MPL 6 : NAKTUK LAMMUAL PAN NI

Chhinga Veng FC lakah Aizawl FC in point thum an hmu thei a nih chuan semi-final an hnaih lehzual ang a, Bethlehem Vengthlang lakah Dinthar FC an tlawm a nih chuan MPL champion hmasa ber hian semi-final luh aiin in ham tan tum a tan an lak a tul tawh ang. Hei hi naktuka MPL Round 11 inkhel tur boruak chu a ni.

3:00 pm Chhinga Veng FC vs Aizawl FC

Hneh loh nei lo a game 22 chhung khelh theih hi a ropui a, chutih rualin recod ringawt hi inhnem nan a hman chuan min ti chhetu a ni palh thei. MPL6 a hneh loh la nei lo awmchhun Chhinga Veng leh Aizawl FC te inkhel turah hian tun season-a kan la hmuh tam loh ‘game class sang’ tak kan beisei thei ang.

Phase 1-ah khan team pahnihte hi 2-2 in an inhnehtawk a, khami tum khan Chhinga Veng siban nghaktu Zothanmawia chu man of the match atan thlan a ni. Lalsangzuala Hmar naute hi an tlarhma an hriam a, tun season MPL-ah goal thun tam ber leh goal chhuah tlem ber ni mahse match 10 an khelh tawhah match 3 chiah ‘clean sheet’ an neih theih avangin I-League champion lakah hian point thum hmuh an tum a nih chuan an tlarhnungte an khelh that a tul ang.

Andrei Ionescu leh Masih Saighani te awm hnuah Paulo Menezes-a’n a player thenkhat a siksawi a, Romanian midfielder leh William Lalnunfela te’n hmun pawimawh an chan hnuah Phase 1-a Chhinga Veng laka goal thun tu K.Lalthathanga leh Jonathan Lalrawngbawla te kan hmu tam tawh lo. Tunhnaia khel tha tluang tak Aizawl FC hi an hnuaia mi te’n an um ve reng avangin semi-final lut turin an dinhmun a la him bik lo a, hneh theih loh ang hiala ngaih Chhinga Veng hi an hneh a nih ngat chuan ‘India ram champion nge nge’ kan ti thei ang.

7:30 pm Bethlehem Vengthlang FC vs Dinthar FC

Inkhel hmasa zawkah inkhel hmuhnawm kan beisei thei ang a, a hnuhnung zawk hi a nghahhlehawm thung. BVT hi tunah 5-na ni mekin point 12 an nei a, Dinthar hian point 8 neiin 8-na an ni a, relegate thei dinhmunah an ding mek. Phase 1-a an inhmachhawn tum khan 2-2 in an inthathen a, Dinthar striker Jackson Victor chu man of the match atan thlan a ni.

BVT hian MPL6 ah bul tan tha mahse tunhnaiah an khel chhe hle a, a zawnin vawi thum an tlawm tawh bakah heng match thumah te hian goal 10 zet an chhuah. Chawngthansanga naute hian hnehna an chang zo lo a nih chuan an hnuaia awm point 11 nei ve ve Chanmari West leh Ramhlun North te’n lehpelhna remchang an nei dawn a, point thum an hlawhchhuak a nih erawh chuan semi-final luhna kawng a kaw zau leh sawt ang.

Dinthar FC in coach atan a Vanlalrova an lak hnuah vawi khat chakin tum hnih an tlawm. An match hnuhnung berah Chhinga Veng an lehthal zo lo a, 3-2 in an tlawm. Hemi hma hian own goal vangin point thum an hloh tawh bawk a, hrem tawh vanga an midfielder pawimawh Clarence Carter chhawr thei lo tur Dinthar FC tan naktuk zan hi an vanneih zan a ni ve tawh ang em ?
MPL1 champion hian player an nei chhe lo a, Lammuala an fans rinawm thin ‘Maimawms’ te’n an rawn tawiawm that a point thum an hlawhchhuak a nih chuan semi-final an sawi ri thei ang a, hnehna an chang zo lo a nih erawh chuan inhamtan tum a an beih a tul tawh ang.

Posted in MFA, MPL, Tualchhung.

Leave a Reply

Or