Aizawl, ni 11th July 2012: MFA hnuaia Referee Board chuan tukin khan Rajiv Gandhi Stadium, Mualpui-ah an Chairman leh MFA Joint Secretary ni bawk C. Vanlalmawia (Pu Mawipuia) kaihhruaina hnuaiah Copper Test an nei. Copper Test hi referee fitness that tawk leh tawkloh fiahna a ni a, he test-ah hian mi 11 kalin fitness test hi han paltlang vek a ni.

Tun Mizoram Premier League playoff lo awm turah hian heng referee 11 te hian an ham dawn a, nikhatah referee pariat zel an duty thin dawn a ni. Tun MPL Playoff a ham turte chu Lalfakzuala (Electric Veng), Lalrintluanga (Sakawrtuichhun), Vanlalhruaia (Mualpheng/Bethlehem Veng), M.S. Dawngliana (Ramhlun Vengthar), Vanlalhuma (Hualngohmun), Lalzahawma (Bawngkawn), Duhzuala (Bawngkawn), K. Lalrinawma (Ramhlun Vengthar), David C. Laldinpuia (Lungleng), James c. Lalnuntluanga (Hunthar) leh Lalrawngbawla (sesawng) te an ni.

Referee Board Chairman Pu Mawipuia chuan,”Referee ten hma an sawn zel theihnan theihtawp kan chhuah a, tun tuma kan copper test pawh hi a hlawhtlingah a ngaih theih. Hemi bakah hian AIFF lamin dan thar an rawn siam a, referee tin hian identification number an nei tur a ni a, chu chu ‘RIN – Referee Identification Number’ tih a ni. Chumi anih avang chuan kan referee zawng zawngin identification number an neih theihnan theihnan theihtawp kan chhuah ang” tiin ZoFooty a hrilh.

Referee Board Asst. Secretary B. Lalrinkima pawn ZoFooty hrilhin,”Mizoram football team ten pawisa tam tak sengin club an din a, an thawhrimna leh an pawisa hmante hi kan inthlahdah vang ringawta tih thlawn hi kan tum lo. Hemi anih avang hian Copper Test pawh hi kan nei reng a ni. Amaherawchu mihring kan nih angin tihsual palh chu a thei, mahse kan inthlahdah vang chu a ni lovang” a ti.

Mizoram Football Association hian MPL hlawhtling nan hian theihtawp a chhuah a, Referee lamin Copper Test an neih hma pawhin ‘First Aid Training’ te an lo buatsaih tawh bawk a ni.

Tun MPL Playoff-ah hian MFA Referee zinga lar ber anga ngaih theih Lalruatkima’n (Mizo Collina ?) chhungkaw harsatna avangin a ham thei dawn lo a, a awmlo tur hi a uihawm khawp mai. Chutihrualin MPL-ah chuan a hmel kan hmuh theih tawh a rinawm.

Pic: Referee leh Red Ribbon a Match Commissioner tur Pu Laltanpuia Hnamte (Pu Pate-a)
(He Pic Red Ribbon puala MFA in ni 24 March 2012 (Inrinni) a Referee Seminar a neih ni a lak a ni)
Standing (L-R): James C. Lalnuntluanga, Rothangliana, Joel, Lalremtluanga, Vanlalhruaia, Jonathan Lalngaihawma, Lalramhluna, C. Lalrintluanga, C. Lalmuankima.
Sitting (L-R) : Lalhlimpuia, Lalrawngbawla, F. Zohmingliani, Laltanpuia Hnamte (Match Commissioner), Biakhlua, M.S. Dawngliana, B. Lalrinkima