Mizoram Premier League (MPL) playoff round 5 khelh zawh a ni a. Vawiina inkhel hmasa zawkah College Veng FC chuan 1-0 in Theiriat FC an hneh a, goal thuntu hi P.Laldinpuia a ni. Tihian, College Veng FC hian point 3 an hmu a, Theiriat FC hian point 2 an hmu thung a. An in draw avang hian team pahnih te hi MPL playoff atang an tla ve ve tawh tih theih a ni ta!

Inkhelh hma chanchin
Theiriat FC hian point 2 an hmu tawh a. An chak hlauh chuan point 5 an hmu ang a, match 2 khelh tur an la neih avangin point 11 an la hmu thei a, midang inkhelh result a zirin an la qualify thei a ni. An players tha te an kim lova, a then erawhLunglei lamah College ai awha an khelh angai si a, chuvang chuan an kim lo hle a ni.

College Veng FC erawh point la hmu lo an ni a. Tin, tla tawh tia sawi ni mah se chhiarkawp danah chuan an la tling thei thova. Midang inkhelah an innghat a, tin, match 2 an la khelh turah hian an chak vek a ngai dawn a ni. Point hmu lova tlak an tum lova, point hlawhchhuah an tum hle a ni.

Beisei pha lo first half
Mi tam tak chuan Theiriat FC te hi an rawn tang ang a, inkhel hmuhnawm tak an beisei laiin rin angin inkhel a hmuhnawm lo tlat! College lam paw’n chak hrim hrim an duh a mahse an khel erawh beisei a pha chuang lo a ni.

Theiriat FC lam hian an nawr zawk a. Goal post te an pet per a. Mahse inkhel erawh a dul hle a ni. Minute 40-na a ni a, inkhelh laiin College  Veng player Lalchawimawia chuan tul lo takin Theiriat FC player a namthlu a, direct red card pek nghal a ni. Hetia an buai deuh laih laih lai hian Theiriat FC player pawimawh Lalramenga (Maenga) chu field pawnah a lo awm a. Referee chuan hei vang hian yellow card a pe a. A hmain Maenga hian hand ball vangin yellow card a lo hmu tawh a, double yellow card a hmu a, red card pek a ni ta a ni.

Theiriat FC player Lalhmangaihtluanga chuan chance tha tak a nei a. Keeper nen chiah an awm tawh a, a goal ngei dawna a lan laiin keeper a pet per a, a goal ta lo a ni. Goal a lut lova, goal in pe lovin first half a tawp a.

Second half : College Veng FC an lawm a, Theiriat FC an zuih ral thung !
Theiriat FC hi mi tam tak chuan an chak zawk an la ring thova, second half-ah hian game an thunun zawk an la ring a ni. Inkhel an tan leh a. An inhnehtawk chho hle a. Game hmuhnawm tak ni lo mah se an inngam tawn hle a ni.

Theiriat FC lam hian an nawr deuh a, mahse College Veng FC te hian counter attack-ah chance an nei leh zeuh zeuh thung a.Theiriat FC lam hian freekick atang an thun teuh hle a. Captain H.Lalremmawia (Vala) chuan bar a pet per a. Theiriat FC lamin an nawr zel a, an striker naupang tak Johny-a a langsar hle a, mahse a la nau deuh a, a finishing duh angin a tha tawk lo a ni.

College Veng FC winger Kca pawn chance a nei zeuh zeuh a, mahse duh angin a finishing a tha tawk lova. Minute 65 naah Kca bawk hian chance a nei leh a, mahse Keeper-in a lo saved a, Kca vek hian cross lehin P.Laldinpuia chuan a lo pet goal a ni. 1-0 in College Veng FC in hma an hruai a, players leh fans te an lawm hle a. College Veng FC hian point hmuh lova tlak an duh lova, chak tumin an bei chhunzawm zel a.

P.Laldinpuia tho hian box pawn atang kawh takin a shot a, bar a fuh a, ball a sawt thla a, chumi rawn sawt chhuak chu keeper-in a lo man a. He goal hi a landan chuan a goal ngeiin a hriat a, mahse a goal tih ngam a ni bik lo. Bar atanga a sawh thlak khan goal line a pel niin a lang a, mahse referee chuan goal-ah a pawm lo a ni.

Goal dang a luh belh tawh lova, 1-0 in College Veng FC te hi an chak ta a ni.

Tlangkawmna
College Veng FC players te hian fak an phu a. Tla tawh mah se point hmuh loh an duh lova, point hmuh tumin an khel a ni. Duh angin khel tha lo mah se an duh ber point an hmu a, table-ah a hniam ber nih an tum lo a ni. Tin, players te an la naupang a, hun tep ter taka playoff khel tura inziaklut an nihna alang a tih theih. Nakum lamah erawh an players te hi an chhuak lo anih chuan an tha tawh khawp ang le.

Theiriat FC hian Kanan FC leh Aizawl FC an draw a, an rawn phur thar hle a. Mahse RS Annexe leh tla tawh College Veng FC an rawn hneh lo leh a. Hei hian a entir chu an ‘serious’ tawk lo a tih theih. An players tha te’n an khel thei lova, an tuar a tih theih bawk. Chu aia pawi chu squad-a awm sa players te’n an Club aia an College team an ngai pawimawh zawk hi a ni. Mi tam takin an beisei sang a, an qualify mai pawh an ring a. Hetiang dinhmuna an din lai hian an players kawl sa thenkhat te chu Lunglei lamah College tana khel turin an haw hlawm a, hei hi an tuar hle a ni.

Tin, vawiinah player pawimawh Maenga’n red card (double yellow card) a hmu bawk a, hei hi an tuar a tih theih bawk. Aizawl FC player hlui Maenga hian ho tak maiin hand ball vangin yellow card a hmu a. Dead ball laiin field pawnah a lo chhuak a, hei vang hian yellow card a hmu leh a, red card a hmuh phah a ni. Ani ang tawnhriat nghah player-in field a lo chhuahsan kha a tih loh tur a ti a ni. Hei hian a entir chu inkhel-ah khan ‘full concentration’ a pe lo a tih theih. College Veng FC khan red card an hmu a, chakna chance an neihthat tehreng nen, tul lo takin red card a hmu a. Player 10 ve ve in an khelh phah ta a ni. Maenga hian red card hmu lo ta se chuan result hi a dang mah na ! College Veng FC red card kha chu thil awm a ni a, mahse Theiriat FC red card erawh concentration hloh vang leh serious tawk loh vang a tih theih.

Match Statistics
Theiriat FC 0-1 College Veng FC
(P. Laldinpuia 65′)

MIZORAM PREMIER LEAGUE PLAYOFF TABLE