Mizoram Premier League (MPL) playoff pawh khelh chhunzawm zel a ni a. Vawiin atang Round 5 khelh tan a ni a, Match hnih awm lehin match hnuhnung zawkah a sang pahnih an inkhel a. Table-a sang zawk/ber Chanmari FC chuan 1-0 in FC RS Annexe an hneh a. A sang ber dinhmun an sawhnghet tawlh tawlh a, point 5 ngawtin an sang fal a, point 13 an hmu tawh a ni. Vawikhat chiah draw neiin match li an chak thung. Tihian Chanmari FC hian MPL an qualify tawh a tih theih.  A chhe berah palina an ni tawh dawn a ni.

Inkhelh hma chanchin
Chanmari FC lam hian top scorer nilai Tata bawk hmatawngah rawn hmang leh 4-5-1 formation an rawn hmang a. Midfield-ah an inhnawh tam a. Amah thlawp turin Mpa, Msa, Lawma leh Tluanga te an dah a. Defensive-ah chuan Captain Chhinga bawk an hmang leh a. Defence lam erawh Rinchhana’n rawn ho lehin Zomuanpuia hmel pawh kan hmu leh a. Tin, Mike-a a inhliam avangin a aiah Mamtea an dah thung.

FC RS Annexe hian anmahni aia point 1 chauhva sang an tum a, chak an tum hle a ni. An chak chuan table-ah a sang ber an ni thei dawn tih an inhria a, match hmasa lama khel lo Danny-a hmel kan hmu leh a. Hmatawngah Zosangliana nen an awm a. A hnungah Sawmtea leh Chta bawk an awm leh a. A sirah Jerry-a te awmin defence pawh Captain Sangsanga’n a rawn hova, Zemawia nen an ding dun a. Suspend vanga match hnuhnung ber khel lo Rinsanga’n goal a rawn veng leh bawk a.

First half : Bul tan tha Chanmari FC
Kan sawi fo tawh angin Chanmari FC leh FC RS Annexe te hian players an nei tha a, champion tura rinkai pawh an ni. Match tan a ni a, Chanmari FC lamin an nawr a. Half chance pawh a awm nghal zeuh zeuh a. Chanmari FC te hian an khelh that loh tum paw’n point an hlawhchhuak a, vawiinah erawh an game a mawiin a hmuhnawm em em a. A tir minute 20 vel en mai chuan Chanmari FC hian an pet goal teuh rin a ni.

Chanmari FC lam hian an nawr zel a. Minute 32 naah Vice Captain Lawma ball khalh tlang tur chu RS Annexe keeper Rinsanga chuan box chhungah a titlu a, referee-in red card leh penalty a pe a. Top scorer nilai mek Tata rawn pen chhuakin chiang zet zawtin a pet goal a, 1-0 in Chanmari FC in hma an hruai a. Tihian tun dinhmunah Tata hian goal 5 thunin top scorer ani chhunzawm zel a ni.

RS Annexe hian chak loh an duh lova. Players 10 chauhva khel ni mah se an khel tha tulh tulh a. Chanmari FC lam hian an concentration an hlauh a, a hmaa an game angin an khel thei lo tan a, an talbuai chho a. RS Annexe te hi players 10 chauhva khel an ni tih a hriat ta hauh lo mai. Counter attack-ah an hlauhawm thei hle a. Central midfielder pahnih Sawmtea leh Chta te an thawkrim a, an kheltha hle a ni.

FC RS Annexe hi an chiai duh lova, Coach Tawia hnuaiah game mumal tak an khel chhunzawm a. An striker hlauhawm Danny-a chuan box chhungah mawi lutukin a volley a, mahse target-ah a ni lo hlauh a, a out a ni. Goal ta se chuan a mawi khawp ang le. Goal lo mah se a volley hrim hrim vang hian Danny-a class sanzia a lang a tih theih. Goal dang a luh belh lova, 1-0 in first half a tawp a.

Second half : Chanmari FC-in beisei an pha lo, RS Annexe an khel tha thung !
Second half tan a ni a, Chanmari FC hi tam zawk an nih avang leh goal thun hmasa zawk annih avangin mi tam tak chuan goal an thun belh leh an ring a. Mahse a ni hauh lo mai. RS Annexe te hi an rawn phur thar a, Coach-in half time laiin ‘thu tha’ a hrilh a ni ngei ang. Chanmari FC lamin an rawn thun belh leh an rin laiin RS Annexe lamin an nawr zawk a. Kim lo an ni tih a hriat loh a ni.

‘Midfield battle’ a hmuhnawm chhova. Clear chance an nei thei lo ve ve a. Half chance erawh kan hmu zeuh zeuh thung. Chanmari FC lamin midfield-ah Red Ribbon-a Best Player nilai Chhinga leh Best Player lo ni tawh Msa te an kawl a, an khawng hle a. Chutih rualin Annexe pawhin midfield-ah Sawmtea leh Chta te an kawl a, an tangkaiin an kheltha hle a ni.

Chanmari FC lam hian Tata hmangin an ti goal leh tep a. Msa freekick chu box chhungah a lo pet out a ni. Annexe lam pawhin defender Zemawia hmangin an siphurh an sut tep a, a head out hlauh a. Annexe hi kim lo zawk ni mah se chak loh an duh lova. Chawi belh huamin an nawr zel a, hei vang hian Chanmari FC lam hian counter attack-ah chance an nei leh zeuh zeuh thin a. Mahse Annexe Captain Sangsanga leh a pawlte an su tlang thei meuh lo.

Chanmari FC hian counter attack chance tha tak an nei a. Bench atanga rawn lut Mawitea chuan tha zetin ball a tlan luh puia, left back Zomuanpuia tan a cross chhova mahse keeper nen an innek buai a, Mawitea hi a pass tha leh a, Mawitea hian a lo pet out hlauh a ni. Goal dang a luh belh tawh lova, 1-0 in Chanmari FC an chak ta a ni.

Fighting spirit nei tha FC RS Annexe
RS Annexe te hi an chak lo mahse an khelh tha hle a ni. Keeper-in red card a hmu a, penalty a chawi bawk a. Penalty kha hmu lovin player kim ta se result hi a dang mah na ! Annexe keeper hi a vanduai hrim hrim a. Red Card a hmuh avangin suspend a ni a, vawiinah a rawn khel leh chiah a, red card a hmu leh a, hrem a tawk leh a ni. Annexe te hian red card an hmuh hnu khan an kheltha zawk a, an kim laia a khelha an hneh loh kha an kim loh hnu khan an ngam a, an hneh ta zawk a ni.

Red Card an hmu kha an tuar hle a ni. Mahse an fighting spirit a tha a, fak an phu a ni.  Keeper khan titlu kher lo khan pet goal tir se, si phur zawk se an tifuh zawk mai thei a ni. Match hnih khelh tur an la nei a, vawiin anga an khel anih chuan an tlang ngei ang.