(Zofooty chuan Pu Francis Paul (Gerrard-a Pa) kawmna hun kan nei thei hlauh mai a, amah hi Mizo Football ngaina te chuan kan hre deuh vek awm e, a chanchin kimchang zawk te, Mizoram a football hmakhua a thlir dan te, Liverpool Fan Club chungchang te leh tunhnai a Liverpool in India ram a Academy an rawn hawn thar chungchang te kan zawt thei hlauh mai a ZoFooties te kan vannei kan ti a, a thukhaw chang i lo chhiar ho ang u- Team ZoFooty Admin)

ZoFooty Admin: Q 1. Chibai.A hmasa in i chanchin tawi te in min hrilh thei em?
Gerrard-a Pa = Ramthar Vengah ka cheng a, DDK Aizawl ah News Reporter hna ka thawk a, Sports Magazine programme ka enkawl mek bawk. LPS ah Sports programme pakhat Inside Football kan siam bawk. Liverpool FC Fan Club, India ah hian Chairman ka ni mek bawk. (Football commentary lam chu sawitel lo mai ang )

ZoFooty Admin: Q2. Football hi engtik atangin nge i tui tan a, i khel ngai em, eng position nge i favourite?
Gerrard-a Pa = Ka hriat theih chinah chuan KG ‘A‘ kan nih atangin ka khel a, naupan lai chuan thiante zinga te pawl tih takah goal ka veng thin. High School kal laiin School Games ah ka khel ve. College ah chuan Hrangbana College week ah ka khel ve thin a. Kum 5 kan kal chhung khan hneh kan nei lo. Boxing ah erawh 1997 khan Below 51 kg ah Champion keuh (ngaihawm khawp mai, cher lai). First Division ah ka khel ve hman a, Zemabawk club BCFC, a hnu-a BFC nita ah khan tel ve thin. Left wing-ah ka khel thin a, attacking midfielder ah ka awm thin bawk. Free kick atanga ka pet goal zat hi vawi 20 vel a ni ang. Lammuala grass an phah hnu hian zanah ka pet goal ve ngei tawh a, TV ah pekchhuah a ni ve ngat. Tunah chuan Mizoram Journalist Association leh Bin Laden FC ah striker ka ni mek.

ZoFooty Admin: Q3. Mizoram Football atan i tha leh zung i seng nasa tih kan hria a, eng eng ah te nge i telna te min hrilh thei em?
Gerrard-a Pa = Football ah hian ka tui em em a. Mizoram football hmasawnna tur atan hian theihtawk leh phaktawk ah ka bei ve nual. Club ka din a, manager, coach, captain leh thuber ka nia, mahni sum sengin tournament te kan khel ve thin. Tichuan kum 2006 vel atang khan MFA a, Technical Committee ah member niin kum 2008 khan Mizoram Sub Junior Team chu Mahilpur, Punjab ah ka hruai a, kan champion ve nghe nghe. Tunah hian Mizoram Football Assn. ah Executive Member ka ni mek a, Disciplinary Committee ah Secretary in ka awm mek bawk a, Mizoram State Sports Council ah member ka ni mek bawk. Aizawl Football Club (AFC) tharthawh lehna kawngah hian theihtawp ka chhuah ve a, committee member ka ni mek.

ZoFooty Admin: Q4. Mizo footballer te hi eng i hmuhdan dik tak min hrilh thei em?
Gerrard-a Pa = Ball vawi 20 pawh sep tling theilovin ‘ka thiam’ an ti hi chu ka ngaithei lo. Hmasawnna tur tam tak an la nei. Discipline, taimak, teirei peih ah te, midang el dan ah te hmasawnna tur a la tam hle. Talent leh potential chu an nei, mahse thleng sang tur chuan a chunga ka sawi ang khi an zawm a ngai chuan ka hria. India rama kan Mizo footballer te hian hma chu an sawn chak hle chuan ka hria a, an discipline pawh a tha a, ha var sar hlir an ni tawh. Mizoram-a kan footballer te erawh an la inthlahdah deuh.

