MPL TITI

Round 12 a zo tawh a, Round 2 chiah a awm tawh. Tunah hian Chhinga Veng FC leh Aizawl FC te’n semi-final an lut chiang tawh a, semi-final hmun ruak pahnih inchuhin club pali an in el a, tlak hlau team hnih an awm bawk !

Tunkarah inkhel pali a awm dawn a, result a zirin engkim a chiang thei ang. Semi-final luh tum zingah Chanmari FC leh Mizoram Police an chak a, Ramhlun North leh BVT an chak loh bawk chuan semi-finalist te kan hre kim thei ang.

Chutih rualin Chamari hian anmahni ang bawk a semi-final luh la beisei Ramhlun North an hmachhawn dawn a, Mizoram Police tan tla thei dinhmun a ding mek Dinthar FC hneh hi thil awlsam a ni dawn lo.

MPL club zingah point 8 nei mek Dinthar FC dinhmun a chhe rih ber niin a lang a, game hnih chiah awm tawhah hian Mizoram Police leh Chanmari FC an la hmachhawn dawn a, chak ve ve pawh nise midang result-ah an innghat.

Chutih rualin heng inkhel pahnih atang hian point thum tal pawh an hmu thei a nih chuan West Warriors aiin head-to-head ah an tha miau a, Aizawl FC leh BVT FC la hmachhawn tur Chanmari West tan inkhel pahnih atangin point 6 an hmuh a harsa ang.

An player te en in Dinthar FC hi MPL6-ah budget nei tlem ber an nih a rinawm loh a, chutih rualin chak tlem ber (2), draw nei tlem ber zinga mi (2) leh chak lo ngun ber (8) an ni. Maimawms te hi an vanduai ve hrim hrim ni pawhin a ngaih theih a, tum hnih ngawt ‘own goal’ an chak loh pui tawh bakah tunhnaiah 3-2 in vawi hnih an tlawm bawk.

Social media hrang hrangah Dinthar tantute’n MPL atanga tla mai tur a innngaiin an kam chhuak hmuh tur a awm nual a, game hnih la awmah hian theihtawp chhuahin han intangmar se, MPL-a an hmel hmuh zel hi tualchhung football ngainatute duhthusam a ni e.

Round 13 fixtures :
November 9 (Ningani )
Ramhlun North FC vs Chanmari FC
Bethlehem Vengthlang FC vs Chhinga Veng FC

November 10 (Zirtawpni)
Mizoram Police FC vs DInthar FC
Aizawl FC vs Chanmari West FC

Posted in MFA, MPL, News, Tualchhung.

Leave a Reply

Or