MPL 6 : GOAL LI THUNIN CHANMARI AN CHAK

Zanin khan Mizoram Premier League Round 3 inkhelah Chanmari FC in Mizoram Police FC 4-1 in an hneh. He inkhelah hian Rochhingpuia, Vanlalbiaa Chhangte, Joe Zoherliana leh Lalmuanzoa te’n Chanmari tan goal thunin Mizoram Police goal awmchhun hi Lalsangbera thun a ni.

Inkhelh hma chanchin

Chanmari FC in game hnih an hmachhawn tawhah point 4 hmu in tlawm an la nei lo a, chutih rualin goal hnih chauh an la thun avangin lawmna chi a ni lo. Inhliam vangin an keeper tha Lalmuanawma bakah an goal thuntu pakhat zawk Jakob Vanlalhlimpuia chu hrem a tawh avangin an chhawr thei lo a, mual lai luahlum turin Rochhingpuia hliam a dam tawh thung.

Tialthawnga enkawl Mizoram Police in game hnih an hmachhawn tawhah point khat chauh an la hlawhchhuak a, heng inkhelah te hian F.Lalrinpuia’n goal khat ve ve thunin midangin goal an la thun thei lo. Police tlarhnung hi a phui lo tih lanchianna chu game hnih atanga goal nga ngawt an chhuah tawh hian a nemnghet awm e.

Goal nga luhna inkhel

Inkhel tan atangin team pahnihte an innawr tawk a, chak mamawh zawk Mizoram Police in ‘half chance’ nei leh zauh thin mahse Chanmari keeper MS-a lungphu an ti rang pha lo. Minute 9-naah inhliam dam hlim Fakzuala’n goal thunna remchang a neih chu a hmang tangkai zo lo a, Valpuia pass chu box pawn atangin goal-ah a chantir thei lo.

First-half a tawp tep tihin Venghlui tlangval Thasiama’n veilam kil atanga ball a vawrh chu ‘far post’ a lo chang Mabiaa’n tuma ven loh karah hnai set sawt atangin goal-ah a chantir thei lo.

Second-half minute 48-naah Police defender TC Vanlalhruaia’n Chanmari striker Alex Whittemore a kuai tlu a, penalty an chawi. Chanmari fapa rangkachak Rochhingpuia rawn pen chhuakin an goal hmahruai a thun.

Goal an thun hnuah H.Vanlalthlanga naute an khel tha sawt a, an goal hmasa ber an khung hnu minute 10-ah khel tha tak Thasiama’n a ke dinglama ball-a vawrh chu Mabiaan keeper Tpa a lak khalh a, Hriangtlang tlangval hian an goal hnihna chu box chhung atangin a ke veilamin awlsam takin a thun zui.

Police tlarhnung a pawp lak lawh a, Chhinga free-kick ball kal zel chu Lengpui tlangval Joe Zoherliana’n hnai set sawt atangin a lo thun a, 3-0 a ni ta. Si thum phur tawh mahse tlawm mai tum lo Police lamin Armed Veng tlangval Fakzuala lachhuakin striker tlanchak Sangbera an luhtir a, Dawrpui tlangval luh hnu lawkah hian Valpuia pass tha zet chu Fakawma’n keeper chiah a hmachhawn tawh tihin an siphurh sut nan a hmang tangkai zo lo a, Biaktea’n box chhung atangin goal thunna remchang a hlah bawk.

Minute 66-naah erawh Chanmari defender Thomas Lalengkima’n box chhungah Valpuia a ti tlu a, bench atanga lut hlim Sangbera’n keeper MS-a bumin chiang takin keeper dinglamah a thun. Chak hmel la hmu lo Police-in an nawr chhunzawm zel a, Manunga free-kick tha zet chu Valpuia’n hnai set sawt atangin goal kham chungah a thlawh. Chanmari in an winger tlanchakte hmang tangkaiin injury time-ah Mabiaa’n mahni hmasial lo takin a thianpa Muanzoa tan goal thunna hun remchang a siam sak a, 4-1 in champion laiin hnehna an chang.

Sawi zui ang

Inkhel pum pui thlirin Chanmari an chungnunna a tam lo a, Police vanduaina a kaltluang. First-half ah leh si an phurh hnu thlengin goal thun theihna hun remchang tak tak an hmu fo a, amaherawhchu an hmang tangkai thei lo. Fakzuala, Fakawma leh Biaktea te ke aikhirh a kaltluang a, an set-piece hmuhte an hmang tangkai thei lo kha an ui khawp ang. Police hian game thumah goal 9 ngawt an chhuah tawh avangin an tlarhnung hi an rem phui vat lo a nih chuan MPL tan tirhah team tha ber pawl hi ‘point box’ ah an chhuak mai ang tih a hlauhawm.

Chanmari FC in second-half ah goal 4 an thun theih avangin an lawm viau ang a, chutih rualin an Liberian striker Alex Whittemore-a’n penalty hlawhchhuak mahse second-half ah keeper chauh a hmachhawn tawh tihin goal a thun thei lo. First-half ah inhliam vangin midfielder Muanzuala lakchhuah ngai mahse an game-in a tuar phah lo a, Muanzoa aia lut man of the match ni zui ta Thasiama a khel tha takzet. Chanmari hian an winger tlanchak Mabiaa leh Thasiama te hmangin vawi tam tak Police tlarhnung tuam fum tawhte an rum thaih a, chu chu zanina an chakna hnar ber niin a lang.

ZoFooty Statistics
Chanmari FC 4-1 Mizoram Police 
Rochhingpuia 48’(pen) Vanlalbiaa Chhangte 58’ Joe Zoherliana 60’ Lalmuanzoa 90+1′ – Lalsangbera 66’ (pen)

49% Ball Possession 51%
15 Shots 16
7 On Target 5
0 Yellow Card(s) 1
0 Red Card (s) 0

Man of the Match : Lalthasiama (CFC)
Powered by Rainbow Multibrand Mobile Showroom

(Pic : Mizoram Premier League)