MPL: CHANMARI FC LEH AIZAWL FC INKHELAH CHAK ZAWK AWM LO – Rooney Opa

Zanin khan Mizoram Premier League Season 6 inkhelah Chanmari FC leh Aizawl FC te an inhmachhawna, goal khat ve ve inpe in an inhnehtawk. Vawi hnih ve ve champion tawh inkhelah hian Chanmari tan Lalmuanzuala hmangin an thun hmasa a, Aizawl tan David Lalrinmuana chuan a sut a ni.
.
Tute nge khel?
Chanmari FC (4-1-4-1) : Lalmuanawma (Malsawmdawngliana 52′); Thomas Lalengkima, C.Lalrosanga, Joseph Lalnunpuia, Joe Zoherliana; Lalmuanawma; Vanlalbiaa Chhangte, Lalmuanzuala, Joseph Lalfakzuala, Lalmuanzoa; Alex Whittemore
.
Subs : MS Dawngliana, Rochhingpuia, Zothansanga, PC Zosangliana, Zomuanpuia, Lalnunzama, Thasiama, Lalmuanawma, Lalruatfela.
.
Aizawl FC (4-3-3) : Avilash Paul; Lalrinzuala Khiangte, Lalhriatrenga (Achia), Kareem Nurain, Lalrozama Fanai; Alfred Jaryan, David Lalrinmuana, K.Lalthathanga (Puitea); Rochharzela ( Lalawmpuia Hnamte 67′) Jonathan Lalrawngbawla (Lalruatfela Zote 80′) Malsawmtluanga Shylo.
.
Subs : Lalawmpuia, Ramdinsanga, Lalawmpuia Hnamte, Paul Ramfangzauva, Lalruatfela Zote, William Lalnunfela, H.Lalbiakthanga, Vanlalthazuala, Jonathan Lalhriatpuia.
.
First Half-ah goal hnih:
Inkhel hmuhnawm takah Aizawl lamin goal thun theihna hun tha an hmu hmasa zawk a, minute li lekah Chanmari defender Rosanga ball pet thelh chu Jojo-a chuan cross in hnai set sawtah Puitean a lo thun lo hlauh. Mual lehlamah Aizawl defender Achi-a a chesual teuh hle a, ball a nghahna lamah Muanzoan lak khalhin a thun thelh a ni.
.
Minute 26 a ni a, Chanmari lamin mual laiah freekick hmu in Rosanga chuan a pet a, hei hi Aizawl defender te inringthulin hmun him lamah an thawn hman lo a, Chanmari West FC atanga Chanmari FC pantu Muanzualan goal-ah a lo chantir.
.
Chanmari tan Liberian striker Alex a tangkai hle a, a ball pek atangin Muanzoan a thun thelh a, a hnuah ama ball khalh an tihtluk atanga referee in advantage a pek atangin Mabiaan a thun teuh hle bawk. Goal line atangin Achian a pet chhuak hram a ni.
.
Aizawl tan East Bengal atanga lokir David a pawimawh leh tan a, a shot tha tak mai Muanawmana dan hnuah chawlhlawk hma hretin Rozama freekick vawrhluh a lo thun a, an siphurh a sut. Hetah hian Chanmari goalkeeper Muanawma a chesual a, Rozama freekick hi a lo hnek thelh avanga lut tiin a sawi theih ang.
.
2nd half a dul:
Chawlhlawk zawkah team pahnihte an tangin boruak tang hle mah se goal hlauhawm sawi tur a awm mang lo a, Chanmari striker thar Alex leh Aizawl defender Kareem te indang a hmuhnawm thin hle.
.
Chawlhlawk zawha chance tha ber tih theih Aizawl striker naupang Jojo-an hmu in a pet lut lo a, Alfred shot atanga Chanmari keeper Muanawma thlaktu Msa dan per chu lo changin goal-ah a thun thei lo a, a chet ran tawk loh vangin Chanmari defender ten an rawn tibuai hman a ni.
.
Hemi hnu hian Jojo bawk hian chance tha hmu lehin Msan a dan sak leh a, huntawp dawnah goalkhungtu Mza ball tauh chu goal line atangin Aizawl defender ten an tauh chhuak bawk.
.
Huntawp thlengin goal dang a luh belh lo a, team pahnih ten point khat ve ve an insem a tul ta a ni.
.
ZoFooty Statistics:
Chanmari FC 1-1 Aizawl FC
[Lalmuanzuala 26′] [David Lalrinmuana 45′]
.
37% Ball Possession 63%
10 Shots 11
5 On Target 7
1 Yellow Cards 0
0 Red Cards 0
.
MOM: Lalmuanzoa [Chanmari FC]
.
Powered by Rainbow Multibrand Mobile Showroom.

(Pic : MFA)