Mizo hnam hian infiamna chi hrang hrang a tuipui hle a, kan pumrua leh pianphung en hi chuan Tribal hnam infiamna kawnga theihna neih vak lo kan ang! Chuti chung chuan he HNAM, mi ngo Sap kan tihte’n chanchintha hmanga khawvel tukverha min daitir te hi, infiamna kawngah kan nep lo hle mai. Kan ram, India-a mihring chen tlemna ber ram pahnihna zinga State kilkhawr ber te zinga mi MIZO hnam hian he Ram India hi a tihmingtha tlat thung si. Tribal hnam tia min kawk tu India ram chhunga hnam hrang hrangte hian tunah chuan min hmusit ngam tawh bik lovang, engvang maw ? Kan Mizo Footballer te an zingah dinhmun duhawm tak luahin a awm a lawm! India ram tana goal khungtu an tih chuan kan Mizo tlangval te hming lam rik a ngai tlat, a van nuam em !

Kei veng hmawr tak, Gerrard-a Pa leh Lalzarzova te’n mi zawng zawng kawmthlanga in awm min ti, a pawi lo. Zofate Stadium nghahhleh Rajiv Gandhi National Stadium-kan hnaih tho! Zama’n duhdah takin min ko mahse Football vanga in thian kan ni, a rukin ka nui var var zel. Tato-a (Zonet) pawn veng hmawrah awm mahla i skill a tha min tih kha maw! A tawngkam hi ka ngaihtuaha, Ground Duty lamah ka lo tha reng a nih kha! Football vang vek a lo ni.

Mizote hian Football hi kan ngaina a, hmuhnawm pawh kan ti. Infiamna khawvel-ah chuan kan ngaihhlut ber pawl te zing ami a ni ngei ang. Veng leh Veng, khua leh khua inkhel en tura kal te chuan thubuai hla buaiah insual kan peih ran a, mahni tan zawngte inkhelh ni phei chuan kan inchhungkhur khawsak pawh thlathlam thak khawpin Lammual kan pan ngam. Hei hi Football vang a ni. Zofate’n ball pet kan ngaina a, Ball Boy-a tan tak ngial pawh thenkhat tan chuan thil hlu tak a ni zel. Kawngpui lun lai leh kawttler lun lai deuhah han kal ila, Assam riffles Canteen-a zawrh ni awm tak Ball par pet hmuh tur an awm tlangpui. Hei hian Football-in Zofate thinlungah zung a kaih nghehzia a ti lang chiang hle awm e.

Leichara inkhelh hun lai atangin Phai tual hnim phah hun thlengin Lammual-a inkhel a awm chuan entu mipui kan thahnem thei hle a. Khuan pui leh Banner, thuziak tha tak takte nena fehchhuakin kan players tan turin kan thawkchuak thin. Football chuan min van han hneh em! Tanzawngte chak loh ni a herchhuah phei chuan tap chhuangin Lammual kan chhuahsan hlawm thin a, rilru nat vanga kotlang lama Field lam hawia ngawi renga ding tawk lah bo lo. Football chuan mihring nun a tihlim a, tahna ruam a zawh tir thin bawk, game ropui tak a va’n ni teh lul em! Lammmual-a inkhel hmuhnawm tak a awm ni phei chuan Zodin Bridge-ah thalai leh kum upa lam zawkte hmuh tur an tam a. Kolkatta Salt Lake Stadium-a tlai lama vai dawr kai inhawrkhawm te pawh kan ang lek lek a lawm le. Thalai, chhungkhat pa meuh pawh a ding vung thin, Football vang zel a ni.

Tunlai huna phei chuan kum upa lam te pawh Lammual kiltina thutna hmun velah hmuh tur an awm a, ni sen sa hnuaiah kan Local football players te inkhel en turin kan fuankhawm tlang thin a nih hi. Football vanga Lammual-a hun hmang tute thinlungah hian Football hi a nep thei lo. Tunlai phei chu MPL Play-Off khelh a ni a, a zova I-Day Invitation Football Tournament-in a zui a, phai lam club te chah lutin kan tualzawlah ngei mai an inkhel hmuhnawm tak kan en a ni. A ni telin inkhel en tu an tam a, tan zawngte jersey rawng kawr hain Lammual leh a chhehvelah chuan Zofa Football ngaina tu an pungkhawm thin. Mizote’n India ram chhunga Football level sang ber I-League inkhelha Mizo tlangval awm ve se kan tih chu atakin a thleng chho mek a, India ram club lian thenkhatah te chuan kan mizo tlangval te an ther fur ta mai. Mizo nih a nuam a, Mizo hnam nih kan tlangvalte vangin a zahpuiawm loh a ni.