ZoFooty Admin: Q5. Mizoram ah tunhnai ah Local football kan chawinung leh tan a, fans lam te pawn Mizo footballer te kan ngaisang chho tan ta a, Mizoram ah football a hmasawn theih dan tur ber ni a i hriat min hrilh thei em?
Gerrard-a Pa = Association, player leh fans te combination tha a pawimawh hmasaber a. An mawhphurhna san lam hi a inchen tlang hle. Lammualah gallery tha tak kan nei thuai turah beisei ila, infrastructure tha dang kan neih belh zel hi football hmasawn nan a tul takzet a ni. Media pawhin Mizorama football hmasawnna kawngah hian pawimawhna an nei a, kan mihausate pawh hian club leh player sponsor-na chang an hriat a pawimawh hle. Association hian mumal takin football league/cup/tournament hi kalpui se la, tuna an kalpui dan hi chu a beitham deuh chuan ka hria. Fans ten tha takin club leh playerte hi tawiawm thei bawk ila. Weekend (Saturday/Sunday) a kan inkhel ve hunah chuan entu an thahnem ang a, football in hma a sawn lo thei lo.

ZoFooty Admin: Q6. Liverpool fan i ni a (Gerrard-a pa ngat!), Liverpool Fc hi engtik atang a tan nge i nih min hrilh thei em, tun season ah Liverpool in player thar te an in lei nasa bawk a,an champion ngei i ring tawh em?
Gerrard-a Pa = Mary Mount School kan kal lai 1989 vel khan football chanchin hi kan sawi nasa thei khawp mai a. Kan thianpa-pa Dr. C. Biakmawia (Pneumonia Biakmawia) khan Liverpool ah thiamna sangzawk a zuk zir thu a sawi thin atangin Liverpool hming hi ka ngaina hle a, Bangladesh TV lamah an inkhel kan lo hmu ve thin bawk nen, ka ngainat a zual zel a, tun thleng hian a aia club tan ka nei ta lo a ni.
Player kan lei nual a, kan player neihsa leh kan leithar te hian tha taka an khelh chhoh theih chuan manager King Kenny hnuaiah hian kan champion ngei ka ring. Tunlai khawvela striker tha ber ber Luis Suarez leh Andy Carroll kan kawl a, midfield atangin pet goal thei thah Steven Gerrard, Charlie Adam, Stewart Downing, Jordan Henderson bakah striker thachhangdawltu tur Dirk Kuyt leh Bellamy te an awm bawk a. Maxi leh Lucas an la awm cheu bawk. Tlar hnung lamah Skrtel, Agger, Coates, Enrique, Johnson, Carragher te an la ding thrut bawk a, goalkeeper lah World Class goalkeeper Pepe Reina a lo ni bawk nen, kan tha tawk chuan ka hria. Naupang tha tak tak Kelly, Flanagan, Robinson, Spearing, Shelvy bakah Suso Fernandez te hi football kahwvelah hian hmuhnawm in la ti dawn khawp mai.

ZoFooty Admin: Q7. LiverpoolFC Fan Club India ah Chaiman ni lai mek i ni tih kan lo hria a, He fan club a lo din dan , engtik kum a din nge tih te mumal zawk in min hrilh thei em?
Gerrard-a Pa = Vawi engemaw zat thian hova kan sawi hnu ah, 15th August, 2007 khan Zalen Sunday chhuak chanchinbu Office, Treasury Square, Aizawl ah Liverpool FC Fan Club hi kan din a. Membership drive kan nei a, rin aiin member nih duh an lo tam a, Mizoram huap chauh ni lovin, India huap in kan ti ta hial a. Kum 2008 ah Anfield lam kan be pawp a. Association of International Branches-a kan in register pawhin Liverpool FC Fan Club, India, Mizoram tiin min lo ziaklut ta a ni. He Fan Club a hruaitu ni mek te chu:
Chairman : Francis Paul ViceChairman: Lalrinchhana Tochhawng, Secretary: Mary L Renthlei, Asst. Secretaries : Robert Hmar & Hmangaihsanga, Exchequer : Zonunthari. Heng bakah hian Executive member engemawzat leh Adviser engemawzat an awm mek.

