balotelli) hian a sawi.

December 2011 khan Manchester khawpuia a chenna bula Biak Inah kalin, pound 200 a va thawh a, chumi hnu lawk chuan intihhlimna hmun (Pub) ah kalin lehin, ‘Mas thilpek atan he Pub-a awm zawng zawng tan zu pound 1000 man a lei leh vel!

Mei zu mi:
Infiami dang ang lo takin Balotelli hian meizial a zu teh tlat a, hei hi City manager Roberto Mancini pawhin a hriatpui. “A zu tam lova, ni khatah tlawn 5/6 bak a zu lo. Nghei thei se chuan \ha ka ti a, mahse nghei luihtir turin a pa ka ni lo. A pa chu ni ila a mawngtamah ka pet pawp tawh ngei ang,” tiin Mancini chuan a sawi.

Manchester City manager Mancini chuan Balotelli nungchang chu a hriattthiam loh thu leh amah bik be tur hian tawnglettu hran lak hial mai a duh thu a sawi a, “A bulah pawh – ‘Engvangin nge buaina apiangah i lo awm ve ziah?’ ka ti a. Ani chuan, ‘Ka ni lo, buaina thlen lai hi ka muthilh lai te a ni thin,’ tiin min chhang. Mi mak a ni a, mi tha tak a ni, mahse ka hrethiam thei lo. Player ropui a ni a, a thiamna leh theihna hi a hrethiam lo. Wayne Rooney leh Cristiano Ronaldo te angin talent a nei a, mahse anni angin a fing ve lo. Anni hi chuan an inkhelh hun chhung rei lohzia an hria a, Mario hi chuan kum 40 a nih hmain a hria ang e maw?” a ti.