Heng mai bakah hian Football hmanga eizawn tum Mizo thalai thahnem tak an inbuatsaih mek a, tun hma kan hranghlui te hun lai kha chuan Level sang taka inkhelh hmuh tur awm lo mah se khang hun lai kha Mizo Football par vul lai a ni thung a. Tun hun erawh hi chu Zofate’n Football khawvel-ah hming kan chher hun a ni tan ta. Mizo te hian Football kan ngaina a, tunhmaa Football pet phal lo thin nu leh pa te chuan an fate inkhel enin lammual ko tlang an mawi ta! Hmasawnna a van tam tawh em. Kan Local Footballer te ball pet chu in lamah TV lama thuneitute’n tihchhuah tlaka ngaiin min hlui bawk a, Football hian mi tam tak a hip khawm mek zel a ni.

Mizote hi in ngaisang lo hnam kan ni a, chu thinlung erawh chu Football ah chuan a awm lo tlat thung! India tana kan Mizo tlangval Jejea’n goal an khung meuh chuan, hahipin kan sawi a. Zofate thinlungah India Football chuan hmun a chang thuk hle. Kolkatta Derby ah Mama tawngtai lai zet chuan naupangte thinlung a luah hneh hle. India-in a ngaihsan Cricket khel en peih lo an tam lai hian Lammuala veng leh veng Football inkhel en an khah tlat atang pawh hian Mizote thinlungah Football hian zung a kaih thuk zia a chiang a ni. Thenkhat chuan sum a awm lova, awmzia awm lo tih chu Kum 2012 atang chuan nuai bo a ni tan dawn ta! Heng baka thu lawmawm hi a awm dawn chuang emaw ni le?

MPL chu kan hmalawkah Zonet leh MFA tangkawpte’n an chhawpchhuak dawn ta rup mai le. Football ngainatu, football thlipuiin a nuai Zofate chuan he hun hi kan nghakhlel tlang a ni. Kan Mizo tlangval te’n Mizoram ngei mai ah eizawnnan ball an pet tan dawn ta. Mizo Club dintu/neitute mawlh mai hi fak an van phu em! Heng club dintute hi an hausak vang leh an neih bik vang chu a ni hauh lo ang le. Sum leh pai thahnem tak hmangin thalaite eizawnna tur atan he Football hi an chhawpchhuak ngam a, vawi khat dam manah midang tana malsawmna ni tura sum tam tak seng ngam Club dintute hi fak an phu a, fak tlak an ni. Mizoram chhungah chuan pawl infiamna huam chhungah chuan a hautak ber pawl pawh a ni ngei a, mahse Football chuan mi thinlung a hneh a, Zofate rilrem infiamna chuan mutthlu a kaitho zel e.

MPL a lo thleng dawn a, chumi hma chuan kum lama naupang zawkte tan Games buatsaih a ni ang a, MPL khel tur Team anga buatsaih an ni dawn. FIFA games te pawh a awm chho dawn a ni awm e. Zoram chhung infiamna huangah chuan a hmasaber anih hmel, hei hian Football-in Zofate thinlungah zung a kaih ngheh zia a ti lang chiang hle a ni. Kan Players te pawn hmasawnna tam tak an nei ta. Kan inkhelh dante chuan level sang zawk a thlir tih a chiang a, India ram chhungah na na na chuan kan zahpuiawm lo zia an tilang a. I-League khel turte pawn min chai theih bik loh zia kan hmuh khan Mizote hian I-League Club kan la nei ngei dawn tih hi ka ring tlat a, ka beiseina a ni bawk.

MPL ka nghakhlel. MPL lo thlengtur hi Mizo Football fans te tan chuan thu lawmawm tak a ni. He hunah hian Local Football players tha tak tak an rawn inlar dawn a, heng baka hun tha leh lawmawm hi Football ngainatu tan chuan a awm awm love. Inkhel tin hi hmuhnawm tura beisei vek an nih avang leh lawmman inchuh a nasat dawn em avangin hian he hun hi ropui dang dai bik dawn tih alang chiang a. Football vangin Lammual a reh leh dawn ta lo. Sawi tur tam tak a awm, kan hun neihin a daih silova, engpawhnise MPL lo thleng turah hian I tan zawngte tan au la, khuang vua la, lam rawh. He hun hi a hlu a, buaina leh intivei taka mi ngaihsan vak loh nih ai chuan Lammualah kal la buaina siam lovin ” The Beautiful Game” chhim ang che.