Mizo tlangval theihna chuan thui tak a kal thei a, mahse kawng hawnsaktu tur a mamawh. Amah mai chuan theihna nei mahse tuna thenkhat thlen chin hi a ni deuh mai. A nawlpuia India ram football-a kan tel ve theih dan kawng awmchhun chu I-League club neih hi a ni. Engtin nge kan neih ang? Kawng a va la ping em! Mahse, ti teh ang, tunhnaiah khelmual puitling kan nei a. Khawvela khelmual tha an sawi pawh sawi nep theih miah lo phul lem hmanga siam kan nei ve ta a, hei hian eng thleng nge min thlen dawn tih erawh, kan kutah, a neitu kutah a awm a ni. Mizo zingah hausa tia sawi tur an tam ve tan tawh hle a. Mahse kawng a la awm lo nge, a nachang an la hre lo nge, a la hlawk tak tak lo tih erawh an thu ah dah ta ila. Mizote football-a kan tuizia leh pawisa pawh ram dang atanga kan lakluh nasat tawh zia chhut chuan a game tihlar leh chawinun mai bakah Mizo \halaite dinhmun sang zawka kan dah theihna tura ke pen hi chu a hun tawh viau in a lang.

Tunhnaiah Aizawl Veng hrang hrangah football club hmasawnna ngaihtuah tu pawl hrang hrang an lo chhuak a, a awmsa an phur thar bawk nen, hmasawnna chikhat a thleng kan ti thei ang a, rei tak a daih ngei pawh beisei teh ang. Kan khelmual neihthat hian mipui a hip a, Mizoram pawna khel te pawhin rawn khelh an chak a ni. Chu tak chuan kan thalai-ah nghawng a tha zawngin a thlen a, hma pawh kan sawn reng a ni. Mizoram Football-a thu neitu sang ber Mizoram Football Association pawhin hma a la a, a phur a, chak takin hmathlir nei chungin a kal tih a takin la lang lo mahse an tum tih tlangkam atangin a hriat theih a, a lawmawm hle. Kan tu leh fate hian an theih a, mahse a kawhhmuhtu hi an that leh si loh chuan awmzia thui tak a awm thei mai thin lo a ni.

Aizawl Football Club, Aizawl South FC leh 1st Div. club awmsa an in tuaithar a, season thar chu khawiah pawh footballah inelna liantham a awm reng dawn a, chu chuan hmasawnna a thlen dawn a ni. Tunhma chuan club lian awm thin mahse tute emaw vangin a tawp leh mai thin a, hemi kawngah pawh hian association pawhin a tihtur mai bakah rilru zau tak a put a ngai dawn a ni. Kan ground in a zir a, I-League thleng thei tura hmalakna a puitlin phawt chuan club lam pawhin hmasawn an tum ang a, kawng hrang hrang an dap ang a, thui tak kalpui an tum ang a, Mizoram in hlawkna kan seng dawn thung a ni.