MPL CHAMPION THAR CHHINGA VENG FC

Chhinga Vengin R.Malsawmtluanga goal hmangin Mizoram Premier League nomawi an chawi. Zanina inkhel boruak sang takah Chhinga Veng hian Aizawl FC 1-0 in an hneh a, a vawikhat nan Mizorama football inelna sang berah an champion.

Tute nge khel ?

Chhinga Veng FC (4-1-4-1) : Zothanmawia; R.Laldinliana, Lalrinchhana Tochhawng, K.Lalthlahlova, Hmingthanmawia; Lalrinchhana; Laldampuia (Laldingngheta 88′), MS Dawngliana (Malsawmfela 77′), R.Malsawmtluanga, , Lalrammuanpuia; Lalkhawpuimawia

Subs : R.Lalhmangaihzuala, Lassisi Adeyami, Ramfangzauva, Olumide Olawale, Joy Mrong Kharraswai, Lalchhuanpuia, Vanlallawma, Laldingngheta, Malsawmfela

Aizawl FC (4-3-2-1): Avilash Paul; Lalrinzuala Khiangte, Masih Saighani, Lalhriatrenga (Hmingthanmawia 83′) Lalramhmunmawia, H.Lalbiakthanga (Lalruatfela Zote 58′) David Lalrinmuana,  K.Lalthathanga; Albert Zohmingmawia (Jonathan Lalrawngbawla 77′), William Lalnunfela, H.Lalmuankima

Subs : Lalawmpuia Hnamte, Paul Ramfangzauva, Ramdinsanga, Lalruatfela, Jonathan Lalrawngbawla, Jonathan Lalhriatkima, Hmingthanmawia, Lalrozama Fanai, Lalawmpuia

Match referee : C.Lalruatkima
Assistant referee : Lalhriatliana & Alvin Lalramnghaka
Fourth official : Lalrawngbawla Renthlei

A goal nghal e

Inkhel tan veleh Chhinga Vengin an nawr nghal a, Aizawl FC in an inrin hmain goal an chhuah. First-half ah Chhinga Veng midfield general R.Malsawmtluanga a tal na a, vawi engemawzat Aizawl FC tlarhnung a rum thaih.

Minute 2-naah Lalrinzuala Khiangte ball pet fuh loh kal zel chu Laldampuia’n cross in Avilash hian a beng per a, Lalrammuanpuia tan ball thaah a chhuak teuh hle.

Tun MPL-a minute zawng zawng la khel kim vek Aizawl FC right-back Rinzuala’n leirem a rap thei lawk lo a, a tihsualah Dampuia’n ball la in R.Malsawmtluanga tan ball tha a chhawp a, MS-a’n box chhung atangin goal hmahruai a tauh lut.

Hemi hnu lawk hian corner atanga ball kal Lalrinchhana Tochhawng in a tauh lut tep a, lut ngat se Aizawl FC tan hna a siam belh ngei ang.

A tir minute 20 chhung velin MS-a’n tum hnih a thun leh teuh hle a, a free-kick pet Avilash-a’n a nam per bakah Dampuia ball chhawp a thun thelh.

Aizawl FC in an player neih that chhawrin an game a kang hret hret a, ruahsur hnuaiah David Lalrinmuana ball khawih vel a hmuhnawm a, Aizawl FC innghahna ber a ni.

Minute 24-naah Davida free kick pet hi Masih Saighani an tauh mahse goal sirah a kal a, ball man tum a rawn tlanchhuak Chhinga Veng keeper Zothanmawia a mualpho teuh hle.

Chhingcows tan K.Lalthlahlova ball tauh chu Avilash-a’n a nam per hnuah goal kham a per a, Msa ball pek chu Lalkhawpuimawia’n box chhungah umlutin Avilash bawk a rawn inrawlh hman.

Minute 45 chhungin Chhinga Vengin goal zawnah vawi 6 an pet hman a, Paulo Meneses-a naute’n T.Mawia man turin ball pet an nei lo.

Goal khat a tawk

Chawlhlawk zawhah team pahnihte an indangchat tawn a, chungnung zawk sawi tur an awm lo. Aizawl FC tan Davida leh Mka te an langsar mahse Dinliana leh Rinchhana te an paltlang thei lo.

Minute 68-naah a ball lak nalh zet chu David Rinmuana’n box pawn hret atanga petin T.Mawia’n a nam chhuak thei hlauh. Aizawl FC in corner petin pen hnih vela hla atangin Masih Saighani chuan keeper zawnah ball a dah. Hun tawp dawn hnaiah Afghan defender hi striker angin a khel zui a, Aizawl FC in goal an mamawhzia a lang.

Minute 80-naah Chhinga Veng defender Hmingthanmawia’n box chhungah William Lalnunfela a titlu a, TV replay atanga enin penalty ni ngeiin lang mahse inkhel thununtu C.Lalruatkima’n a hamrik a ham lo.

Hun tawp dawn tepah penalty hlawh chhuak lo William-a’n red card a hmu zui a, inkhel boruak tang ru tak karah goal luh belh lohin Chhinga Vengin 1-0 a hnehna changin Mizoram Premier League Season 6 champion an ni ta a ni.

Inkhel thlirna

Chhinga Veng coach Lalsangzuala Hmar in huaisen takin a striker tha Malsawmfela bench-ah a thuttir ngam a, inkhel tan phatah a player che rang te hmanga nawr nghalin an duh ber goal an hlawhchhuak.

An champion theih nan R.Malsawmtluanga’n goal a thun bakah a khel tha a, Laldampuia’n tlarhnung a puih that bakah Aizawl FC forward hlauhawm H.Lalmuankima thlau daitu R.Laldinliana te sawi hmaih chi an ni lo.

Aizawl FC in penalty an hlawh chhuah loh avangin an vanduai a, chutih rualin champion phu khawpin an game a tha tawk lo. Inkhel tan phatah an talbuai nghal a, insiamrem hret hret mahse nidanga an game an pha lo.

Inkhel pumpui thlirin referee thutluknaah sawi zui tur awm mahse Chhinga Vengin chak an phu a, MPL7-ah ‘champion lai’ tiin kan sawi thei tawh ang.

LAWMMAN :

Champion: Chhinga Veng FC (6 lacs +Trophy & medal)
Runners Up: Aizawl FC (3.5 lacs)
Fair Play Award: Bethlehem Vengthlang FC (₹20,000/-)

Top Scorer: Lalfakzuala (10 Goals), Mizoram Police FC
Best Goalkeeper: F. Lalmuanawma, Chanmari FC
Best Defender: R. Laldinliana, Chhinga Veng FC
Best Midfielder: R. Malsawmtluanga, Chhinga Veng FC
Best Forward: H. Lalmuankima, Aizawl FC
Best Player: R. Malsawmtluanga, Chhinga Veng FC.

ZoFooty Statistics

Chhinga Veng FC 1-0 Aizawl FC
R.Malsawmtluanga 5′
Red card : William Lalnunfela 90+2′

47% Ball Possession 53%
13 Shots 10
7 On Target 6
3 Yellow Card 4
0 Red Card 1

Powered by : Rainbow Multibrand Mobile Showroom

Posted in MFA, MPL, Tualchhung.

Leave a Reply

Or