Vawiina inkhel hnuhnung zawkah Chanmari West FC in 3-2 in Theiriat FC, Lunglei an hneh a. Chanmari West FC tana goal thuntute hi MS Dawngliana leh F.Lalnunhlua (2 goals) an ni a. Theiriat FC tana goal thuntu hi F.Lalhualhima a ni thung. Chanmari West FC hi chak mah se an tling pha tawh chuang lo a ni. Tihian F.Lalnunhlua (Valtea) hian goal 7 thun tawhin tun dinhmunah chuan top scorer nilai a ni.

Inkhelh hma chanchin
Chanmari West FC leh Theiriat FC te hian an inkhelh hmain an thla tawh tih an inhria a, beisei angin inkhel pawh a hmuhnawm loh a tih theih.

Tla tawh ve ve inkhel an nih avangin inkhelh hma atang players te enin an phur lo deuhvn a hriat a. A bikin Theiriat FC phei hi chu an players tha te Lunglei lamah inkhelin an haw fur a. Chanmari West FC paw’n chak loh kan duh lo an ti nain beisei nei tawh lo an nihna laiah hian an phur lo deuhvin a hriat.

First half-ah goal thum a lut !
Inkhel an tan a, tun tournament-a goal rang ber hmuh a ni a. F.Lalhualhlima chuan minute khat pawh la tling lovah goal a thun nghal der a. Theiriat FC in 1-0 in hma an hruai a ni. Chanmari West lam hian MS Dawngliana goal hmangin an rawn ti goal veleh a. An innawr tawn a, mahse clear chance an nei thei lo ve ve a.

Midfield-ah an intum tawk a, Theiriat lamin F.Lalhualhlima hmangin an ti goal leh a, 2-1 in hma an hruai a. Theiriat FC hian table-ah a hniam ber nih an duh lova, chak an tum hle a ni. Theiriat hian an player pawimawh Maenga khel lo an tuar deuh niin alang a, Maenga hian match hnuhnung bera red card a hmuh avangin a khel thei lo a ni.

Chanmari West FC midfielder Mahuma kan hmu tam a. Tin, team pahnih striker Valtea leh Johny-a te kan hmu tam bawk a mahse defender te an su tlang thei lo ve ve a, goal dang a luhbelh tawh lova, 2-1 in first half a tawp a ni.

Second half-ah Chanmari West an come back !
Theiriat FC hian an goal neih sa hi humin pet goal leh an tum hle a, mahse an duh angin an khel thei bik lova. Tla tawh sa ve ve an nih avang hian duh angin an tang tawk lo a tih theih. Inkhel a dul a, first ai kha chu a la hmuhnawm angreng a, second half erawh beisei a pha tawh meuh lo.

Chanmari West FC hian F.Lanunhlua (Valtea) hmangin minute 46 naah an ti goal a. 2-2 a ni a, an rawn phur thar a, chak an tum hle a ni. Midfield play bawk a tam leh a mahse chance mumal hmuh tur a awm meuh lo. Half chance erawh a awm zeuh zeuh a.

Minute 69 naah Chanmari West FC lamin penalty an hmu a, Valtea rawn pen chhuakin a rawn pet a. Tihian tun playoff-ah bik game 6 khelhah goal 7 a thun a, top scorer nilai a ni. Goal dang a luh belh tawh lova. 3-2 in Chanmari West FC an chak a ni.

Tlangkawmna
Theiriat FC hi an vanduai a. An players tha te an kim lova. Tin, playoff khelh laiin an players neihsa te’n Inter College tournament vangin an hawsan lehzel bawk nen beisei an pha ta lo a tih theih. Mahse players naupang tak tak te an ni a. Coach Muankima ngei paw’n tun playoff khelh ringawt hi kan tum a ni lova, players tha chher chhuah a, nakum lamah pawh champion an tum tur thu a sawi a. An fighting spirit a tha a, nakum lamah chuan heng players naupang tak tak te hian tawnhriat an lo ngah tawh ang a, team tha tak an din ngei a beiseiawm.

Chanmari West FC pawh hi hun tepter taka indin an ni a. Chuti chung chuan an tumpuite an hneh teuh thei hle a. Mahse inpuahchahna tha lo tih takah ‘last minute’ah hian an talbuai leh thin a ni. Players an nei chhe lova, an inpuahchah tlai kha an tuar a tih theih. Match hnuhnung berah erawh Aizawl FC an tum dawn a ni a, an chak anih chuan Aizawl FC an pet thla ve thei tlat.

Match Statistics
Chanmari West 3-2 Theiriat FC
(MS Dawngliana 23′; F. Lalnunhlua (Valtea) 46′, 69′) – (F. Lalhualhlima 1′, 23′)

MPL PLAYOFF ROUND 6 TABLE