MK-a’n FC Goa a zawm – Zara

Aizawl FC winger H. Lalmuankima chuan Indian Super League club FC Goa a zawm a, I League lamah Bawngkawn tlangval hmuh tur a awm dawn tawh lo.

MK-a hian AFC-ah nikum December thla thleng khan contract a nei a, Mizo club hian contract zawrh mah se ISL club sawmna a mawm that zawk avang leh chona thar hmachhawn a duh avangin FC Goa pan a thlang ta zawk.

AFC winger MK-a hian Paulo Meneses hnuaiah hmun pawimawh changin I League match nga an khelh tawhah inkhel bul a tan vek a, Minerva leh Gokulam an hneh tuma hun tawp lama an thlak tih loh chu a khel tluan vek bawk. Hei bakah hian MK-a hi MPL6 khelh zawh takah khan goal nga khungin best forward-ah thlan a ni a, ISL club tan pawh khelmual chhunga chet dan hi hmuh hmaih theih a ni lo.

A sulhnu chhui ang

ZoFooty-in tun season I League a thlir lawkna atana hming a lam ngun ber ang hiala sawi theih chu H. Lalmuankima a ni. Tualchhung football ngainatute chuan MK-a chanchin sawi tur kan hre theuh ang, tun season-a a chet thatna pathum kan han tarlang ang e.

1. Goal & Assist Vs Chhinga Veng FC
Chhinga Veng FC-in MFA Super Cup leh I Day Football nomawi an chawi hnuah MPL match match 10 chhung hneh loh an tawng lo, Chhingcows hian match 22 chhung hneh loh an nei lo tihna a ni.

October 26, Ningani tlaiah Aizawl FC leh Chhinga Veng hi an inhmachhawn a, minute 16-na lekah H. Lalmuankima hian box pawn atangin kum lut pawpin a pet a, Chhingcows keeper Zothanmawia’n chet ngaihna a hre lo. T. Mawia hi a awn riai riai a, thu tawp a, MK-a goal khung lai hi a en liam. Injury time-ah MK-a hian Jonathan Lalrawngbawla goal khung tur a siam sak leh a, 2-0 in an chak.

Chhinga Veng kal fawr lai chu MK-a hmangin Aizawl FC-in an titawp a, Bawngkawn tlangval hi man of the match-ah thlan a ni.

2. Goal Vs Mizoram Police
MPL6 Semifinal second leg-ah Aizawl FC minute 14-na lekah H. Lalmuankima hmangin hma an hruai lehnghal a, Mizoram Police-in minute thum hnu lekah sut leh nghal mah se MK-a hi a khel tha tluan. Police tlarhnung tan harsatna a siam a, Lammuala MK-a khelh that ber tum ang hialin a sawi theih.

Penalty pet a tul a, AFC tan MK-a panganaah pen chhuakin chakna goal khung nan Panenka kick a hmang – mawi danglam ve tak chu a ni. Hemi tum hian MK-a hi man of the match a thlan a ni. A penalty pet lai hi youtube-ah (https://www.youtube.com/watch?v=6z9cA1iRbjY ) a en theih a, minute 22:25 na atanga en a fuh ang.

3. Assist vs Gokulam
Aizawl FC-in December 31 tlaiah kum 2017-a an match hnuhnung ber ni turin Gokulam an hmachhawn a, 1-0 hma hruai hmasa mah se khualmuala khel an nih avangin an dinhmun a la him lo. Minute 52-naah MK-a chuan ball chak taka la chhuakin thui tak a khelh hnuah Andrei Ionescu goal khung turin a siam sak a, Romanian midfielder-in chak nemngheh nan a hmang.

Gokulam hi MK-a match hnuhnung ber a ni ang tih ngaihtuah pha an awm a nih pawhin ZoFooty lam chuan an hre pha lo. Aizawl FC tan MK-a hi channa nasa tak a ni dawn a, chutihrualin ISL lamah pawh tha taka khel turin duhsakna kan hlan nawn e.

Posted in Aizawl Football Club, Analysis, I-League, Ramchhung, Tualchhung.

Leave a Reply

Or