Mizoram Premier League (MPL) playoff round 2, match hnuhnung ber hi tun tournament-a mi ngaihven hlawh berte zing a mi a ni a. Achhanchu “CHANMARI DERBY” a ni tlat ! Veng inthenawm an ni a, chuvang chuan chak lo zawk nih an duh lova. Players inhrechiang leh inkawm an ni a. An in haw hran lo mahse football field-a tlawm zawk nih erawh an duh lo ve ve a ni.

He inkhelah hian Chanmari FC chuan 3-2 in hnehna an chang a. Chanmari FC tan hian Lalrammawia, Lalrinzuala (own goal) leh Lalhlimpuia te’n goal an thun a. Tin, Chanmari West tan hian Elkana Rosangzuala leh Michael Lalhruaitluanga (own goal) te’n goal an thun thung.

Inkhelh hma chanchin
Derby match hi chu eng level pawh nise a boruak a ‘hot’ vek a, entu pawh an tam ziah a ni. Hming inang derby-ah chuan Manchester derby hi a lar ber pawl a ni ngei ang. Chutiang chiah chuan Chanmari derby-ah pawh hian Chanmari FC leh Chanmari West FC te chuan chak zawk nih an tum hle a ni.

Practice ho an ni a, players te an inhrechiang a. A bikin Chanmari West Mahuma phei chu Red Ribbon Champion team “Chanmari”-ah khan a tel nghe nghe. Tin, players te hi eng anga inthat hleih pawh nise derby-ah hi chuan chak zawk rinthiam a har thei hle a ni.

Chanmari West lam hi an match hmasa zawka chak tawh lo an nih avangin an tan chuan chak loh hi a thiang tawh lo a tih theih a. Chanmari erawh point thum hmu tawh an ni a. Mahse squad an siksawi ve thova. Player pawimawh Red Ribbon-a best player ni tawh, Ms-a bench-a an thut tir erawh mi mak tih a ni.

First half-ah Chanmari FC goal a sur !
Inkhel tan a ni a, Chanmari FC lam hian an  nawr nghal a. Striker tlan chak Lalrammawia chuan minute 1 lekah a pet goal nghal a. Chanmari West khel a buai chhova, Chanmari FC lampang an phur tulh tulh a, Chanmari West player Lalrinzuala chuan an lamah a ti goal palh a. Minute 6 chauh a ni a, Chanmari FC lam hian 2-0 in hma an hruai nghal der a ni. Thawm a tha kher mai.

Chanmari West FC lam an talbuai zel a, duh angin ball an in pass thei lova. Ruah a sur a, ball a kal chak a, ground a nal deuh bawk si a, players te’n khelh harsa an ti angreng a. Chanmari Striker Rammawia a chetha hle a, chance pawh a nei nual a ni. An innawr tawn zak zak a. 2-0 in first half a tawp mai dawn emaw tih laiin Chanmari FC striker Lalhlimpuia chuan mawi zetin keeper man hman lovin a push lut a. Hun a tawp zui a, 3-0 in Chanmari FC lamin hma an hruai der a ni.

Second half-ah erawh Chanmari FC an mualpho tep !
Inkhel an tan a, Chanmari West FC lamin half time an hmang thiam zawk ni ngei tur a ni, First half-a Chanmari West FC kha an ni ta hauh lo mai. Chak tur a chiang tawh, Chanmari FC an chak tho vang tih leh goal dang an thun leh teuh tho ang tih kha mi tam tak ngaihdan a ni tawh a. Mahse a ni hauh lo, football-ah hi chuan thleng thei lo a awm lo tih hi chu a dik zia nimina Kanan FC leh Theiriat FC inkhelah kan hmuh tawh kha.

Inkhel tan atanga rei lo te, minute 47 naah Elkana Rosangzuala chuan Chanmari West FC tan a rawn ti goal a. Chanmari West FC tan beiseina chhe te a rawn siam veleh a. Midfield-ah an intum tawk a. Chanmari FC an talbuai tan a. Half chance pawh a awm zeuh zeuh tan a.

Inkhel a rei tulh tulh a, Chanmari FC an talbuai chhunzawm zel a, miss pass an nei tam  tawlh tawlh a. Chanmari West FC lam an phur tawlh tawlh thung a. Chanmari defender chu box chhungah a hand a, mahse referee chuan a hmu lova, Chanmari West FC te an lawm lo hle. Hemi hnu hian Chanmari FC lamin an defender te an thlak a, substitution an siam hnu phei hi chuan an game-in awmzia a nei tawh lo a tih theih. Minute 68 naah Chanmari FC player Lalhruaitluanga chuan an lamah a ti goal palh a. TIhian, 3-2 chauhvn Chanmari FC hian hma an hruai ta a ni.

Chanmari West FC te an tang tawlh tawlh a, Chanmari FC an talbuai chhunzawm zel a. Mahse an striker Rammawia bawkin half chance a nei leh zeuh zeuh a, counter attack-ah erawh an hlauhawm hle thung.Derby match hi chu a dang a, players inhrechiang an ni bawk nen Chanmari West FC hian an ngam tawh hle a ni. Chanmari FC players te an che thei tawh lova, a tawp thlengin a bet zawkah an tang a, mahse goal erawh an hum thei a, 3-2 in an chak ta hram a ni. Chanmari West FC lam hi an ‘day’ chu ni se chuan an draw ngei ang le.

Tlangkawmna
Kan sawi tawh angin derby match hi chuan boruak hran a nei a. Tin, practice ho thang an nih naah hian an inhrechiang a, chuvang chuan an inhnehtawk pawh a tih theih awm e. Chanmari FC lam khan atirah goal an thun thei hlauh a, an vanneih pui ta a ni. Ni lo se chuan an chak lo hial mai thei a ni. “Bul tan that chu a chanve zo ang a ni” tih kha an hmang tangkai hle a tih theih.

Chanmari West FC lam hi a tirah an inthlahdah a, game mumal an khel thei lawk lova, an insiamthat hmain Chanmari FC lamin an lamah goal an lo thun ta si a, an vanduai hle a ni. Chanmari lamah pawh Captain Chhinga duh angin a khel tha lova, tin, Ms-a an luh tir lo kha an tisual em aw a tih theih. Tin, chu aia pawi chu players an siksawi anih paw’n defence lai an thlak kha chu thil fuh chiah niin alang lo.

Referee bawk
Nimin lamah referee an che chhe tawh a. Kanan FC leh Theiriat FC inkhelh laia thil thleng chu kan hre vek awm e. Vawiin lamah pawh officials te’n thil an tisual leh ta ! Chanmari FC defender chu chiang takin box chhungah a hand ball, referee mai ni lovin assistant  referee (linesman) chuan a hmu lova. Mipui lamin chiang taka an hmuh laia referee te’n an hmu lo ve ve kha chu thilmak a ni. Penalty kha pe ta ngei se chuan Chanmari West FC khan an draw loh paw’n an chak hial mai thei a ni.

Chutih rual chuan hei erawh kan hriat a tha. Referee te hi khawl an ni lova, mihring ve tho an ni a. Thil tisual ve thei tho an ni. Chuvang chuan thil an lo tisual  anih paw’n i dem lutuk lovang u. Tin, referee te pawh hian inzir nan hmang se. Achhanchu sum tam tak sengin club tin te an rawn tel a, ho lam taka an chak lo anih chuan club chak lo tan a na dawn em mai. Hma kan sawn zel turah ngai ang.

Statistics

MPL League Table (Round 2)