July 11, 2012: Nilaini tlai dar 3 khan MFA Office-ah MPL Playoff chungchang sawiin Manager’s Meeting neih a ni a. He meeting-ah hian team tel tur pariat Aizawl F.C., Chanmari F.C., Chanmari West F.C., College Veng F.C., FC RS Annexe, Kanan F.C., Reitlang F.C. leh Theiriat F.C. atangin an Manager te an tel thei vek a ni.

Manger’s Meeting-ah hian MFA lam chuan team-te chu referee-te zahthiam turin a ngen a, referee chunga mawi lo taka che an awm chuan hrem an nih tur thu an sawi rualin, thatchhiat vang emaw fit loh vang emawa referee-in tihsual a neih chuan referee chu an hrem ngei tur thu an sawi bawk.

MFA lam chuan tun playoff hi a khel turte tana a pawimawhzia an hrechiang a, chuvang chuan tlak tawh vanga ti tha duh lo chu dan an lo siam tawh sa angin an hrem ngei tur thu an sawi a. Dan awmsa piah lamah Manager kal khawmte chu hriatpuituah an tang nghal bawk a ni.

MPL Playoff khelhna tur Lammual pawh naktuk hian MFA lamin an tifai dawn. Lammual hi enkawl uluk anih loh avangin artificial bul a grass te chu a sâng tawh hle a, chumai bakah fencing thenkhat chu ennna tur siam mek a la nih avangin tih chhiat a ni bawk a. Chung fencing chhe lai te chu temporary-in an siamtha rih dawn a ni.

Sawi belh ang!

Mizoram Premier League Playoff hi MPL tak tak enchhinna tur pakhat a ni a, chumi anih avang chuan MFA pawh theihtawpin an inpuahchah a. An inpuahchahna te a lo la tha tawk lo anih pawhin MPL ‘tak tak’ ah siamthat theih a ni dawn a, an insiamthat ngei theih nan kan sawisel duh anih pawhin awmze nei taka sawisel kan tum dawn nia. Chutihrualin sawisel ringawt hi chuan awmzia a nei tawk thin lova, fak tur a awm a nih pawhin fak hreh loh a tha awm e.

Rajiv Gandhi Stadium nei tawh mah ila Lammual hi kan football ground zingah chuan kan ngaihhlut berah a ngaih theih a. Chuvangin a hmang pawh kan tam reng a ni. Heti khawpa hman kan châk chung hian a hmang thinte hian kan uluk tawk ṭhin lo hi a pawi takzet a, tun MPL Playoff-ah pawh hian inkhel en turte leh inkhel turte hian uluk taka an enkawl hi a ngai reng a ni.