MPL Playoff-ah Ramhlun North chak chiang

Mizoram Premier League Season 5 a pasarihna Ramhlun North FC chuan MPL an la khelh chhunzawm zel dawn niin a lang a, vawiin khan relegation/promotion playoff-ah MPL Qualifier a pahnihna New Serchhip FC chu 6-1 ngawtin an sawi sa a, second leg-ah ‘thilmak’ a thleng a nih loh chuan Ramhlun North hian MPL an la khelh chhunzawm zel ang.

Lammual inkhelah hian Ramhlun North FC tan Lalramzauva Khiangte, Lalremruata, Isaac Lalruatpuia leh Zosangliana Sailo (Chhaia) ten goal khat theuh an thun a, Nigerian striker Oneyeama Francis Okechukinu chuan goal hnih a khung bawk. New Serchhip goal awmchhun hi midfielder Lalhriatzuala thun a ni.

MPL club nge nge
MPL 5-ah pasarihna an nih avangin MPL khelh chhunzawm zel an la duh a nih chuan playoff an khelh a tul. Playoff a an hmachhawn tur hi Serchhip District a inelna zawng zawnga champion vek thei leh Venghlui FC pawh lo tudawl tawhtu New Serchhip FC niin an ti mai mai lo tih a hriat a, an player tha an lut kim thawkhat bawk.

Inkhel tan atangin MPL club zawk an chungnung a, minute li lekah foreign striker Francis chuan goalkeeper chiah a hmachhawn tawh tihah a pet goal lo hlauh. Ramhlun North hmatawngte an hlauhawmin New Serchhip defender ten an an chelh hneh lo a, minute 15 lekah Rz-a chuan ball pangngai tak a chan chu kawh zet maiin a pet thut ta, New Serchhip goalkeeper Malsawmtluanga’n a dang hman lo.

Goal an thun hnuah pawh an nawr chhunzawm zel a, winger tlan chak Isaac Lalruatpuia chuan mual dinglamah ball lain awlsam taka Ralkapzauva a bum hnuah Venghlui FC atanga Ramhlun North zawmtu Remruata tan ball tha a thawn lut a, vawi khat tawhah Remruata hian an goal hnih nan a thun. Goal hnih luh atanga minute hnih chiah a kal leh hman tihin Francis leh Isaac te inthlawp pheiin goal mawi an khung a, Nigerian forward pass chu Isaac-a’n mawi takin a khung a, Lungei tlangval a khel tha hle.

New Serchhip lamin minute 41-naah khung ve mah se minute khat ral hnuah Ramhlun North defender C. Ramdinmawia goal clear tha tak mai chu Francis chuan umlutin kawh zetin a pet goal. Chawlhlawk hmain goal li an thun der a, chawlhlawk zawhah Francis chuan striker tha bik a nihzia lantirin Lalruatkima Dosel (Anggu-a) lob pass tha tak mai a umlut a, a pet chu New Serchhip goalkeeper chuan lo dang mah se a per let a lo dawng leh a, mawi tak maiin a pet kual lut raih a ni.

Goal nga an thun tawh hnuah pawh an la duhtawk lo a, minute 83-naah Francis-a hlawhchhuah freekick chu mawi takin Chhaia’n a pet lut a, si ruk thunin second leg atan an dinhmun a tha hle. Hei bakah hian Remruata chuan tum thum zet mai goal thunna hun a nei a, tum hnih zet goalkeeper chiah a hmachhawn tawh hnuah a pet goal lo ve ve.

New Serchhip êng a chuai
Serchhip treble champion New Serchhip hian Venghlui FC an tukdawl hnuah Ramhlun North FC an hmachhawn leh a, Venghlui an hmachhawn tuma khel tha em em mai Lalchhanliana leh Laltlanthanga te an che thei tawh lo a, goal ruk an chhuah. Anni hian midfielder ball thiam Lalhriatzuala hmangin goal an thun ve a, hei hi captain C. Lalnuntluanga freekick, Ramhlun North captain Lalramthlamuanan a tauh chhuah a lo pet goal a ni a, hei hi goal mawi niin Ramhlun North goalkeeper Liansangpuia man phak loh chiah chiahin a kual lut a ni.

Serchhip club hian MPL club chu an khan lo deuh niin a lang a, an player tha Lalremruata (Arapa) leh Remlalruata te an khel chhe hran lo a, mahse, an goal nawr tina turin an thianten an puih that tawk loh avang leh Ramhlun North FC tlarhma an dan hleihtheih loh avangin an chak lo kan ti thei ang.

Hriatzuala pawh a khel chhe lo a, a pumrua a tet deuh avangin Ramhlun North player ten an hnehchhuh leh zel zawk thin. A chance tha neih a thun loh bakah substitute Lalnunpuia chuan chance tha a hlah bawk a, second leg-ah hna hautak an hmachhawn leh dawn.

Team pahnihte an pumrua-ah an inthlau a, player pawh an inneih that hleih deuh niin a lang. Ramhlun North hian substitute-ah Vanlalthlamuana, B. Malsawmzuala tih vel an la thuttir thei a, MPL club nilai lakah Serchhip an la nep hret niin a lang bawk

ZoFooty Statistics
Ramhlun North FC 6-1 New Serchhip FC
RNFC : Lalramzauva Khiangte 15’; Lalremruata 35’; Isaac Lalruatpuia 37’; Oneyeama Francis 42’, 76’; Zosangliana Sailo 83’
NSFC : Lalhriatzuala 41’
53% Ball Possession 47%
15 Shots 10
14 On Target 5
3 Yellow Cards 1
0 Red Cards 0
Powered by Darchiauva Hardware, Mission Veng

Tute nge khel?
RAMHLUN NORTH FC: Liansangpuia, Lalramthlamuana, Israel Laldingngheta, Lalmuanawma, Zosangliana Sailo, C. Ramdinmawia, Lalruatkima Dosel (Lalchhuanpuia 85’), Isaac Lalruatpuia (Jerry F Zonunsanga 46’), Lalremruata (Vanlalthlamuana 74’), Onyeama Francis Okechukinu, Lalramzauva Khiangte.
Subs: David Lalrinpuia, Lalmalsawma, Lalruatfela, David Lalrinchhana, Jerry F Zonunsanga, Lalchhuanpuia, Vanlalthlamuana, B. Malsawmzuala.
NEW SERCHHIP FC: Malsawmtluanga, C. Lalnuntluanga, Remlalruata, Lalchhanliana, Lalhriatzuala, Ralkapzauva, Ramduhawma, Laltlanthanga, Lalremruata, Vanlalhruaia (Lalnunpuia 66’), Lalhlimawma (H. Lalremruata 57’).
Subs:Lalnunpuia, Lalhruaizela, Lalthakima, David K Hmingthanga, H. Lalremruata.