ZoFooty Admin: Q8. Liverpool Fan Club ah hian member la nilo nih duh tam tak an awm kan ring a, heng te hi registration an tih theih dan tur te min hrilh thei em?
Gerrard-a Pa = LFC Fan Club, India a member registration hi tun ah hian kan hawng mek a, Sept-Oct thla chhung hian tih theih a ni. Membership application form hi Lawma Enfield, Sikulpuikawn leh Faith, Zodin Bus Stand ah te lam theih a ni a. Form fill up zawhah Rs.50/- nen heng dawrah vek hian thehluh leh tur a ni. Identity Card siam thar duh/siam tha leh duh tan Rs.30/- leh thlalak (passport size) copy khat nen thehluh theih a ni. Tin member ni sa ho pawh Annual fee Rs.20/- pek tur a ni bawk. Aizawl khaw pawn tan District Hqrs tinah mawhphurtu kan ruat anga chung mite hnena membership registration tih theih tura ruahmanna siam mek a ni.

ZoFooty Admin: Q9. Liverpool Fan Club hian enge a hmachhawp te a nei em, eng tia kal chho pui nge in tum?
Gerrard-a Pa = Dt. 1.9.2011 khan OB Meeting neih a ni a, Executive Member te ruat thar niin, dt. 7.9.2011 khan heng EM ten en hian meeting neih leh a ni a. Hmachhawp hrang hrang kan nei a. Website siam, Steve Mc Mahon Football Academy (SMFA) nena thawhho leh Inkhel (pawimawh bik)a huhova enna tur buatsaih te hi a langsar zual chu a ni.

ZoFooty Admin: Q10. Tun hnai ah Liverpool hrang hlui Steve Mc Mahon a ho in India (Delhi) ah Liverpool Academy hawn a lo ni ta a, an academy nen hian in contact na te in nei em, engtinge an kalpui dan tur te min hrilh thei em?
Gerrard-a Pa = Steve Mc Mahon Football Academy-Official Liverpool Football Academy din a ni tih kan hriat veleh biakpawh dan tur kan zawng nghal a. Facebook atanga contact theiin Liverpool FC Fan Club chungchangte Mizo player te football talent neih that zia te kan zuk hrilh a. SMFA aiawh hian Head of Operations SMFA, Sharandeep Singh in min rawn chhang a. North East India lama la rawn in zar pharh ngei an tum thu min hrilh. Tunah hian he Academy hi an la tan chiah lova. October thla atangin an tan dawn a. Kum 8, 10,12, 14,16 hnuai lam tan football a zir theih dawn a. Steve McMahon chu he Academy ah hian Chief Coach a ni dawn a, Head Coach atan Paul Masefield a awm anga. An hnuaia thawk tur NIS/AFC’C’ license nei Coach tan dil theih a ni mek bawk. Coach hna dil emaw, naupang lut turte chu Fan Club hian theihtawp chhuahpui a tum.

ZoFooty Admin: Q11. A nih leh mizo player (naupang) te tan kawngsial theihna awm thei ang em he Academy a lut tur hian?
Gerrard-a Pa = Awm tehreng mai. Mizo naupangte football-a an tui zia leh talent an neih that zia hi SMFA thuneitute hian an hriatchian phawt chuan Mizo naupangte hi zir turin an duh hle torah ka ngai. He Academy-a zirna tura sum sen ngai zatte a la hriat chiah lova. Application/Trial neih dan turte an website www.smfaindia.com ah en theih a ni.

ZoFooty Admin: Q12. A tawp na ZoFooty hi i lo tlawh ve ngei thin kan ring a, enge i hmuhdan te min hrilh thei em?
Gerrard-a Pa = Tlawh ve thin tehreng mai. Launch-na ah pawh khan ka rawn tel ve a. Hetianga football website Mizotawng ngeia a awm hi a lawmawm takzet ka ti a. Mizote hian midang tih ang hi kan tithei ve a ni tih a tichiang a, buaipuitu te in fakawm takzet. In hnathawh avang hian mi tam takin an hriatzau phah a, hmalam in panna kawngah duhsakna ka hlan a che u.

ZoFooty Admin: Hun tha tak min pe a kan lawm e.
Gerrard-a Pa = Ka lawm e. You’ll Never Walk Alone.