MPL: Dinthar FC an him ta

Mizoram Premier League Season 5 round hnuhnung ber chu khelh tan a ni a, Dinthar FC-in season khar nan Michael Lalremruata goal hmangin Ramhlun North FC 1-0 in an hneh. Khatla tlangval Michael hi man of the match atan thlan a ni.

October 24, Zirtawpni zana inkhel result vangin Dinthar FC-in paruknaah hmun sawh nghetin MPL an khel zel dawn tih a chiang a, Ramhlun North erawh Zirtawpni zana Zo United-in Bethlehem Vengthlanga point thum an hmuh zawh loh chauhin MPL Relegation Playoff an khel ang.

Inkhelh hma dinhmun
Dinthar hian point 13 hmuin paruknaah an awm a, anhnuaia awm Ramhlun North nena an inthlauhna hi point khat lek a ni. An inkhel result hian an dinhmun hian anni mai bakah Zo United FC dinhmun thlengin a hril dawn a, inkhel pawimawh tak a ni.

Dinthar hi a chak chuan an relegate thei tawh dawn lo a, Ramhlun North-in an relegate leh relegate loh chungchangah Zo United te inkhel an ngaihchan a tul thung ang. Ramhlun North an chak chuan an him dawn a,  ZoUnited an relegate thung ang a, Dinthar in playoff an khelh a tul thung ang. An inhnehtawk a nih chuan Dinthar an him ang a, Ramhlun North in playoff khelin Zo United an relegate thung ang.

A hmuhnawm loh
Team pahnihten chak an mamawh ve ve rualin inhnehtawk mah se him tih theih deuh thaw ve ve an nih avangin inkhel a dul hle a, nawr vak vak lam aiin mahni goal venhim an thupui mah zawk. Dinthar defender ball petna Balogun Hammed chuan hla tak atangin a pet goal teuh hle a, goalkeeper Liansangpuia’n a lo beng chhuak thei hram a ni.

Ramhlun North lamin an chance neih that ber Zosangliana (Chhaia) freekick pet chu Remruatan lo dawngin Jerry tan ball tha a pe a, goalkeeper awm loh hnuah pet goal na hun tha ni mah se Steve Lalnunmawia’n a lo clear leh hman hram.

Hei bak hi chawlhlawk hmain team pahnihten chance tha sawi tur an nei mumal lo a, inchhuang thei zawk awm lo in chawlhlawk an hmang.

Game dang daih
Chawlhlawk hmain game dul tak kan hmu a, chawlhlawk zawhah erawh a dang ta. Team pahnihte goal thun tumin an innawr a, chance pawh an inhmuhchhawk deuh reng bawk. Ramhlun North in Francis hmangin chance tha an nei thin a, a sirah substitute Isaac Lalruatpuia te an hlauhawm thin bawk. Dinthar tan Ruatpuia ten chance neiin Ramhlun North tlarhnung an rumthaih ve reng bawk.

Ramhlun North tan hian Isaac leh Chhaia te an che tha thei hle a, Armed Veng South tlangval Chhaia freekick pet tha thin mah se goal tur khawpin a tha tawk si lo. Inngam tawk takin an innawr tawn a, lehlam lehlamin chance an hmuh mawlh mawlh laiin minute 71-ah Dinthar in corner an hmu a, Samuel Laltlanthanga’ n petin Michael Lalremruata chuan mawi zetin a tauh lut. Hei hi tun MPL-a a goal riatna niin Dinthar an phur hle.

Ramhlun North hian goal thun ngei tumin an nawr a, amaherawhchu, goal zawnah an pet hleihthei lo a, Dinthar lamin Michael, Hammed leh Nigerian mdifielder Clarence Carter teho hmangin goal chance an nei ve reng bawk a, huntawp thlenga goal a luh tawh loh avangin Dinthar in hnehna an chang ta a ni.

Tichuan engtin zel?

Dinthar hian hnehna an chan tak avangin an him ta a, MPL 6 an khel leh ang. Ramhlun North erawh an dinhmun an kutah a innghat ta lo a, Zo United in Bethlehem Vengthlang an hneh chuan an relegate ang.

Tute nge khel?

Ramhlun North FC: Liansangpuia, Lalramthlamuana, Israel Laldingngheta, Lalmuanawma, Zosangliana Sailo, C. Ramdinmawia, Jerry F Zonunsanga, Vanlalthlamuana, Lalremruata, Oneyeama Francis Okechukinu, Lalramzauva Khiangte.
Subs: David Lalrinpuia, Lalmalsawma, Lalruatfela, Lalchhanchhuaha Fanai, Lalruatkima Dosel, Lalchhuanpuia, Isaac lalruatpuia, B. Malsawmzuala, Ramniengmawia.

Dinthar FC : Isak Lalmuanpuia, Steve Lalnunmawia, VL Chhanhima, Zothanzuala, Balogun Hammed, Saihmingthanga, Carter Ezebube Clarence, Samuel Laltlanthanga, Michael Lalremruata, Lalremruata, Cho Tsering Lepcha.

Subs: Joseph C Lalruatfela, Freddy R Zothanpuia, Lalremtluanga, Vanneitluanga, George MS Dawngliana, C. Lalnunsanga, Joseph Lalthafela, R. Lalnunmawia, Chawngthansanga.

ZoFooty Statistics:
Ramhlun North 0  – 1  Dinthar FC
DFC : Michael Lalremruata 71′
MoM : Michael Lalremruata, DFC
52% Ball Possession 48%
12 Shots 18
1 On Target 9
1 Yellow Cards 1
0 Red Cards 0
Powered by Rainbow Multibrand Mobile Showroom